थ्री स्टार, बिक्रम र च्यासल

काठमाडौं । नेपाली फुटबलको एउटा बिडम्बना, खेलाडी र क्लबबीचको सम्बन्ध कहिल्यै सुमधुर रहदैन ।

क्लबहरु खेलाडीलाई स्वार्थी देख्छन्, पैसामा बिक्ने आरोप लगाउँछन् ।

खेलाडीहरु गुनासो गरिरहन्छन्, खेल्ने अवस्थामा बाहेक क्लबहरु अरु बेला वास्तै गर्दैनन् ।

घरेलु फुटबलमा क्लब र खेलाडीबीचको ‘लभ–हेट’ का घटनाहरु बेला मौकामा सुन्न पाईन्छन् ।

यस सिजनकै एउटा घटना याद गरौ न ।

सुजल श्रेष्ठ सहित ठुलो संख्यामा खेलाडी यस सिजन मनाङ छाडेर मछिन्द्र पुगे । मनाङमा करिब एक दशक बिताएका विशाल श्रेष्ठ मन खिन्न बनाउँदै त्रिपुरेश्वर बसाई सरे ।

बिशाल राई, विराज महर्जन, हेमन गुरुङले लामै समय मनाङ क्लबको सेवा गरेका थिए । तर, अन्तिम समयमा खेलाडीहरु नयाँ गन्तव्य रोज्न बाध्य भए ।

मनाङका केही पदाधिकारीले भने, 'खेलाडीहरु स्वार्थी भए, थोरै पैसामा पनि बिके । क्लबलाई धोका दिए ।'

उता खेलाडीका आफ्नै गुनासा थिए, 'लिग नभएको भन्दै क्लबले खर्च पनि दिएन । पदाधिकारीले वास्ता गरेनन्, क्लबले भर दिएन ।' आदी, ईत्यादी ।

साँचो अर्थमा दुवै पक्ष आ–आफ्नो ठाउँमा सहि थिए ।

क्लबका आफ्नै बाध्यता थिए, खेलाडीका आफ्नै दुख थिए । लिगको टुङ्गो नभएको अवस्थामा क्लबले पैसा दिन सक्ने अवस्था थिएन । समस्यामा परेका बेला खेलाडीले मुख अगाडीकै पैसा हेर्न बाध्य भए ।

क्लब र खेलाडीको सम्बन्धको यत्रो पृष्ठभूमी किन पनि आवश्यक छ भने यहाँ ए डिभिजन क्लब थ्री स्टार र त्यसका कप्तान बिक्रम लामाको चर्चा गर्न थालिएको छ ।

यस सिजन थ्री स्टार औसत टिम जस्तै रह्यो । सुनिल वल, रेजिन धिमाल लगायतका परिचित अनुहारले थ्री स्टार छाडे । क्लबले नयाँ अनुहारलाई समावेश गर्दै टिम निर्माण गर्यो । कप्तानी बिक्रम लामाले गर्ने भए ।

उसो त बिक्रमलाई अन्य क्लबबाट राम्रा प्रस्ताव नआएका हैनन् । रोजेको पैसा बिक्रमलाई दिन क्लबहरु तयार थिए । तर उनी थ्री स्टारमै अडिए । झण्डै एक दशक क्लबमा बिताएका बिक्रम थ्री स्टारमै प्रतिबद्ध देखिए ।

राम्रा खेलाडीले क्लब छाडेका थिए । क्लब समस्यामा थियो । थ्री स्टार छाड्न बिक्रमको मनले मानेन ।

‘पैसा मात्र ठुलो कुरा हैन । सम्बन्ध र भावनाको पनि मुल्य हुन्छ,’ झण्डै १० वर्षदेखि थ्री स्टारसंग रहेका बिक्रम भन्छन्, ‘राम्रा प्रस्तावहरु नआएका हैनन । तर क्लबलाई समस्यामा पर्दा खेलाडीले थेग्न पर्छ । क्लब रहेमात्र खेलाडी रहन्छन् भन्ने कुरा बुझ्न आवश्यक छ ।’

