काठमाडौं । अखिल नेपाल फुटबल संघ (एन्फा)ले फुटबल संघको मानार्थ अध्यक्षमा टासी घलेलाई फर्काउने तयारी गरेको छ । वर्तमान एन्फा नेतृत्वबिरुद्ध गतिविधि गरेको आरोपमा मनार्थ अध्यक्ष पदबाट हटाईएका घलेलाई एन्फाले पुन सोही पदमा नियुक्त गर्ने तयारी गरेको हो ।
टासीलाई मानार्थ अध्यक्षमा फिर्ता गराउने योजना अनुसार एन्फाले सोमबार आकस्मिक बैठक बोलाएको छ । सोही बैठकले टासीलाई मानार्थ पदमा पुन नियुक्त गर्ने तयारी गरेको एन्फा स्रोतले खेलपाटीलाई बताएको छ ।
२०७५ साल माघ ३ गते बसेको एन्फा कार्यसमिति बैठकले संघको मानार्थ अध्यक्ष पद खारेज गरेको छ । घलेलाई लक्षित गर्दै एन्फा कार्यसमिति बैठकले मानार्थ पदक खारेज गर्ने निर्णय गरेको थियो ।
कर्माछिरिङ शेर्पालाई अध्यक्षमा जिताउन नेतृत्व गरेका टासी र एन्फा नेतृत्वबीच पहिलो कार्यसमिति बैठकबाटै कित्ताकाट सुरु भएको थियो ।
एन्फाको अन्तराष्ट्रिय विभाग प्रमुखमा टासीको दाबी थियो । तर एन्फा अध्यक्ष शेर्पाले नविन पाण्डेलाई सो पदमा नियुक्त गरेपछि टासी एन्फा अध्यक्ष शेर्पासंग टाढिएका थिए ।
लगत्तै एन्फा निर्वाचनमा ब्यापक आर्थिक अनियमितता भएको अडियो टेप चार जिल्ला फुटबल संघले सार्वजनीक गरेका थिए । सो अडियो टेप टासीको संलग्नतामा सार्वजनीक भएको एन्फाकाे ठहर थियाे । आफुबिरुद्ध गतिविधिमा सक्रिय रहेको देखिएपछि शेर्पाले कार्यसमिति बैठकमार्फत टासीको मानार्थ पदक खारेज गरिदिएका थिए ।
एन्फाको निर्णयबिरुद्ध टासीले अदालतमा मानार्थ पद खारेज गर्न नमिल्ने दलील सहित अन्तरिम आदेश माग गरेका थिए । तर अदालतले टासीको पक्षमा फैसला नगरेपछि उनले विभिन्न सुत्रमार्फत एन्फा फर्कने वातावरण मिलाईरहेका थिए ।
राष्ट्रिय खेलकुद परिषद् (राखेप)को सदस्य सचिवमा रमेश सिलवाल आएपछि टासीले पुन एन्फा छिर्ने प्रयास सुरु गरेका थिए । आफुलाई एन्फामा पुर्नस्थापना गर्न माग गर्दै राजनीतिक लबिङ तिव्र बनाएका टासीले सदस्य सचिवलाई समेत पहल गरिदिन आग्रह गरेका थिए ।
सदस्य सचिव सिलवालकै अग्रसरतामा टासी पुन एन्फा फर्कन लागेका हुन् । सिलवालकै जोडमा एन्फाले आकस्मिक बैठक बोलाएर टासीलाई मानार्थ अध्यक्षमा पुन नियुक्त गर्न लागेको हो ।
एन्फा अध्यक्ष शेर्पाले गल्ती स्विकार गर्दै टासीले आगामी दिनमा समेत समस्या नपार्ने शर्तमा मात्र फुटबल संघमा फर्काउन सकिने बताउदै आएका थिए ।
टासीको जिम्मेवारी आफुले लिने शर्तमा सदस्य सचिव सिलवाले पुन मानार्थ पदमा उनलाई एन्फा फर्काउन शेर्पालाई राजी बनाएका हुन् ।
