को हो एन्फा भित्रको धमिरा ?

काठमाडौं । अखिल नेपाल फुटबल संघ (एन्फा)को गण्डकी प्रदेश अन्तर्गतका ८ सदस्य जिल्लाले नेतृत्वलाई काम गर्न नदिने षडयन्त्रमा एन्फाभित्रका केही ब्यक्ति लागेको आरोप लगाएका छन् ।

बुधबार एक बिज्ञप्ती जारी गर्दै ८ जिल्ला फुटबल संघले ग्रासरुटको बिषयमा एन्फा अध्यक्ष कर्माछिरिङ शेर्पाले दिएको अभिब्यक्तिलाई अतिरञ्जित र तोडमोड गरि नेतृत्वलाई काम गर्न नदिएर फुटबल विकासलाई कमजोर पार्न एन्फा भित्रकै ब्यक्ति लागेको आरोप लगाएका हुन् ।

उनीहरुले त्यस्ता ब्यक्तिलाई अनुशासनको कारबाहीको दायरमा ल्याउन र त्यस प्रकारका ब्यक्तिको विरुद्धमा एकजुट हुन माग समेत गरेका छन् ।

एन्फा अध्यक्षको अन्तरवार्ता विवादास्पद बनेपछि वरिष्ठ उपाध्यक्ष पंकज बिक्रम नेम्वाङ्गले शेर्पालाई राजीनामा दिएर अनुसन्धानमा सहयोग गर्न माग गरेका थिए । उनले सोही बिषयमा फुटबलको सर्वोच्च निकाय फिफामा उजुरी समेत गरेका थिए । साथै शेर्पाको अभिब्यक्तीलाई लिएर कार्यसमिति सदस्य दावा लामाले राजीनामा माग गरेका थिए ।

एन्फामा चर्किलो शक्ति संघर्षका बीच ८ जिल्ला अध्यक्षले बिज्ञप्ती जारी गर्दै अध्यक्ष शेर्पाको समर्थन गरेका हुन् ।

साथै, उनीहरुले खेलकुद मन्त्रीलाई १७ करोड रुपैयाँ एन्फाले दिएको आरोप लगाउने सांसद प्रदीप यादवको राजीनामा माग गरेका छन् ।

सदस्य ८ जिल्लाले बिषम परिस्थतिमा एन्फा भित्र र बाहिरका धमिराले फुटबल विकास बिरोधी खेल खेल्न सुरु गरेको महशुश आफुलाई भएको जनाएका छन् ।

बैठकले अधिवेशनले म्यान्डेड दिएको अवधिसम्म कार्य गर्ने वातावरण बनाउन र सहयोग गर्न सबैमा अपिल गरेको छ ।

एन्फाको वर्तमान नेतृत्वको काम कारबाहीप्रति भक्तपुर, काठमाडौं, ललितपुर र धादिङ जिल्ला फुटबल संघ सहित एन्फाका पूर्व अध्यक्ष गणेश थापाले विरोध गर्दै आएका छन् ।

बैठकले जिल्ला फुटबल संघलाई विभिन्न प्रतियोगिता लगायत सचिवालय सञ्चालनका लागि एकमुष्ट रुपमा १० लाख र खेलकुद सामाग्री खरिदका लागि १ लाख उपलब्ध गराउने एन्फाको निर्णयको स्वागत गरेका छन् ।

साथै कोरोनाबाट प्रभावित सम्पूर्ण जिल्ला फुटबल संघलाई समान ७५ हजार रुपैयाँका दरले सहयोग दिने निर्णय र पोखरामा डिम प्राजेक्टको रुपमा बहुउद्धेश्यीय फुटबल ट्रेनिङ सेन्टर बनाउने एन्फा कार्यसमिति निर्णयको स्वागत गरेका छन् ।

उनीहरुले 'ड्रिम प्राजेक्ट' अन्तर्गत गण्डकी प्रदेशलाई छनोट गरि निर्णय प्रक्रियालाई अगाडी बढाउने कार्यलाई केही ब्यक्तिले गलत मनसाय राखी मिडियाबाजी गरि भ्रम सिर्जना गरेको भन्दै ध्यानकर्षण भएको बताएका छन् ।

बिज्ञप्तीमा एन्फाका केन्द्रिय उपाध्यक्ष कृण्ण थापा सहित सहायक महाचिव विश्व पौडेल, तनहु जिल्ला फुटबल संघका अध्यक्ष रत्नकुमार श्रेष्ठ, केन्द्रिय सदस्य एल वि ज्यारचन, कास्की जिल्ला फुटबल संघका अध्यक्ष मिलन गुरुङ, गोरखा जिल्ला फुटबल संघका अध्यक्ष दिपेन्द्र श्रेष्ठ, मनाङ जिल्ला फुटबल संघका अध्यक्ष निरज गुरुङ, लमजुङ जिल्ला फुटबल संघका अध्यक्ष लोकेन्द्र गुरुङ, बाग्लुङ जिल्ला फुटबल संघका अध्यक्ष रामराज गुरुङ, स्याङ्जा जिल्ला फुटबल संघका अध्यक्ष मुक्त राना, नवलपुर जिल्ला फुटबल संघका अध्यक्ष सेतबहादुर पुनले हस्ताक्षर गरेका छन् ।