एन्फाको प्रदेश कमिटि गठनको मिति तय

काठमाडौं । अखिल नेपाल फुटबल संघ (एन्फा)को बाँकी रहेका प्रदेश कमिटि गठनको मिति टुङ्गो लगाएको छ ।

प्रादेशिक संरचना अनुसार विधान संशोधन गरेर एन्फाले प्रदेशमा तत्काललाई तदर्थ कमिटि बनाउने प्रक्रिया अघि बढाएको छ ।

तीन प्रदेशमा सर्वसम्मत प्रदेश कमिटि गठन गरेको एन्फाले बाँकी चार प्रदेशका लागि मिति तोकेको छ ।

एन्फाको पछिल्लो कार्यसमिति बैठकले लुम्बिनी, बागमती, कर्णाली र गण्डकी प्रदेशको कमिटि गठनका लागि केन्द्रिय प्रतिनिधि तय गरेको थियो ।

एन्फाले कर्णाली प्रदेशका लागि कुमार केसी, बागमतीका लागि पूर्णमान चित्रकार, लुम्बिनीका लागि कृण्ण थापा र गण्डकी प्रदेशका लागि प्रकाश पंगेनीलाई जिम्मेवारी दिएको थियो ।

एन्फाका जिल्ला समन्वय समितिका संयोजक विरबहादुर खड्काका अनुसार तदर्थ कमिटि गठनका लागि गण्डकी प्रदेशमा १७ गते, बागमती प्रदेशमा २० गते, कर्णाली प्रदेश र लुम्बिनी प्रदेशमा १३ गतेको मिति तय गरिएको छ ।

लुम्बिनीका केन्द्रिय परिवेक्षक कृण्ण थापाले कार्यब्यस्तताको कारण देखाउँदै समय केही दिन पर सार्न अनुरोध गरेका छन् । सोही अनुसार १५ गते लुम्बिनी प्रदेशमा तदर्थ कमिति गठनको मिति तय हुने सम्भावना रहेको छ ।

एन्फाले प्रदेशको तदर्थ कमिटि गठनमा सहमती जुटाउन यसअघि अनौपचारिक छलफल अघि बढाएको थियो । एन्फाले सहमतीकै आधारमा यसअघि प्रदेश एक, दुई, सुदुरपश्चिम प्रदेशमा तदर्थ कमिटि गठन गरेको छ ।

एन्फा स्रोतका अनुसार बाँकी रहेको प्रदेश मध्य कर्णालीको तदर्थ कमिटिको संयोजकमा सहमती जुटिसकेको छ । कर्णालीको प्रदेश कमिटिको नेतृत्वमा प्रमोद हमालको नाममा सर्वसम्मती छ । उनी भर्खरै कर्णाली प्रदेश खेलकुद विकास समितिको उपाध्यक्षमा मनोनित समेत भएका थिए ।

अन्य प्रदेशमा भने सहमती जुट्न बाँकी छ ।

मुख्य रुपमा लुम्बिनी र बागमतीको नेतृत्वमा सहमती जुटाउन कठिन देखिएको छ । लुम्बिनमा बाँके जिल्ला फुटबल संघका अध्यक्ष भोजराज शाही र दाङ्ग जिल्ला फुटबल संघका पूर्व अध्यक्ष पुकार थापाबीच मुख्य प्रतिस्पर्धा छ ।

यता, बागमतीमा वर्तमान एन्फा नेतृत्वविरुद्ध विरोधमा उत्रदै आएका विराटजंग शाहीको दाबी एन्फाको संस्थापन पक्षलाई टाउको दुखाईको विषय बनेको छ ।

एन्फाले सहमतीनै प्रदेशको तदर्थ कमिटि गठन गर्न खोजेको छ । तर केन्द्रिय निर्वाचनलाई प्रभावित पार्ने हुनाले प्रदेशको कमिटि गठनलाई महत्वका साथ हेरिएको छ ।