थ्री स्टारका कप्तान समेत रहेका बिक्रम क्लब र खेलाडीबीच राम्रो सम्बन्ध स्थापित भएमात्र फुटबल अघि बढ्न सक्ने बताउँछन् । एकले अर्कोको विश्वास जितेर मात्र सफलता प्राप्त गर्न सकिने उनको बुझाई छ ।

दुई वर्षअघिको एक घटनाले बिक्रमले क्लबलाई अझ राम्रोसंग बुझ्ने मौका पाए ।

धरानमा बुढासुब्बा गोल्डकप खेल्दै गर्दा उनले खुट्टामा नराम्रो चोट बोकेका थिए । खुट्टा भाँच्चिएको अवस्था थियो ।

धेरैले भने, बिक्रमको पुनरागमन गाह्रो छ ।

नेपाली फुटबलको विवशता र लाचारी के हो भने, जब कुनै फुटबलरले एउटा गम्भिर चोट बोक्छ, उसलाई मैदान फर्कन असम्भव जस्तै छ । धेरै राम्रा खेलाडीले करियर एकै चोटले सकिएको उदाहरण धेरै छन् । बिक्रम पनि कतै त्यही मध्यको पात्र हुने हुन कि भन्ने चिन्ता आम फुटबल वृत्तमा थियो ।

तर चोट बोके लगत्तै बिक्रमको उपचारमा थ्री स्टारले कुनै कसर बाँकी राखेन । देशकै महङ्गो अस्पतालमा राखेर समयमै राम्रो उपचारको व्यवस्था थ्री स्टारले गरिदियो ।

थ्री स्टारले उपचार मात्र गरेन । उनलाई मैदान फर्काउने हौसला र आत्मविश्वास पनि भर्यो । क्लबका प्रशिक्षक मेघराज केसीले बिक्रमलाई पुरानै लयमा फर्कन सधै प्रेरित गरिरहे । आर्थिक संकट नपरोस भनेर क्लबका अध्यक्ष अरुणमान जोशी पैसाको बिटो बोकेर उनको घरसम्मै धैरै पटक धाएका थिए ।

नेपालको एउटा फुटबल क्लबले आफ्ना खेलाडीका लागि यो भन्दा बढी के गर्न सक्छ र ?

करिब ८ महिनापछि बिक्रम थ्री स्टारको जर्सीमा मैदानमा देखिए ।

त्यसयता दुई सिजन उनले थ्री स्टारबाट ए डिभिजन लिग खेल्न भ्याएका छन् । अनि राष्ट्रिय फुटबल टिमबाट निरन्तर खेलिरहेका छन् ।

समस्यामा क्लबहरु पन्छिने आरोपलाई थ्री स्टारले यस पटक मिथ्या सावित गरिदियो । बिक्रमका लागि झण्डै १० लाख रुपैयाँ बराबरको औषधी उपचारमा क्लबले खर्च गर्यो ।

सायद क्लबको त्यही गुण बिक्रमले थ्री स्टारबाट निरन्तरता दिएर तिरे । अझै केही वर्ष उनी थ्री स्टारमै प्रतिबद्ध रहेर क्लबको सेवा गर्ने बताउँछन् ।

अब बिक्रममाथि लाग्ने एक आरोपको प्रशंग ।

घरेलु फुटबलमा १४ क्लबले शीर्ष डिभिजनको लिग खेल्छन् । सबै क्लब उपत्यका भित्रका छन् । अझ ५ क्लब ललितपुरका छन् । थ्रीस्टार, च्यासल युथ, फ्रेण्ड्स, ब्रिगेड ब्वाईज र जावलाखेल ए डिभिजनको हैसियतमा छन् । सबै क्लब ललितपुरका विभिन्न टोलको प्रतिनिधित्व गर्छन् ।

