काठमाडौं । राष्ट्रिय खेलकुद परिषद् (राखेप)ले नवौं राष्ट्रिय खेलकुदका बिषयमा निर्णय गर्न राष्ट्रिय खेल संघलाई छलफलमा बोलाएको छ ।
राखेपले कोरोना महामारीले प्रभावित बन्ने देखिएको नवौ आयोजनाको सम्भावना र तयारीका बिषयमा छलफल गर्न राष्ट्रिय खेल संघलाई बुधबार छलफलमा बोलाएको हो ।
राखेपले आठौं राष्ट्रिय खेलकुदमा सहभागी बनेका राष्ट्रिय संघलाई छलफलमा बोलाउने तयारी गरेको हो ।
युवा तथा खेलकुद मन्त्रालयमा गत मंसिर १८ गते बसेको मन्त्री स्तरीय बैठकले नवौंको बिषयमा राष्ट्रिय संघसंग छलफल गरेर निर्णय लिने निष्कर्श निकालेको थियो ।
राखेपले नवौं राष्ट्रिय खेलकुद फागुन २० देखि २७ सम्म गण्डकी प्रदेशमा आयोजना गर्ने निर्णय गरिसकेको छ । तर विश्वभर महामारीको रुपमा फैलिएको कोरोना भाईरसका कारण निर्धारित समयमै नवौं हुनेमा आशंका छ ।
राखेप प्रवक्ता समेत रहेका प्रशासन विभाग प्रमुख कुलबहादुर थापाले नवौंको विषयमा छलफल गर्न राष्ट्रिय संघको बैठक आह्वान गरिएको खेलपाटीलाई बताए ।
‘नवौंको बिषयमा छलफल गर्न संघहरुलाई मंसिर २४ गते बोलाईएको छ । छलफलका आधारित रहेर नवौंको विषयमा औपचारिक निर्णय हुनेछ ।’ उनले भने ।
नवौं आयोजनाका लागि गण्डकी प्रदेशमा पूर्वाधारको खासै समस्या नहुने राखेपको तर्क छ । तर कोरोना कहरका बीच प्रतियोगिता आयोजनामा कठिनाई देखिएको छ ।
अधिकांश खेलका खेलाडीहरु गत चैतबाट सामान्य प्रशिक्षणमा फर्कन पाएका छैनन् ।
सामान्य प्रशिक्षण समेत सुरु गर्न नसकेका राखेप र खेल संघले राष्ट्रिय प्रतियोगिता गर्न नसक्ने धेरैको तर्क छ ।
