विराज न्यौपाने ।
एजेन्सी । सन् १९९८, फ्रान्सले १६ औं संस्करणको विश्वकप फुटबलको आयोजना गरेको थियो ।
घरेलु मैदानमा साविक विजेता ब्राजिललाई ३-० गोल अन्तरले पराजित गर्दै फ्रान्स पहिलो पटक विश्व च्याम्पियन बनेको थियो ।
फ्रान्स विश्वकपमा फुटबल प्रेमीका लागि केहि सम्झनलायक र केहि बिर्सनलायक घटना घटे ।
साविक उपविजेता इटाली पहिलो चरणबाटै घर फर्कियो । इरानले अमेरिकालाई २-० ले स्तब्ध बनायो ।
त्यस समयका ब्राजिलियन स्टार रोनाल्डो फाइनलमा चल्न सकेनन् । उनले थुप्रै आरोप खेप्नु पर्यो ।
फ्रान्स विश्वकपमै अर्को घटनाले चर्चा पाएको थियो । इंग्ल्यान्डका स्टार डेभिड बेकह्यामको रातो कार्ड ।
शनिबार अर्थात् मे २ का दिन बेकह्यामले आफ्नो ४५ औं जन्मदिन मनाए । उनले जन्मदिन मनाईरहदा विश्व फुटबलले पुन: एक पटक बेकह्यामको फुटबल यात्रालाई सम्झिएका छन् ।
फ्रान्स विश्वकपको प्रि- क्वाटरफाइनलमा इंग्ल्यान्ड अर्जेन्टिनाको हातबाट टाइब्रेकरमा पराजित भएको थियो । जुन खेलमा बेकह्यामले रातो कार्ड पाएका थिए ।
३० जुन १९९८, प्रि-क्वाटरफाइनल खेल अतिरिक्त समयको खेल चलिरहदा स्कोर बोर्डमा २-२ गोलको बराबरी थियो ।
अर्जेन्टिनाका डिएगो सिमोनले बेकह्यामलाई फउल गर्न पुगे । तर, बेकह्यामले आफ्नो प्रतिक्रिया जनाईहाले ।
सिमोनको फउलको कारण मैदानमा लडेका बेकह्यामले लडेकै अवस्थामा सिमोनलाई लात्तीले हिर्काएका थिए । जसको कारण रेफ्रीले सिमोनलाई पहेलो कार्ड दिए । तर, बेकह्यामलाई रातो कार्ड देखाउँदै मैदानबाहिर पठाए ।
निर्धारित समय २-२ गोलको बराबरी सकिएपछि खेल टाइब्रेकरमा गयो । टाइब्रेकरमा अर्जेन्टिनाले ४-३ ले आफ्नो बनाउँदै क्वाटरफाइनलको यात्रा तय गर्यो ।
विश्वकपबाट बाहिरिएपछि आक्रोशित इंग्ल्यान्ड समर्थकले बेकह्यामको तस्बिर र जर्सी जलाए । उनलाई ज्यान मार्ने धम्की दिए । किनकी समर्थकले अर्जेन्टिनासँगको हारको मुख्य कारण बेकह्याम र उनको रातो कार्डलाई ठानेका थिए ।
विश्वकपपछि मिडफिल्डर बेकह्याम खलनायक बनेका थिए । इंग्लिस मिडियाले समेत उनको निकै आलोचना गरेका थिए ।
डेलीमेलले आफ्नो पत्रिकामा बेकह्यामको तस्बिर राखेर – ‘१० हिरोईक लायन्स, १ स्टुपिट बोई’ भनेर क्याप्सन प्रकाशित गरेको थियो ।
३ मार्च १९९९ ।
च्याम्पियन्स लिग क्वाटरफाइनलको दोस्रो लेग खेल थियो । बेकह्याम रहेको म्यानचेस्टर युनाइटेडले सिमोन रहेको इन्टर मिलानसँग खेल्दै थियो ।
धेरैलाई यस खेलले ६ महिना अघिको विश्वकपको झल्को दिलाएको थियो ।
