काठमाडौं । राष्ट्रिय फुटबल टिमका खेलाडीद्धय बिक्रम लामा र बिमल घर्ति मगरको चोटको उपचार कतारमा हुने भएको छ ।
खेल्ने क्रल्ने चोट बोकेका दुवै खेलाडी मैदानदेखि बाहिर छन् । दुवैले उपचारका लागि कतारको सुविधा सम्पन्न खेलकुद अस्पतालमा ब्यवस्था मिलाउन एन्फासंग अनुरोध गर्दै आएका थिए ।
अखिल नेपाल फुटबल संघ (एन्फा) र कतार फुटबल संघबीच भएको सम्झौता अनुसार दुई खेलाडीको चोटको उपचार कतारमा हुने टुङ्गो लागेको हो ।
आईतबार साँझ मात्र दुवै खेलाडीको भिषा आएको छ ।
केही हप्ता अघि एन्फा अध्यक्ष कर्माछिरिङ शेर्पा कतार पुगेर खेलाडीको उपचार सहित फुटबलका विभिन्न क्षेत्रमा सहयोगका विषयमा कतार फुटबल संघसंग सम्झौता गरेका थिए ।
सोही सम्झौता अनुसार बिशेषज्ञ चिकित्सक र खेलकुद अस्पतालमा उच्च स्तरको उपचार नेपालका दुई खेलाडीले पाउने एन्फाले जनाएको छ ।
बिक्रम दुई वर्ष अघि भाँचिएको खुट्टाको पुन चेकजाँचका लागि कतार जान चाहेका थिए । दुई वर्ष अघि खुट्टाको सफल सल्यक्रिया गरेका बिक्रम पछिल्लो समय असहज महशुश गर्न थालेका थिए । खेल्ने क्रममा उनको खुट्टामा पिडा हुन थालेको थियो ।
बंगलादेशसंगको पछिल्लो मैत्रीपूर्ण खेलमा समेत उनले चोट बोकेका थिए । खुट्टामा गम्भिर चोट लागेर समेत सफल उपचारपछि मैदान फर्किएका बिक्रमले क्लब र राष्ट्रिय टिमबाट आफुलाई सिद्ध गरिसकेका छन् ।
बिमल भने केही साता अघि मात्र अभ्यासको क्रममा घाईते भएका थिए । उनले दायाँ घुडामा गम्भिर चोट लागेको एन्फाले जनाएको छ ।
विश्वकप छनोट अन्तर्गत राष्ट्रिय टिमको तयारीमा रहेको समय बिमलले चोट बोकेका हुन् ।
उनी लामो समय मैदान बाहिर रहने बताईएको छ ।
एन्फाका अनुसार एक हप्ता भित्र दुवै खेलाडी कतार उड्नेछन् ।
एन्फाले कतार फुटबल संघसंग खेलाडीको उपचारका लागि सहयोग सम्झौता गरेको छ । कतारले अनुकुलताका आधारमा नेपाली फुटबल खेलाडीलाई उपचारको ब्यवस्था मिलाउँदै आएको छ ।
केही समय अघि एन्फाले राष्ट्रिय फुटबल टिमका रविन श्रेष्ठ र नविन महर्जनलाई उपचारका लागि कतार पठाएको थियो ।
