काठमाडौं । एपीएफ क्लबकी स्पाइकर सरस्वती चौधरी र नेविका चौधरीले प्रधानमन्त्री कप महिला भलिबल प्रतियोगिता गुमाउने भएका छन् ।
चोटको कारण सरस्वती र नेविकाले फागुन १८ गतेबाट नेपालगन्जमा आयोजना हुने प्रधानमन्त्री कप भलिबल गुमाउने भएका हुन् ।
गत हप्ता पर्वतको बेनीमा सम्पन्न दिदीबहिनी कप भलिबलको फाइनलमा सरस्वतीले चोट बोकेकी थिइन् । नेपाल पुलिस क्लबसँगको फाइनल खेलको दौरान सरस्वतीको दाँया खुट्टा मर्किएको थियो । जसका कारण सरस्वती करिब ३ हप्ता कोर्ट बाहिर रहने छिन् ।
‘दुखाई हल्का अझै छ तर सुनिन कम भएको छ । प्रधानमन्त्री कप खेल्न नपाउदा अलि नराम्रो लागेको छ । अहिलेसम्म सबै प्रतियोगिता नछुटाई खेलेको छु,’ सरस्वतीले खेलपाटीसँग भनिन्, ‘अहिले आराम गरेर अर्काे प्रतियोगिता फिट भएर खेल्न सक्छु भनेर खुसी समेत छु ।’
फाइनलमा चोट बोकेपनि सरस्वतीले टिमलाई उपाधि दिलाउन महत्वपूर्ण भूमिका खेलेकी थिईन् । यस्तै सरस्वती प्रतियोगिताको सर्वाेत्कृष्ट खेलाडी चुनिएकी थिईन् ।
मुख्य खेलाडी सरस्वतीले चोट बोकेपछि एपीएफलाई प्रधानमन्त्री कपमा केहि समस्या पर्ने देखिएको छ । सरस्वतीको उत्कृष्ट प्रदर्शनमा एपीएफले लगातार उपाधिहरु जित्दै आएको छ ।
सरस्वती टिममा नहुँदा एपीएफले पूजा चौधरीलाई मौका दिनेछ । प्रधानमन्त्री कपमा सरस्वतीको स्थान पूजाले लिने छिन् ।
सरस्वतीसँगै एपीएफले प्रधानमन्त्री कपमा अर्की महत्वपूर्ण सदस्य नेविकालाई समेत गुमाउने छ ।
नेविकाको ढाँडको समस्या तथा दाँया खुट्टाको हड्डी फुटेपछि अहिले उनी आराममा रहेकी छिन् ।
पन्ध्रौं संस्करणको ढोरपाटन महिला डबल लिग सकिए लगत्तै आराममा रहेकी नेविकाले थप एक महिना आराम गर्नु पर्ने भएको छ । एपीएफ हस्पिटलमा उपचार गराईरहेकी नेविकाले दिदीबहिनी कप भलिबल पनि गुमाएकी थिईन् ।
‘खेल्न मन त लाग्छ तर ज्यानले साथ नदिएपछि के गर्नु । बेनीको खेलको लाईभ हेर्दा खेल्न मन लागेको थियो । टिमलाई धेरै मिस गरेको थिए,’ नेविकाले भनिन् ।