ड्वाइट योर्केको दुई गोलसँगै युनाइटेडले २-० गोल अन्तरको सहज जित निकाल्यो । पहिलो लेग १-१ गोलको बराबरीमा सकिएको क्वाटरफाइनलमा युनाइटेडले समग्रमा ३-१ को जित निकालेको थियो ।
युनाइटेडको जितमा नायकको भूमिका खेले बेकह्यामले । दुवै गोलका लागि उनको सुन्दर पास थियो । उनले समर्थकसामु आफु उत्कृष्ट रहेको प्रमाणित गरे ।
युनाइटेड समर्थकका लागि नायक बनेपनि इंग्लिस समर्थकको लागि उनी अझै आलोचित नै रहे ।
सन् २००१, अक्टोबर ६ ।
एक वर्षपछि २००२ मा आयोजना हुने विश्वकपको छनोट खेल चलिरहेको थियो ।
समूह-९ मा रहेको इंग्ल्यान्डले घरेलु मैदानमा ग्रिसको सामना गर्दै थियो । इंग्ल्यान्डको कप्तानी उनै बेकह्यामले गरिरहेका थिए ।
इंग्ल्यान्डलाई विश्वकपमा पुग्न बराबरी वा जितको आवश्यकता थियो । तर, ओल्ड ट्राफोर्डमा खेल अन्तिम समयतर्फ धकेलिरहदा स्कोर बोर्डमा ग्रिस २-१ ले अघि थियो ।
खेलको इन्जुरी समयमा इंग्ल्यान्डले डिबक्स बाहिरबाट फ्रिकिकको मौका पायो । फ्रिकिक प्रहारको जिम्मा कप्तान बेकह्यामले लिए ।
बेकह्यामको उत्कृष्ट फ्रिकिक बलले बाँया कर्नरतर्फको जाली चुम्दा इंग्ल्यान्ड सन् २००२ को विश्वकपमा छनोट भयो । उनको कलात्मक फ्रिकिक रोक्न ग्रिसका गोलकिपरले कुनै मौका नै पाएनन् ।
त्यसअघि ग्रिसमा भएको पहिलो लेग खेलमा २-० को जित निकाल्दा बेकह्यामले एक गोल गरेका थिए ।
सन् २००२ को विश्वकप जापान र दक्षिण कोरियाले संयुक्त आयोजना गरेको थियो ।
उक्त विश्वकपमा इंग्ल्यान्ड र अर्जेन्टिना एकै समूहमा परेका थिए । समूह एफमा इंग्ल्यान्ड र अर्जेन्टिनासँगै स्विडेन र नाइजेरिया रहेको थियो ।
जुन ७ का दिन सापोरो स्टेडियममा इंग्ल्यान्ड र अर्जेन्टिनाको खेल थियो । इंग्ल्यान्डको कप्तानी बेकह्यामले गरिरहेका थिए ।
नकआउट चरणमा पुग्न दुवै टोलीलाई जित्नै पर्ने दबाब थियो । प्रतिस्पर्धात्मक खेलको ४४ औं मिनेटमा इंग्ल्यान्डले पेनाल्टी प्राप्त गर्यो ।
अर्जेन्टिनाका माउरिसियो पोचेटिनोले माईकल ओवेनलाई पेनाल्टी क्षेत्रभित्र लडाएपछि इंग्ल्यान्डले पेनाल्टीको मौका पाएको थियो ।
पेनाल्टीमा बेकह्यामले गोल गर्दै इंग्ल्यान्डलाई १-० को जित दिलाए ।
साँघुरो जितले इंग्ल्यान्ड विश्वकपको नकआउट चरणमा पुग्यो । अर्जेन्टिना भने समूह चरणबाट बाहिरियो ।
बेकह्यामको नायकत्वसँगै इंग्ल्यान्डले अर्जेन्टिनासँग १९९८ को विश्वकपमा व्यहोरेको बदला समेत लियो ।
अर्जेन्टिनासँगकै खेलबाट खलनायक बनेका बेकह्याम चार वर्षपछि अर्जेन्टिनासँगको खेलबाटै इंग्ल्यान्ड समर्थकका लागि नायक चुनिए ।
-एजेन्सीको सहयोगमा
-1734879364.jpg)
-1734875597.jpg)