बिक्रम पनि ललितपुरकै च्यासलमा जन्मिए । यही हुर्किए, फुटबल खेल्न सिके । खेलाडीको रुपमा आफुलाई परिपक्क बनाए । राष्ट्रिय, अन्तराष्ट्रिय रुपमा आफ्नो ख्याती बढाए ।

तर उनले च्यासलका लागि खेलेनन् । दुई वर्षअघि मात्र च्यासल शीर्ष डिभिजनमा उक्लियो । च्यासलले बिक्रमलाई क्लबमा आउन धेरै अनुरोध गर्यो । तर उपचारबाट भर्खरै मैदान फर्किएका बिक्रमले च्यासलको प्रस्तावमा सहमती जनाउन सकेनन् ।

के च्यासललाई हेला गर्छन् त ? च्यासलमात्रै हैन, फ्रेण्ड्सको पनि आरोप त्यहि छ ।

७५ सालको लिगमा थ्री स्टार र फ्रेण्ड्स भिड्दै थिए ।

एक समर्थकले हाँसी–मजाकमै भनिहाले ‘ओई बिक्रम, गोल छाड्दे, फेरी बेलुका कुपण्डोल तिर आउनु पर्ला !’

हुन पनि बिक्रमले करियरकै धेरै समय थ्री स्टारकै जर्सी लगाए । थ्री स्टारमै आएपछि उनको करियरले गति लिन थालेको हो ।

तर उनी फुटबल करियरमा च्यासलले लगाएको गुण नभुलेका बताउँछन् ।

‘सानो छँदै च्यासलले खेल्ने बातावरण दियो । च्यासलकै दाइहरुले गर्ने माया, गराउने ट्रेनिङ, फुटबल खेल्न बनाईदिएको बातावरणले आज यो स्थानमा छु । च्यासलले गर्व गर्न लायक बनाएको छ । च्यासलले लगाएको गुण एक दिन तिर्नेर्छु ।’ शुक्रबार नेपाली फुटबल फ्यान्स क्लबको फेसबुक लाईभमा बोल्दै बिक्रमले भने ।

थ्री स्टारका पुर्व खेलाडी तथा च्यासलकै पुर्व अध्यक्ष दिनेश ब्यञ्जनकार लगायत टिमले गरेको सहयोगको ऋणी रहेको भन्दै उनले एक दिन त्यो ऋण तिर्ने प्रतिबद्धता जनाए ।

‘आजको दिनसम्म आईपुग्न च्यासलका दिनेश दाई लगायत धेरैको ठुलो हात छ । उहाँप्रति म ऋणी छु । एक दिन लगाएको ऋण तिर्नेछु ।’ दक्षिण एसियाली खेलकुद (साग) मा नेपाललाई दुई पटक स्वर्ण पदक जिताएका बिक्रमले भने ।

नेपालले भर्खरै १३ औं दक्षिण एसियाली खेलकुद सागमा स्वर्ण जित्यो । टिमको मुख्य खेलाडी मध्यका एक थिए, बिक्रम ।

फाइनल खेलमा नियमित कप्तान सुजल श्रेष्ठले पहिलो हाफमै मैदान छाडेपछि टिमको कप्तानी बिक्रमले गरेका थिए । यसअघि १२ औं सागमा नेपालले स्वर्ण पदक जित्दा बिक्रम टिमका महत्वपूर्ण सदस्य थिए ।

स्पेनिस खेलाडी सर्जियो बुस्केट, ब्राजिलीयन तथा रियल माड्रिडका स्टार कासिमिरोलाई आईडल मान्ने बिक्रमले नयाँ तथा युवा खेलाडी बाबजुद यस बर्षको लिगमा थ्री स्टारको प्रदर्शन सन्तुलित रहेको बताए ।

‘नतिजाको हिसाबले थ्री स्टारको प्रदर्शन राम्रो हो । युवा टिम थियो । खेलाडीले राम्रो गरे ।’ उनी भन्छन्, ‘आउने दिनमा नयाँ भाइहरुको भबिष्य राम्रो छ ।’

तस्बिर-थ्री स्टार क्लब