राखेपको कार्यालय आज बन्द

एजेन्सी । राष्ट्रिय खेलकुद परिषद् (राखेप)को कार्यालय आज (आईतबार) बन्द रहने भएको छ ।

वरिष्ठ भलिबल प्रशिक्षक सुदेशकुमार रिमालको निधनमा राखेपले आईतबार कार्यालय बन्द राख्ने निर्णय गरेको हो ।

मस्तिष्क रोगबाट पिडित रिमालको गत शुक्रबार काठमाडौंको बाँसबारीस्थित न्युरो अस्पतालमा निधन भएको थियो ।

शनिबार मात्र राखेपले केन्द्रित कार्यालयको हाताभित्र रिमालको पार्थीव शरीरलाई राखेर श्रद्धाञ्जली कार्यक्रमको आयोजना गरेको थियो ।

राखेप उपाध्यक्ष शिव कोईराला र सदस्य सचिव रमेश सिलवालले राखेपको झण्डा ओढाएर रिमालको बिदाई गरेका थिए । सरकारी सम्मानका साथ राखेपले रिमालमाथि अन्तिम श्रद्धाञ्जली ब्यक्त गरेको थियो ।

राखेपको नेपाल खेलकुद विज्ञान प्रतिष्ठान (सान)का निर्देशक समेत रहेका रिमालको शनिबार साँझ पशुपति आर्यघाटमा अन्त्येष्टि गरिएको थियो ।

घरेलु खेलकुदका साथै नेपालको राष्ट्रिय भलिबलमा महत्वपूर्ण योगदान गरेका वरिष्ठ प्रशिक्षक रिमालको निधनमा दुख ब्यक्त गर्दै राखेपले आईतबार कार्यालय बन्द राख्ने निर्णय गरेको हो ।