एजेन्सी । घरेलु टिम इंग्ल्यान्डले पाकिस्तानविरुद्धको दोस्रो टी-ट्वान्टी क्रिकेटमा जित निकालेको छ ।
म्यानचेस्टरमा आइतबार राति भएको खेलमा इंग्ल्यान्डले पाकिस्तानलाई ५ विकेटले हराएको हो ।
ओल्ड ट्राफोर्डमा पाकिस्तानले दिएको १ सय ९६ रनको लक्ष्य इंग्ल्यान्डले १९ ओभर १ बलमा मात्र ५ विकेट गुमाएर पुरा गर्यो ।
इंग्ल्यान्डको जितमा कप्तान इयान मोर्गनले ६६ रनको अर्धशतकीय इनिङ्स खेले । यस्तै डाविड मालनले अविजित रहदै ५४ रनको अर्धशतकीय इनिङ्स खेले ।
त्यसबाहेक इंग्ल्यान्डका जोनी बेयर्स्टोले ४४ तथा टम बानटनले २० रन बनाए ।
पाकिस्तानका शादब खानले ३ तथा हरिस राउफले २ विकेट लिए ।
यस अघि पहिले ब्याटिङ गरेको पाकिस्तानले २० ओभरमा ४ विकेट गुमाएर १ सय ९५ रन बनाएको थियो ।
पाकिस्तानको लागि मोहमद हाफिजले ६९ रनको अर्धशतकीय इनिङ्स खेल्दा कप्तान बाबर आजमले ५६ रनको इनिङ्स खेले ।
फकर जमानले ३६ रन बनाए । इंग्ल्यान्डका आदील राशिदले २ विकेट लिए । यस्तै क्रिस जोर्डन र टम करणको नाममा १/१ विकेट रह्यो ।
दोस्रो टी-ट्वान्टीमा जित निकालेसँगै तीन खेलको सिरिजमा इंग्ल्यान्डले १-० को अग्रता बनाएको छ ।
दुई टिमबीचको अन्तिम तथा तेस्रो खेल सेप्टेम्बर १ मा हुनेछ ।
पहिलो खेल भने वर्षाको कारण वासआउट भएको थियो ।
-1736575369.jpg)
-1736559847.jpg)
