एजेन्सी । अखिल नेपाल फुटबल संघ (एन्फा)ले आपतकालिन बैठक भोलि (सोमबार)लाई बोलाएको छ ।
कार्यसमिति बैठक सम्पन्न भएको दुई साता पनि नबित्दै एन्फाले आपतकालिन बैठक आह्वान गरेको हो ।
बैठक ललितपुरस्थित एन्फा कम्प्लेक्स सातदोबाटोमा दिउँसो १ बजे बस्नेछ ।
एन्फा महासचिव इन्द्रमान तुलाधरका अनुसार बैठकका लागि ४ एजेण्डा तय गरिएकाे छ ।
पहिलो एजेण्डा एन्फाको मानार्थ अध्यक्षको बिषयमा रहेको छ । यस्तै, दोस्रो कोरोना राहतको बिषय, तेस्रो भक्तपुर जिल्ला फुटबल संघको बिषय र चौथो एजेण्डा विविध अन्तर्गत रहेकाे महासचिव तुलाधरले खेलपाटीलाई जानकारी दिए ।
एन्फाले मानार्थ अध्यक्षमा टासी घलेलाई पुन नियुक्त गर्ने तयारी गरेको छ । आन्तरिक विवाद बढ्दै गएपछि वर्तमान कार्यसमितिले घलेको मानार्थ पद खारेज गरिदिएको थियो ।
यस्तै, बैठकले भक्तपुर जिल्ला फुटबल संघको बिषयमा समेत आवश्यक निर्णय गर्ने तयारी गरेको छ । वर्तमान नेतृत्वबिरुद्धका कृयाकलापमा संलग्न भएको आरोपमा एन्फाले भक्तपुर जिल्ला फुटबल संघलाई स्पष्टिकरण समेत सोधेको थियो । त्यही आधारमा बैठकले भक्तपुर जिल्ला फुटबल संघमाथि कारबाही गर्ने सम्बन्धमा औपचारिक निर्णय सम्भावना रहेको छ ।
एन्फाको सचिवालय बैठकले यसअघि ललितपुर जिल्ला फुटबल संघका अध्यक्ष पुरुषोत्तम थापालाई स्पष्टिकरण सोध्दै निलम्बनको निर्णय गरेको थियो । दुई हप्ता अघि बसेको एन्फा कार्यसमिति बैठकले थापामाथि गरिएको कारबाहीको निर्णयलाई औपचारिक अनुमोदन गरेको थियो ।
यस्तै, एन्फाले कोरोनाबाट प्रभावित बनेका आफुसंग आबद्ध सबै जिल्ला फुटबल संघ, क्लब र संघलाई समान ७५ हजार रुपैयाँका दरले राहत वितरण गर्ने तयारी गरेको छ । सोमबारको बैठकले सो सम्बन्धमा औपचारिक निर्णय गर्ने बताईएको छ ।
एन्फा विधानले तत्काल सुल्झाउनुपर्ने विवादहरुको निरुपणका लागि ५ सदस्यीय आपतकालिन समितिको व्यवस्था गरेको छ ।
एन्फाले गठन गरेको आपतकालिन समितिमा एन्फा अध्यक्ष कर्माछिरिङ शेर्पा, वरिष्ठ उपाध्यक्ष पंकज बिक्रम नेम्वाङ्ग, उपाध्यक्षत्रय कृण्ण थापा, विरबहादुर खड्का र उपेन्द्रमान सिंह रहेका छन् ।
बैठकले गरेका निर्णय तत्काल कार्यसमिति सदस्यलाई जानकारी गराउनुपर्ने र निर्णय कार्यसमिति बैठकबाट पास गराउनुपर्ने प्रावधान रहेको छ ।
कार्यसमिति बैठकबाट निर्णय पास नभएको अवस्थामा आपतकालिन बैठकका निर्णय निष्प्रभावी बन्नेछन् ।
बैठकका लागि चार जना सदस्यको अनिवार्य उपस्थिती हुनुपर्नेछ । र मत विभाजनमा बराबरीको अवस्था आएमा अध्यक्षले अन्तिममा मताधिकारको प्रयोग गर्न सक्नेछन् ।
