विभागका खेलाडी – फिल्डमा उत्रने तयारी

काठमाडौं । विश्व समुदाय माहामारीको रुपमा फैलिएको कोरोना भाईरससँग लडिरहेको छ । चीनको वुहान प्रान्तबाट सुरु भएको कोभिड १९ अहिले विश्वभर फैलिएको छ । जसका कारण हजारौ मानिसले ज्यान गुमाएका छन्, लाखौ संक्रमित देखिएका छन् ।

विश्वका ठुला र समृद्व देश कोरोनासँग लडिरहदाँ नेपाल पनि यसबाट अछुतो छैन । हाल सरकारले संक्रमण फैलन नदिन देशभर ‘लकडाउन’ गरेको छ । जसका कारण अत्यावश्यक बाहेक सम्पुर्ण गतिविधि ठप्प छन् ।

कतारबाट आएकी एक युवतीमा कोरोनाको संक्रमण देखिएपछि सरकारले संक्रमण फैलन नदिन कडा कदम चालेको हो । नेपालमा ५ जना संक्रमित भेटिएका छन् । एक जनाको डिस्चार्ज भैसकेको छ ।

देशनै ठप्प रहेको अवस्थामा खेलकदु गतिविधि शुन्य छ । सम्पूर्ण खेलाडी अहिले आ–आफ्नो घर र बन्द कोठामा रहेका छन् । जससँगै उनीको दैनिक अभ्यास समेत प्रभावित बनेको छ ।

केही खेलाडी घरको छतमा बसेर नियमित अभ्यास गर्न बाध्य छन् । विभागीय टिम बाहिरका खेलाडीले परिवारसँग समय विताउन पाएका छन् । अन्य खेलाडी घर परिवारसंग रहेपनि विभागका खेलाडीको दैनिकी भने भिन्न छ ।

जागिरे जिवनमा रहेका उनीहरुलाई सरकारले कोरोनाबिरुद्वको अभियानमा फिल्ड (कोरोना संक्रमित मैदान)मा डाकेको छ । लकडाउनको समय र कोरोनाको प्रभाव कहिलेसम्म रहने टुङ्गो छैन । तर खेलाडीलाई ड्युटीका लागि तयारी अवस्थामा रहन विभागले निर्देशन दिईसकेको छ ।

सरकारले आर्मी, एपीएफ र पुलिसका खेलाडीलाई सुरक्षाको लागि तयार रहन निर्देशन दिएको छ ।

यसअघि सरकारले राष्ट्रिय संकटको अवस्थामा मात्र खेलाडीलाई फिल्डमा खटाउने गरेको थियो । सामान्य अवस्थामा क्लबका खेलाडीले खेल्ने मात्र आएका थिए ।

विभागबाट खेलिरहेका तर स्थायी जागिरमा नरहेको खेलाडीलाई फिल्डमा बोलाईएको छैन । करारमा रहेका र चोट ग्रस्त खेलाडीलाई फिल्डमा नबोलाउने विभागले बताएको छ ।

राष्ट्रिय महिला फुटबल टिमकी महत्वपूर्ण सदस्य सावित्रा भण्डारी (साम्बा)ले देशको सुरक्षाको लागिनै जागिर खाएको र संकटको अवस्थामा मैदान उत्रन कुनै समस्या नभएको बताईन् ।

‘देश र जनताको लागि जागिर खाएको हुँ । देशको सुरक्षा गर्छु भनेरनै जागिर खाए । यस्तो अवस्थामा फिल्डमा आउन उत्सुक छु ।’ नेपालको लागि सर्वाधिक ३४ गोल गरेकी कीर्तिमानी खेलाडी साम्बाले खेलपाटीसँग भनिन् ।

भर्खरै मात्रै पूर्व कप्तान अनु लामाको नाममा रहेको ३४ गोलको कीर्तिमान तोडेकी भण्डारीले १२ दिनको छुट्टिपछि ड्युटीमा जोडिन लागेकी हुन् ।

‘विदा दिएपनि आपतको अवस्थामा घर नजानु भनेको थियो ।’ उनले भनिन् ।

एपीएफ स्रोतका अनुसार भोली (मंगलबार)बाट खेलाडीलाई फिल्डमा उतार्ने तयारी छ ।

तर खेलाडीलाई समस्या आउन सक्ने भएकाले उनीहरुलाई तयारी अवस्थामा राख्ने कि बाहिर निकाल्ने भन्नेबारे समस्या देखिएको छ ।

महिला राष्ट्रिय फुटबल टिमकी सदस्य तथा एपीएफकी गोलरक्षक एन्जिला तुम्बाप्पो सुब्बाले महामारीको अवस्थामा आफुहरु तयारी अवस्थामा बस्नुपर्ने बताईन् ।

‘अहिलेको अवस्था निकै नराम्रो छ । जागिरे भैसकेपछि ड्युटीबाट पछाडी हट्नु हुन्न । एक प्रकारले खुसी पनि छु । यो अवसर पनि हो ।’ विगत ४ बर्षदेखि एपीएफको जागिरमा रहेकी एन्जिलाले भनिन् ।

यसअघि क्लबका खेलाडीलाई सिमित क्षेत्रमा ड्युटीमा राखेपनि यसपटक भने बाहिर फिल्डमै उतार्न लागिएको एपीएफ स्रोतले बताएको छ ।

यता, आर्मीले क्लबका खेलाडीलाई आ–आफ्नो ‘युनिट’मा सुरक्षाकालागि खटाईसकेको छ । नेपाल पुलिसले पनि खेलाडीलाई केही समयमा फिल्डमा खटाउने तयारी गरेको छ ।