काठमाडौं । सन् २०३० को एसियाली खेलकुद प्रतियोगिता आयोजनामा दावी पेश गरेको कतारले खेलको आधिकारिक लोगो र नारा सार्वजनिक गरेको छ ।
सन् २०२२ को विश्वकप फुटबलको आयोजना गर्ने तयारी गरेकाे कतारले २०३० को २१ औं एसियाली खेलकुद प्रतियाेगिता राजधानी शहर दोहाले गर्ने दावी यसअघि नै गरिसकेको छ ।
दोहा २०३० आयोजक शहरको दावी कमिटीले त्यसको लोगो र नाराको अनावरण गरेको छ ।
कतार ओलम्पिक कमिटीका अध्यक्ष तथा दोहा २०३० एसियन गेम्स बिडिङ कमिटीका प्रमुख शेख जोन बिन हमाद बिन खालिफाले कतारी खेलाडी र समितिका प्रतिनिधिसँगै भर्चुअलरुममा आधिकारिक लोगो र नारा सार्वजनिक गरेका हुन् ।
एसियाली खेलकुदको नारा ’योर गेट वे’ राखिएको छ । लोगोले भने कतारको परम्परा, आधुनिकताको संयोजन र एसियाको स्थायी विरासतको साथ जादुयी खेलको आयोजना गर्ने प्रतिबद्धतालाई प्रतिबिम्बित गरेको जनाइएको छ।
कतारले पछिल्लो १५ वर्षमा विश्वका ठूला खेल प्रतियोगिताको सफल आयोजना गरिसकेको छ । यसअघि दोहाले सन् २००६ मा १५ औं संस्करणको एसियाली खेलकुदको आयोजना गरेको थियो ।
त्यसयता कतारमा एथलेटिक्स, ह्यान्डबल, जिम्न्यास्टिक्स जस्ता विश्व च्याम्पियनसिपको आयोजना भइसकेको छ ।
गत वर्ष आइएएएफ विश्व एथलेटिक्स च्याम्पियनसिपको आयोजना गरेको कतारले सन् २०२२ को विश्वकप फुटबल आयोजना गर्दैछ । विश्वकप फुटबलका निम्ति ठूला खेल पुर्वाधार निर्माण लगभग सम्पन्न गरिसकेको छ । कतारमा खेलकुद आयोजना गर्न अत्याधुनिक संरचनाहरु तयारी अवस्थामा छ ।
दावेदार आयोजकका प्रमुख कार्यकारी अधिकृत तथा कतार ओलम्पिक कमिटीका महासचिव जसिम रसिद अल ब्युनेनले भने, 'हामीसंग विश्वस्तरको खेल पूर्वाधार तयार छ । र हामीलाई विश्वास छ, एसियाली ओलम्पिक कमिटीका सदस्य तयार भएका खेल पूर्वाधारबाट प्रभावित हुनेछन् । फेरी हामीले विश्व स्तरिय प्रतियोगिताको आयोजना गरेर सफल आयोजकको उदाहरण पेश गर्दै आएका छौ।'
दोहाका साथै साउदी अरेवियाको रियाद शहरले पनि एसियाली खेलकुद २०३० को आयोजनाको दावी गरेको छ । अब ओलम्पिक काउन्सिल अफ एसिया ओसिएको नोभेम्बर ३० मा बस्ने साधारण सभाले आयोजक राष्ट्र छान्नेछ ।
