बल खरिदको पैसा सिधै जिल्लाको खातामा

काठमाडौं । अखिल नेपाल फुटबल संघ (एन्फा)ले सदस्य जिल्लाले मासिक रुपमा प्राप्त गर्दै आएको बल खरिदका लागि सिधै जिल्ला फुटबल संघको खातामा रकम निकासा गर्न सुरु गरेको छ ।

यसअघि केन्द्रबाट जिल्ला फुटबल संघलाई मासिक रुपमा बल उपलब्ध गराउँदै आएको एन्फाले बल खरिदका लागि सदस्य जिल्लाको खातामा सिधै रकम निकासा गर्न सुरु गरेको हो ।

एन्फाले यसअघि सदस्य जिल्लालाई मासिक १० बल केन्द्रबाट पठाउँदै आएको थियो । केन्द्रले जिल्ला संघलाई बल खरिदका लागि अब सिधै रकमनै पठाउन लागेको हो ।

एन्फाले चालू आर्थिक वर्षबाट आफ्ना ४८ सदस्य जिल्लालाई दुई किस्तामा बल खरिदको बजेट निकाशा गर्ने बताएको छ ।

एन्फा प्रवक्ता किरण राईले पहिलो किस्ता वापतको ५० हजार रुपैयाँ सबै जिल्लामा निकासा गरिएको खेलपाटीलाई बताए ।

‘यसअघि हामीले मासिक खेल सामाग्री पठाउँदै आएका थियौं । चालू आर्थिक वर्षबाट बर्षमा १ लाख उपलब्ध गराउने भएका छौं ।’ प्रवक्ता राईले भने ।

‘एन्फाले बैज्ञानिक ढंगले रकमको बितरण गर्नेछ र त्यसलाई जिल्ला फुटबल संघले प्रयोग गर्नेछन् ।‘ प्रवक्ता राईले भने ।

उनले दोस्रो किस्ता वापतको रकम पनि चाँडै जिल्ला संघको खातामा निकासा गरिने जानकारी दिए ।

‘पहिलो किस्ताबापत ५० हजार निकाशा भैसकेको छ । दोस्रो किस्ता चाँडैनै उपलब्ध गराउने छौं ।’ राईले थपे ।

यसअघि एन्फाले प्रत्येक महिना जिल्ला संघलाई केन्द्रबाट मासिक १० थान बल उपलब्ध गराउँदै आएको थियो ।

कतिपय जिल्लाले सो बल समेत नपाएको गुनासो गर्दै आएका थिए ।

एन्फाले जिल्ला स्तरमा फुटबल गतिविधि तथा प्रतियोगिता सञ्चालन गर्नका लागि फुटबल किन्न निश्चित रकम सिधै जिल्लामा पठाउने कार्य सुरु गरेको हो ।

एन्फाले सबै जिल्लामा सञ्चालन गरेको ग्रासरुट कार्यक्रमका लागि छुट्टै रकम जिल्लामा पठाउने गरेको छ । एन्फाले विभिन्न शीर्षकमा झण्डै १० लाख रुपैयाँ वार्षिक रुपमा जिल्लामा निकासा गरिने बताएको छ ।

यसअघि एन्फाले कोरोना महामारीबाट प्रभावित जिल्ला फुटबल संघलाई ७५ हजारका दरले आर्थिक सहयोग गरेको थियो ।

एन्फाले जिल्ला फुटबल संघलाई ग्रासरुट सहित जिल्ला लिग तथा विभिन्न एन्फाका प्रतियोगिता सञ्चालनका लागि बजेट निकासा गर्दै आएको छ ।