नयाँ सुरुआत भर्सेस पुरानो तथ्यको टक्कर !

काठमाडौं। नेपाल प्रिमियर लिग (एनपिएल) सिजन–२ को पर्दा उठ्दै गर्दा लुम्बिनी लायन्सका लागि बिहीबारको खेल धेरै ठूलो अर्थ बोकेर आएको छ।

कीर्तिपुर त्रिवि क्रिकेट मैदानमा दिउँसो ४ बजे यो टोली गत सिजनको प्लेअफ टिम चितवन राइनोजसँग भिड्दैछन्। सिजनको पहिलो खेलमै आफ्नो मनोबल बढाउने कि पुरानै गल्ती दोहोर्याउने? लुम्बिनीको प्रारम्भिक दिशा यही खेलले निर्धारण गर्नेछ।

गत वर्ष लुम्बिनीको यात्रा सुरु देखिनै असहज रह्यो। लगातार चार खेलमा पराजय बेहोर्दै पुछारमा पुगेको टोलीले बीचतिर आएर एकपटक चितवनलाई पराजित गरेको थियो।

तापनि त्यो चमक लामो समय टिकेन। संयोग नै भनौं फेरि त्यही विपक्षी टोलीसँग पहिलो भेट जुरेको छ। लुम्बिनीका लागि तथ्यसँग भावनात्मक संयोग पनि मिलेको छ। किनकि गत सिजनमा हासिल गरेको पाँचौं खेलको उत्कृष्ट जित यही चितवनविरुद्ध आएको थियो।

यस खेलको केन्द्रमा रहने पात्र हुन्, कप्तान रोहित पौडेल। सिजन–१ मा चितवनविरुद्ध रोहितले देखाएको सर्वाङ्गीण प्रदर्शन अझै पनि टिमका समर्थकको मनसपटमा छ। ८० रन र चार विकेटको त्यो अविस्मरणीय योगदानले उनलाई चितवनविरुद्ध सबैभन्दा खतरनाक बनाएको थियो। यही कारण चितवन यसपटक रोहितलाई रोक्न विशेष रणनीतिसहित मैदानमा उत्रने अनुमान गरिएको छ।

लुम्बिनीको आशा पनि नयाँ सुरुआत पुरानै नायकका काधमा राख्दा परिणाम फेरि सकारात्मक रहनेमा छ। लुम्बिनीले यसपटक टिमको संरचनामा उल्लेख्य परिवर्तन गरेको छ। मुख्य प्रशिक्षक फेरिएर भारतका टिनु योहान्नन आएका छन्। उनले टोलीको रणनीतिक गहिराइ बढाएका छन्।

गत सिजनको कमजोर प्रदर्शनले टिम व्यवस्थापनलाई सतर्क बनाएको स्पष्ट छ। तयारीदेखि समायोजनसम्म कुनै पनि भाग हल्का राखिएको छैन। स्क्वाडमा पुराना खेलाडीले निरन्तरता पाए पनि अलराउन्डर विवेककुमार यादव यसपटक चोटका कारण अनुपस्थित छन्।

उनको स्थानमा सुमित महर्जन आएर रिक्तता भर्ने प्रयास छ। साथमा दिलीप नाथ, शेर मल्ल, विशाल पटेल, दुर्गेश गुप्ता र आदिल खानजस्ता नयाँ अनुबन्धले टिममा उत्साह थपेको छ।

विदेशी खेलाडीको कोटामा पनि लुम्बिनीले नयाँ संयोजनमा आशा राखेको देखिन्छ। डार्सी शर्ट, थोमस ड्राका, जोहानस जोनाथन स्मिथ र गुलबद्दिन नैब जस्ता विविध पृष्ठभूमिका खेलाडीहरूले टोलीलाई बढी लचक र विकल्प दिन सक्ने अपेक्षा गरिएको छ। कोटा ६ जनासम्म भए पनि चारमै सीमित रहनु टिमले छनोटमा गुणस्तरलाई संख्याभन्दा प्राथमिकता दिएको संकेत जस्तै देखिन्छ।

चितवन भने आफ्नो पहिलो खेल जितेर उत्कृष्ट रिदममा छ। रवी भोपाराको निरन्तरता, डेविड मिलानको स्थिरता र गत सिजनका सर्वोत्कृष्ट सेफ जैबको अन्तिम क्षणमा खेल पल्टाउने क्षमता यी तीन कारकहरू चितवनलाई फेरि बलियो पक्षमा उभ्याइरहेका छन्।

कर्णाली याक्सविरुद्धको जितले चितवनलाई मनोवैज्ञानिक फाइदा दिएको छ र लुम्बिनीविरुद्ध पनि उनीहरूको लक्ष्य सङ्गठित सुरुआतलाई निरन्तरता मात्र दिने हो।

अन्ततः यो खेल दुई टोलीको भिडन्तभन्दा बढी ‘नयाँ यात्रा भर्सेस पुरानो सम्झना’को टक्कर हुनेछ। लुम्बिनीका लागि यो सिजन पुनःपरिभाषा गर्ने मौका हो। यता, चितवनलाई आफ्नो स्थायित्व देखाउने प्लेटफर्म हो। अब कीर्तिपुरको फ्लड लाइटमुनि कुन पक्षले कथा बलियो बुन्छ यही उत्सुकताले बिहीबारको खेललाई विशेष बनाउने छ।