एसियन गेम्सको १३ औं दिन : अधिकांस खेलमा पराजय

काठमाडौं । इन्डोनेसियामा जारी १८ औं संस्करणको एसियन गेम्स अन्तर्गत १३  औं दिन बिहिबार नेपालको प्रदर्शन सम्झन लायक रहेन । बुधबार पहिलो पदकको रुपमा एक रजत जितेको नेपालले बिहिबार उक्त प्रदर्शन दोहोर्याउन सकेनन् ।

आधा दर्जन खेलमा प्रतिस्पर्धा गरेको नेपालले बिहिबार अधिकांस खेलमा पराजय बेहोर्यो । नेपालको एथलेटिक्समा चुनौती सकियो । आशा गरेको जुडोका अधिकांस खेलाडी पराजित भए । टेबल टेनिसमा मिश्रित नतिजा हात पार्यो ।

नेपालले एसियन गेम्सको १३ औं दिन पदक जित्न नसके पनि नेपालले पदक तालिकामा आफ्नो स्थान कायम राख्यो । नेपालको लागि जारी एसियन गेम्समा प्याराग्लाइडिङको क्रस कन्ट्रीको पुरुष टोलीले रजत दिलाएका थिए । उक्त एक पदकले नेपाल तालिकाको ३३ औं स्थानमा रहन सफल भएको छ । नेपालभन्दा तल अन्य चार राष्ट्र रहेका छन् ।

यता, चीनले आफ्नो शीर्ष स्थान यथावत राखेको छ । चीनले ११२ स्वर्णसहित कुल २४१ पदक जितेको छ । दोस्रो स्थान रहेको जापान ५९ स्वर्णसहित कुल १७४ पदक जितेको छ । ३९ स्वर्णसहित कुल १४९ पदक जितेको दक्षिण कोरिया तेस्रो स्थानमा रहेको छ ।

नेपालको १३ औं दिन कस्तो रह्यो ?

जुडो :

जुडोमा बिहीबार पनि नेपाली खेलाडी भएका छन् । जेसीसी प्लेनरी हलमा भएको महिलाको ५७ केजीमुनि भियतनामकी नुयेनले नेपालकी मनिता श्रेष्ठ प्रधान तथा ६३ केजीमुनि आयोजक इन्डोनसियाकी युली अदे्रल्ला फ्राडिभ्ताले नेपालकी फुपुल्हामु खत्रीलाई पराजित गरे । पुरुष ७३ केजीमुनि साउदी अरबका फहाद सुलैमान हमादले नेपालका सन्जित डंगोललाई हराए ।

शुक्रबार तीन खेलाडीले प्रतिस्पर्धा गर्नेछन् । पुरुष ९० केजीमुनि श्रीराम मकाजु र १०० केजीमुनि रविन श्रेष्ठ तथा महिला ७८ केजीमुनि पुनम श्रेष्ठले खेल्नेछन् ।

टेबलटेनिस :

जेआईई एक्सपो हल बीमा भइरहेको टेबलटेनिसको महिला सिंगल्समा नेपालकी नविता श्रेष्ठले मिश्रित प्रदर्शन गरेकी छन् । पहिलो चरणमा नविताले मकाउकी फेइ सुट तमलाई ११–८, ८–११, ३–११, ११–८, ७–११, ११–६ र ११–७ को सेटमा पराजित गरिन् । अर्कोमा नविताले हङकङकी केम होइ डुलाई ११–५, ११–१, ११–६ र ११–७ ले नतिजा सुम्पिइन् ।

महिला सिंगल्समै मंगोलियाकी दोलीजिन्जु बत्बयरले नेपालकी स्वेच्छा नेम्वाङलाई ११–९, १३–११, ११–६ र ११–६ को सोझो सेटमा हराइन् ।

पुरुष सिंगल्समा मंगोलियाका इर्डेनबयर चिन्बाटले नेपालका अमरलाल मल्ललाई ११–८, ९–११, ६–११, ११–८, ८–११, ११–२ र ११–५ तथा मकाउका छेन चि छियोङले नेपालका श्यान्टु श्रेष्ठलाई १२–१०, ११–८, ११–९, ७–११, ५–११ र ११–८ को सेटमा पन्छाए । बिहीबारको खेलसंगै टेबलटेनिसमा नेपालको चुनौती समाप्त भएको छ ।

सेपाकताक्रो :

सेपाकताक्रोको पुरुष क्वाड स्पर्धामा नेपालले पाकिस्तानलाई २–० को सोझो सेटमा पराजित गरेको छ । नेपाल २१–१६ र २१–८ ले विजयी भयो । इरानसंग भने नेपाल २–० ले पछि पर्यो । नेपालबाट गोविन्द मगर, रविन भट्टराई, रुपेश सुनार र सन्जित धिमालले प्रतिस्पर्धा गरेका थिए ।

भलिबल :

पुरुष भलिबलमा नेपाल श्रीलंकासंग ३–१ ले पराजित भएको छ । १३ औं देखि १६ औं वरियाता निर्धारण गर्न भएको खेलमा श्रीलंकाले नेपाललाई २३–२५, २५–१६, २६–२४ र २५–२१ को सोझो सेटमा हरायो । अब नेपालले १४÷१५ स्थानका लागि भियतनाम र किर्गिस्तानबीचको विजेतासंग शुक्रबार प्रतिस्पर्धा गर्नेछ ।

एथलेटिक्स :

नेपालकी सरस्वती चौधरीले महिला १ हजार ५ सय मिटर दौडमा १४ औं स्थान हासिल गरेकी छन् । सरस्वतीले निर्धारित दूरी ४ मिनेट ३४.२६ सेकेन्डमा पूरा गरिन् ।