एन्फा पुगेर मुख्यमन्त्रीले भने, ‘कर्णालीको योजना बनाईदिनुस’

काठमाडौं । मुख्यमन्त्री महेन्द्रबहादुर शाहीले कर्णाली प्रदेशको फुटबल विकासको योजना बनाईदिन अखिल नेपाल फुटबल संघ (एन्फा)संग आग्रह गरेका छन् ।

मंगलबार ललितपुरको सातदोबाटोस्थित एन्फा कम्प्लेक्समा पुगेर मुख्यमन्त्री शाहीले केन्द्रिय फुटबल संघसंग प्रदेशको फुटबल विकासको योजना बनाईदिन आग्रह गरेका हुन् ।

उनले समग्र प्रदेशको फुटबल विकासको योजनामा सहयोग गरिदिन आग्रह गर्दै बजेटको कुनै अभाव नहुने प्रतिबद्धता जनाए ।

‘एन्फामा प्राविधिक जनशक्ति छ । समग्र प्रदेशको फुटबल विकासको कार्यक्रम बनाईदिनुस । पैसाको कुनै कमी हुने छैन ।’ एन्फाका अधिकारी समक्ष मुख्यमन्त्री शाहीले भने ।

मुख्यमन्त्री शाही समक्ष एन्फाले आफ्ना योजना तथा कार्यक्रम समेत प्रस्तुत गरेको थियो । मुख्यमन्त्री शाहीलाई सम्बोधन गर्दै एन्फा अध्यक्ष कर्माछिरिङ शेर्पाले कर्णाली प्रदेशमा फुटबलको राम्रो सम्भावना रहेको बताएका थिए ।

उनले प्रदेश सरकारसंग सहकार्य गर्दै कर्णाली प्रदेशमा प्रशिक्षक, रेफ्री र ग्रासरुटका कार्यक्रम सञ्चालन गर्न एन्फा तयार रहेको उल्लेख गरेका थिए ।

‘कर्णाली प्रदेशमा फुटबलको सम्भावना धेरै छ । प्रदेश सरकारसंग मिलेर प्रशिक्षक, रेफ्री र ग्रासरुटको कार्यक्रम तत्काल सुरु गर्न सकिन्छ ।’ शेर्पाले मुख्यमन्त्री शाहीलाई भने ।

एन्फा अध्यक्ष शेर्पाले कर्णाली प्रदेशको राजधानी सुर्खेतमा धेरै दर्शक अट्ने प्रदेश स्तरको रंगशाला बनाउन मुख्य मन्त्रीलाई सुझाव दिएका थिए ।

‘सुर्खेतमा दर्शक अट्ने प्रदेश स्तरको रंगशाला बनाउनुपर्छ । नवौं राष्ट्रिय खेलकुद पनि कर्णालीमा गर्नुपर्ने छ । बाहिरबाट राम्रो टिम आउने भएकाले पनि रंगशाला बनाउनुपर्छ ।’ शेर्पाले भनेका थिए ।

एन्फा अध्यक्ष शेर्पाले कर्णाली प्रदेशका अन्य जिल्लामा फुटबलको प्रशिक्षण केन्द्र सहित प्रशिक्षणका लागि आर्टिफिसियल टर्फ बनाउन मुख्यमन्त्रीलाई सुझाएका थिए ।

‘भौगोलिक अवस्थाका कारण कर्णाली प्रदेशका माथिल्ला भेगका जिल्लामा प्राकृतिक मैदान बनाउन कठिन छ । प्रशिक्षणका लागि आर्टिफिसियल मैदान बनाएर फुटबल गतिविधि अघि बढाउन सकिन्छ ।’ शेर्पाले भने ।

एन्फाले कर्णाली प्रदेशमा उमेर समूहका नियमित प्रतियोगिता सहित, ग्रासरुट, जिल्ला, स्कुल र क्लब स्तरीय प्रतियोगिता सञ्चालन गर्न मुख्यमन्त्रीलाई सुझाएको छ ।

मुख्यमन्त्री शाहीले एन्फाले योजना प्रस्ताव गरेपछि छलफल अघि बढाउन सहज हुने बताएका थिए । उनले एन्फाले बनाएको प्रस्तावलाई कर्णाली प्रदेशमै बसेर अन्तिम रुप दिने योजना सुनाएका थिए ।

मुख्यमन्त्री शाहीले एन्फा कम्प्लेक्समा रहेको आर्टिफिसियल टर्फको समेत अवलोकन गरेका थिए ।