पूर्वबक्सर शर्मालाई आर्थिक सहयोग

काठमाडौं । नेपाल बक्सिङ संघका सदस्य ओमनारायण श्रेष्ठले पूर्वबक्सर ओमप्रकाश शर्माको उपचारका लागि आर्थिक सहयोग गरेका छन् ।

विगत एक महिनादेखि प्यारालाइसिसबाट थलिएका शर्माको उपचारका लागि श्रेष्ठले ५० हजार रुपैयाँ सहयोग गरेका हुन् ।

बुधबार मरु गणेशस्थित शर्मा निवासमै पुगेर श्रेष्ठले आर्थिक सहयोग हस्तान्तरण गरेका हुन् ।

लामो समयदेखि उच्च रक्तचापबाट पीडित शर्मा एक महिना अघि प्यारालाइसिसबाट थलिएका छन् ।

वि.सं. २०३३ सालबाट बक्सिङ खेल्न थालेका शर्मा पाँच पटकका राष्ट्रिय च्याम्पियन हुन् । उनले भारतको मुम्बईमा भएको एसियन च्याम्पियनसिपलगायत विभिन्न अन्तर्राष्ट्रिय प्रतियोगितामा पनि सहभागिता जनाएका थिए ।

नेपाल बक्सिङ संघका सदस्य श्रेष्ठले पूर्वबक्सर शर्माको उपचारका लागि थप सहयोग जुटाउन अभियान सञ्चालन पनि सुरु गरिएको बताए ।

‘उहाँको उपचारका लागि साथीभाइसँग समन्वय गरिरहेका छौं ।’ उनले भने, ‘देश तथा विदेशबाट सहयोग संकलन भएपछि फेरि उहाँलाई हस्तान्तरण गर्ने छौं ।’

नेपाली बक्सिङको विकास र विस्तारमा लामो समयदेखि क्रियाशील श्रेष्ठले यसअघि पनि आपतविपद्मा परेका खेलाडी, प्रशिक्षक लगायतलाई सहयोग गर्दै आएका छन् ।

उनले केही महिना अघि आफ्नै निजी खर्चमा १३ औं सागमा सहभागी १६ खेलाडीसँगै प्रशिक्षक र रेफ्री जर्जको कोरोना बीमा गरिदिएका थिए ।