एजेन्सी । अमेरिकी प्रहरीको नियन्त्रणमा एक अश्वेत नागरिक जर्ज फ्लोयडको मृत्युपछि अमेरिकामा रंगभेदी व्यवहारविरुद्धको आन्दोलन चर्किएको छ ।
मिनियापोलिस शहरमा दुई साता अघि प्रहरीको नियन्त्रणमा रहेको बेला फ्लोयडको मृत्यु भएको थियो । प्रहरी अधिकारीले भुइमा लडेका ४६ वर्षीय फ्लोयडको घाँटीमा लामो समय थिचेपछि उनको मृत्यु भएको थियो ।
फ्लोयडको मृत्युपछि काला जातिका मानिसलाई प्रहरीले घाँटी थिचेर मारेको भन्दै अमेरिकामा आन्दोलन चर्किएको हो । अमेरिकामा आन्दोलनले हिंसात्मक रुप लिएको छ ।
काला जातिले बाच्न पाउनु पर्ने भन्दै विश्वभर विरोध भईरहेको छ । फ्लोयडविरुद्ध भएको अन्यायको विरोधमा विश्वभर 'ब्लाक लाइभ्स म्याटर' आन्दोलन चलिरहेको छ ।
यस आन्दोलनमा जर्मन बुन्डेसलिगा क्लबहरुले समेत ऐक्यबद्धता जनाएका छन् । सुरुवातमा केहि खेलाडीले आन्दोलनमा ऐक्यबद्धता जनाएका थिए । पछिल्लो समय भने बुन्डेसलिगाका अधिकांस क्लब 'ब्लाक लाइभ्स म्याटर' आन्दोलनमा होमिएको छ ।
बुन्डेसलिगा अन्तर्गत शनिबार भएको पाँच खेल दौरान क्लबका खेलाडीले मैदानमा सांकेतिक विरोध जनाएका थिए ।
लिग लिडर बायर्न म्युनिखले बायार लेवरकुसनविरुद्ध ४-२ को जित निकाल्दा बायर्नका खेलाडीले 'रेड अगेन्ट्स रेसिजम' लेखिएको टिसर्ट लगाएका थिए ।
यस्तै बायर्नका खेलाडीले 'ब्लाक लाइभ्स म्याटर' लेखिएको आर्मब्याण्ड लगाएका थिए ।
बोरुसिया डर्टमण्ड र हेर्था बर्लिनका खेलाडीले खेल अघि संयुक्त रुपमा गोलो घेरा बनाएर घुँडा टेकेर सांकेतिक विरोध गरेका थिए ।
बर्लिनविरुद्ध १-० गोल अन्तरको जित निकालेको त्यस खेलमा डर्टमण्डका खेलाडीले 'नो पिस,नो जस्टिस', 'युनाइटेड टुगेदर' लेखिएको टिसर्ट लगाएका थिए ।
माइन्जका स्ट्राइकर पिएर कुण्डेले आइनट्राख्ट फ्रान्कफुर्टविरुद्ध गोल गरेपछि घुँडा टेकेर विरोध जनाएका थिए ।
विश्व फुटबलको सर्वोच्च संस्था फिफाले समेत यस आन्दोलनमा ऐक्यबद्धता जनाएको थियो । फिफाले रंगभेदी व्यवहारलाई आफ्नो संस्थाले कुनै पनि हालतमा स्वीकार नगर्ने समेत बताएको छ ।
यस अघि इंग्लिस क्लब लिभरपुल, चेल्सी लगायतका खेलाडीले समेत घुँडा टेकेर सांकेतिक विरोध जनाएका थिए ।
त्यस्तै बास्केटबल लिजेण्ड माइकल जोर्डनले अमेरिकामा सामाजिक न्याय र समानताका लागि भन्दै रंगभेदी व्यवहारविरुद्ध लडिरहेको संस्थालाई १० करोड डलर सहयोग गर्ने घोषणा गरेका छन् ।
-1734879364.jpg)
-1734875597.jpg)
