लकडाउन खुलेपछि भलिबल खेलाडीको योजना कस्तो ?

काठमाडौं । विश्वभर महामारीको रुपमा फैलिएको कोरोना भाईरसको संक्रमणबाट जोगाउन सरकारले विगत १ महिनायता लकडाउन लगाएको छ ।

शनिबार मात्र सरकारले लकडाउनको अवधि थप्दै वैशाख २५ गतेसम्म थप गरेको छ ।

कोरोनाको संक्रमण फैलिन नदिन गरिएको लकडाउनको कारण मानिसहरू अत्यावश्यकबाहेक अन्य कामका लागि बाहिर निस्किन पाएका छैनन् ।

लकडाउनका कारण नेपाली खेलकुद क्षेत्र समेत ठप्प रहेको छ । व्यक्तिगत सुरक्षा र जनस्वास्थ्यका लागि खेलाडीहरु पनि घरभित्र बसिरहेका छन् ।

दैनिक मैदानमा देखिने खेलाडीहरुको दैनिकी फेरिएको छ । दैनिकी घरभित्र सिमित हुँदा खेलाडीहरु अभ्यास गर्न र खेल्न नपाएर छट्पटिएका छन् । विभागका कतिपय खेलाडी भने ड्युटीमा खटिएका छन् ।

खेलपाटी संवाददाता गीता राईले भलिबल खेलाडीलाई लकडाउन खुलेपछि तपाईँ सबैभन्दा पहिला के गर्नुहुन्छ भनेर सोधेकी थिइन् ।

लकडाउन खुलेपछि भलिबल खेलाडीले आफ्नो योजना यसरी सुनाए ।

सरस्वती चौधरी (एपीएफ)

बल नछोएको धेरै भईसक्यो । त्यसैले लकडाउनपछि पहिले ट्रेनिङ गर्छु ।

लकडाउनअघि मैले चोट बोकेको थिए । जसको कारण म शारीरिक प्रशिक्षणलाई बढी ध्यान दिन्छु । अलि बढी मेहेनत गर्छु ।

अहिले कोठामै बसेर सामान्य अभ्यास गर्ने गरेको छु । दौडिन र उफ्रन सक्छु कि सक्दिन थाहा छैन, लकडाउनपछि त्यो थाहा हुन्छ । लकडाउनपछि अलि बढी मेहेनत गर्नेछु ।

ईम राना ( राष्ट्रिय टिम कप्तान, पुलिस)

लकडाउन भएपनि हामीलाई नजिकैको स्थानबाट ड्युटी गर्नु भनेको छ । बोलाएको अवस्थामा म पोखरा जानेछु । हामी सम्पर्कमा रहेका छौँ ।

लकडाउनपछि पहिलो प्राथमिकता प्रशिक्षण र खेललाई निरन्तरता दिनु हुनेछ । अहिले सामान्य अभ्यास गरिरहेको छु ।

प्रतिभा माली (न्यु डाइमण्ड)

चोटको कारण आराम गरिरहेको छु । त्यसैले लकडाउनपछि खासै योजना छैन । हल्का हिड्न सक्छु त्यसैले लकडाउन खुल्यो भने न्यु डाईमण्ड स्कुल जाने मन छ । खेल्न सक्दिन तर स्कुलमा भलिबल खेलेको हेर्ने छु ।

कुल बहादुर थापा (पुलिस)

म अहिले घर बुटवलमा छु । लकडाउन खुलेपछि सबैभन्दा पहिले काठमाडौं जाने र आफ्नो अभ्यास सुरु गर्नेछु ।

निरुता ठगुन्ना (एपीएफ)

लकडाउन खुलेपछि पहिलो प्राथमिकता प्रशिक्षण गर्ने र आफ्नो खेल राम्रो बनाउनु हुनेछ । बल नछोएको धेरै भईसक्यो । तर, कोठामै सामान्य अभ्यास गरिरहेको छु ।

धन बहादुर भट्ट (त्रिभुवन आर्मी)

भलिबल खेल्न नपाएको धेरै भयो । भलिबललाई धेरै मिस गरिरहेको छु । लकडाउन खुलेपछि क्लब जाने र आफ्नो प्रशिक्षणलाई निरन्तरता दिने योजना छ । भलिबल खेल्ने बाहेक अन्य योजना छैन ।

सलिना श्रेष्ठ (न्यु डाइमण्ड)

मुख्यत हाम्रो प्रशिक्षण र पढाई रोकिएको छ । लकडाउन खुलेपछि पढाई र प्रशिक्षणलाई निरन्तरता दिनु रहेको छ । घरमै सामान्य अभ्यास गरिरहेको छु तर स्कुल (न्यु डाइमण्ड) मा अभ्यास गरे जस्तो हुदैन । त्यसैले प्रशिक्षणमा बढी ध्यान दिनेछु ।

हरि अधिकारी (त्रिभुवन आर्मी)

अहिले हामीलाई गणमा पठाएको छ । गणबाट म विदामा छु । हामी राष्ट्रिय खेलाडी भन्दा पहिले सिपाही हौँ । त्यसैले लकडाउनपछि पहिले गण जाने र गणले खटाएको ड्युटीमा जानेछु ।