काठमाडौं । राष्ट्रिय भलिबल टिमका सदस्य मान बहादुर श्रेष्ठ र दुर्गा महतोलाई व्यवसायी यम श्रेष्ठले प्रयोजन गरेका छन् ।
नवलपुर जिल्ला भलिबल संघका आर्थिक संयोजक समेत रहेका श्रेष्ठले दुई खेलाडीलाई मासिक प्रायोजन गरेका हुन् ।
पूर्व भलिबल खेलाडी समेत रहेका यमले ओपन स्पाईकर मान र दुर्गालाई जनही २ हजारका दरले मासिक प्रायोजन गरेका हुन् ।
यमले पहिलो महिना बापतको भत्ता दुबै खेलाडीलाई बुधबार हस्तान्तरण गरेका छन् ।
आर्थिक सहयोग गरेका यमले आफु पनि भलिबल खेलाडी रहेको र आफ्नो समयमा खेलाडीले प्रायोजन पाउने माहोल नभएको र आफु सक्षम भएपछि स्थानीय खेलाडीलाई प्रोत्साहन स्वरुप आर्थिक प्रायोजन गरेको बताए ।
‘म पनि पहिला राष्ट्रिय स्तर सम्मको प्रतियोगिता खेल्ने गरेको थियो । हामीलाई प्रायोजन गर्ने कोहि हुँदैन थिए । अब आफु सक्षम भएको छु । त्यसैले स्थानिय खेलाडीलाई सहयोग गरे,’ यमले खेलपाटीसँग भने ।
यमले दुबै खेलाडी सहित राष्ट्रिय टिममा स्थान बनाउने अन्य खेलाडीलाई समेत प्रोत्साहत स्वरुप राष्ट्रिय टिममा निरन्तर रहेसम्म मासिक प्रायोजन गर्ने बताए ।
'उहाँहरुलाई मात्रै हैन । नवलपुरबाट राष्ट्रिय टिममा रहने अन्य खेलाडीलिाई पनि राष्ट्रिय टिमबाट रहने समयसम्म निरन्तर प्रायोजन गर्छु ।’ यमले भने ।
मान र दुर्गा दुबै त्रिभुवन आर्मी क्लबमा आबद्ध छन् । मान आर्मी क्लबका पूर्व कप्तान तथा राष्ट्रिय भलिबल टिमका समेत पूर्व उपकप्तान हुन् ।
