ठुला खेलाडीनै क्लब विहीन

काठमाडौं । महामारीको रुपमा विश्वभर फैलिएको कोरोना भाईरसको प्रत्यक्ष असर नेपालका फुटबल खेलाडीमा समेत देखिएको छ ।

कोरोनाको संक्रमण फैलन नदिन मुलुक लकडाउनमा छ । सबै फुटबल गतिविधि अनिश्चित रुपमा स्थगित छन् ।

खेल गतिविधि बन्द भएपछि खेलाडीलाई मनोबैज्ञानिक असर मात्र परेको छैन, आर्थिक अभावले समेत गिजोलेको छ । कोरोनाको प्रत्यक्ष असर घरेलु फुटबलका ठुला खेलाडीमा देखिएको छ ।

शीर्ष डिभिजनका लिग खेल्ने धेरै खेलाडीको क्लबसँगको सम्झौता सकिएको छ । राष्ट्रिय टिममा रहेका अधिकांश खेलाडीको क्लबसँगको सम्झौता सकिएको जानकारी प्राप्त भएको छ । खेलाडीहरु क्लब विहीन जस्तै भएका छन् ।

अर्को क्लबमा जान खेलाडीले जेठ मसान्तसम्मै कुर्नपर्नेछ । कारण अखिल नेपाल फुटबल संघ (एन्फा)ले जेठ मसान्तसम्म खेलाडी एउटै क्लबबाट खेल्नुपर्ने नियम बनाएको छ । जसका कारण लिग सकिएपनि खेलाडीले अन्य क्लबबाट मोफसल खेल्न पाएनन् ।

एन्फाको नयाँ नियमका कारण गत महिना अभिषेक रिजालले मनाङबाट मोफसलबाट खेल्न पाएनन् । उनले लिगका केही खेल मछिन्द्रबाट खेलेका थिए । लगत्तै उनी माल्दिभ्सको दोस्रो डिभिजनको लिग खेल्न गएका थिए । त्यस्तै, मनाङले आफ्ना पूर्व खेलाडी आफिज ओलावालेलाई क्लबमा अनुबन्ध गरेपनि मोफसलका प्रतियोगिता खेलाउन पाएको थिएन ।

एन्फाको नयाँ नियम र क्लबसँग हुने सम्झौता बेग्ला–बेग्लै हुँदा लिग च्याम्पियन मछिन्द्र, मनाङ मर्स्याङ्दी क्लब र संकटा क्लबका खेलाडी क्लब विहीन भएका हुन् । एन्फाले खेलाडी अनुबन्धको सम्झौता जेठ मसान्तसम्मको हुनुपर्ने बताएपनि धेरै क्लबले खेलाडीसंग चैत मसान्तसम्म मात्र सम्झौता गरेका छन् ।

राष्ट्रिय टिममा खेलाडीसँग गरिएको कुराकानीमा अधिकांश खेलाडीले क्लबसँगको सम्झौता सकिएको अवस्थामा रहेको खेलपाटीलाई बताए । राष्ट्रिय टिममा रहेका खेलाडी मध्य मछिन्द्र क्लबमा ६, पुलिस, च्यासल, आर्मी, थ्रीस्टारमा समान ३–३ खेलाडी रहेका छन् ।

यस्तै संकटा र मनाङबाट २ खेलाडी रहँदा रोहित चन्द र किरण लिम्बुले विदेशी लिग खेलिरहेका छन् । विभागका खेलाडी भने नियमित जागिरमै छन् ।

‘सुरुमा लिगका लागि मात्रै खेलाडीसँग सम्झौता गरेको थियौं । लिग च्याम्पियन पनि भयौं । त्यसपछि खेलाडीसंग चैतसम्मको सम्झौता थियो ।’ लिग विजेता मछिन्द्र क्लबका म्यानेजर अनिल श्रेष्ठले भने, ‘हामीले मोफसल पनि खेल्यौं । कोरोनाले धेरै खेल रोकिए । चैतमा खेलाडीसंगको सम्झौता सकिएको हो ।’

उनले सम्झौता सकिएपनि राष्ट्रिय लिगका लागि खेलाडीसंग सम्झौता थप गर्ने तयारी गरिएको बताए । उनले नयाँ सम्झौता एन्फाले ल्याउने कार्यक्रम अनुसार थप्ने बताए ।

‘राष्ट्रिय लिग हुने कुरा थियो । अव कोरोना कहिलेसम्म रहन्छ । एन्फाले ल्याउने कार्यक्रम अनुसार खेलाडीसंग सम्झौता गछौं ।’ उनले भने ।

घरेलु फुटबलको सफल क्लब मनाङमा समेत धेरै खेलाडीको सम्झौता सकिएको छ । मनाङले समेत एन्फाको कार्यक्रम अनुसार सम्झौता सकिएका खेलाडीसंग समन्व्य गर्ने बताएको छ ।

‘केहि खेलाडीको सम्झौता अझै छ । अधिकांशको सकिसकेको छ । अब कोरोनासँगै एन्फाको क्यालेन्डर अनुसार चल्छौ । खेलाडीसँगको समन्वयमा नयाँ सम्झौता गछौं ।’ मनाङ मस्र्याङ्दीका अध्यक्ष छिमि उर्गेन गुरुङले भने ।

शीर्ष ६ मा नपरेपनि च्यासल युथ क्लबले आफ्नो खेलाडीलाई तलब उपलब्ध गराएको बताएको छ । अर्को ए डिभिजन क्लब ब्रिगेड ब्वाईजले यस अघिनै आफ्ना खेलाडीहरुलाई बिदा गरिसकेको छ ।

शीर्ष ६ मा पर्दै राष्ट्रिय लिगमा स्थान सुरक्षित जावलाखेलले सम्झौता अनुसार खेलाडीलाई तलब दिईरहेको छ ।