अष्ट्रेलियाविरुद्ध खेल्दै सन्यास लिने विराजकाे चाहना

काठमाडौं । विराज महर्जन, नेपाली फुटबलका सफल कप्तान हुन् ।

नेपाली फुटबलले पछिल्लो समय जति सफलता पायो, त्याे विराजकाे कप्तानीमा भएकाे थियाे । 

विराजकै नेतृत्वमा नेपालले ३३ वर्षपछि पहिलो उपाधिको रुपमा एएफसीले आयोजना गरेको सोलिडारिटी कप जित्यो ।

बंगलादेशमा आयोजना भएको बंगबंन्धु गोल्डकपको उपाधि र भारतमा सम्पन्न भएको १२ औं दक्षिण एसियाली खेलुकद (साग) मा स्वर्ण पदक विराजकै कप्तानीमा नेपालले प्राप्न गरेकाे हाे । 

एन्फा एकेडेमी दोस्रो ब्याजका खेलाडी विराज घरेलु फुटबलका समेत सफल कप्तान र खेलाडीमा मानिन्छन् । तर, विराज अहिले अन्तराष्ट्रिय फुटबलको उत्तरार्धमा छन् । सन्यासको संघारमा छन् ।

पछिल्लो समय राष्ट्रिय टिमबाट बाहिर रहँदै आएका विराज नयाँ खेलाडीलाई अवसर दिने सोचाईमा छन् ।

पछिल्लो समय विदेशी प्रशिक्षक जोहान कालिनको नजरबाट विराज टाढा रहँदै आएका छन् । कालिन पनि विराजको फिटनेसको समस्या भन्दै टिममा राख्न पन्छिदै आईरहेका छन् ।

विराजलाई पनि थाहा छ कि टिममा पर्न अब मुस्किल हुनेछ । त्यसैले विराज सन्यासको उपयुक्त समयको पर्खाइमा छन् । अर्थात्, विराज घरेलु भूमिमा खेल्दै सुखद विदाई चाहन्छन् ।

‘घरेलु मैदानमा हुने अष्ट्रेलियासँगको खेलमा विदाई लिने चाहना हो । घरेलु दर्शकमाझ सुखद विदाई लिन चाहन्छु ।' सहिद स्मारक 'ए' डिभिजन लिगमा मछिन्द्र क्लबलाई पहिलो पटक च्याम्पियन बनाउन सफल कप्तान विराज भन्छन् ।

यस विषयमा विराजले एन्फा नेतृत्वसँग कुरापनि गरिसकेका छन् ।

‘मैले सन्यासको विषयमा एन्फासँग पनि कुरा गरेको छु ।’ उनले भने ।

सन् २००८ मा पाकिस्तानविरुद्ध पोखरामा भएको ‘होम एण्ड अवे’ मैत्रीपूर्ण खेलका क्रममा विराजले राष्ट्रिय टिमबाट डेब्यु गरेका थिए । त्यसयता लगातार ११ वर्ष राष्ट्रिय टिमबाट खेलेका विराजले ७२ क्याप जितिसकेका छन् ।

‘लेफ्ट ब्याक’ विराजले राष्ट्रिय टिमबाट एक गोल समेत गरेका छन् । सन् २००९ मा दशरथ रंगशालामा विराजले किर्गीस्तानविरुद्ध फ्रिकिकमार्फत आकर्षक गोल गरेका थिए ।

पाकिस्तानविरुद्ध डेब्यु गरेका विराजले गत जेठ १९ मलेसियाविरुद्ध भएको अवे खेलमा अन्तिम पटक नेपाली टिमको आर्म ब्याण्ड लगाएका थिए । जुन खेलमा उनले ९० मिनेटनै मैदानमा बिताएका थिए ।

विश्वभर फैलिएको कोरोना भाईरसको कारण भने विराज विश्राममा रहेका छन् ।

कोरोनाको कारण खेलकुद गतिविधि ठप्प छन् । दशरथ रंगशाला नजिकै घरमा रहेका विराज परिवारलाई समय दिरहेका छन् । यहि फुसर्दको समयसँगै विराजले अन्तराष्ट्रिय फुटबलबाट टाढा रहने सोच बनाईरहेका छन् ।

विराज सकेसम्म अष्ट्रेलिया जस्तो एसियाली पावर हाउस देशसँग विदाई चाहन्छन् । यो सम्भव नभए जोर्डनसँगको खेल पनि कुर्न तयार छन् ।

‘अष्ट्रेलियासँगको खेलसँगै विदाई लिने सोच बनाएको छु । सम्भव नभए जोर्डनसँग भएपनि एन्फाले मेरो बारेमा सोचिदिए हुन्थ्यो ।’ विराज भन्छन् ।

कप्तान विराज घरेलु फुटबलमा समेत सफल खेलाडी हुन् । उनले तीन फरक क्लबबाट शीर्ष डिभिजनको लिग जितेका छन् । विराजले थ्रीस्टार, मनाङ मर्स्याङ्दी र मछिन्द्र क्लबबाट ए डिभिजन लिग जितिसकेका छन् । विराज यस वर्षमात्रै मछिन्द्र पुगेका हुन् ।

एन्फाको लागि पनि विराजको विदाई सुनौलो अवसर हो । एन्फाले पूर्व कप्तान अनिल गुरुङलाई सातदोबाटोस्थित एन्फा कम्प्लेक्समा सुखद विदाई गरेपछि त्यस यता कुनै खेलाडीको विदाई गरेको छैन ।