एपीएफलाई हराउँदै आर्मी च्याम्पियन

काठमाडौं । त्रिभुवन आर्मी क्लबले दिवाकर भुसाल स्मृति राष्ट्रिय क्लब भलिबल च्याम्पियनसिपको उपाधि जितेको छ ।

चितवनको माडीमा आइतबार भएको फाइनलमा एपीएफलाई ३-० को सोझो सेटमा पराजित गर्दै आर्मी च्याम्पियन बनेको हो ।

उपाधि जित्ने क्रममा आर्मीले एपीएफलाई २५-१५, २५-२० र २५-२२ को सेटमा जित निकाल्यो । यससँगै आर्मीले एपीएफविरुद्ध पाँचौ आरबीबी एनभिए क्लब च्याम्पियसिपमा भोगेको हारको बदला समेत लिएको छ ।

उपाधिसँगै आर्मीले २ लाख प्राप्त गरेको छ । एपीएफले १ लाखमा चित्त बुझाएको छ ।

प्रतियोगितामा नेपाल पुलिस क्लब तेस्रो भयो । पुलिसले गण्डकी प्रदेशलाई हराएको थियो । तेस्रो भएको पुलिसले ५० हजार प्राप्त गर्दा गण्डकीले २५ हजार प्राप्त गर्यो ।

प्रतियोगितामा आर्मीका धन बहादुर भट्ट सर्वोकृष्ट खेलाडी चुनिए। धनले १० हजार रुपैयाँ प्राप्त गरे ।

यस्तै एपीएफका विजय थापा उत्कृष्ट स्पाइकर, एपीएफकै लोकेन्द्र गिरी उत्कृष्ट सेटर, पुलिसका ईम राना उत्कृष्ट सर्भर, आर्मीका ईश्वर थापामगर उत्कृष्ट लिबेरो र आर्मीका ज्ञानेश्वर अधिकारी उत्कृष्ट प्रशिक्षक चुनिए ।

व्यक्तिगत विद्याका उत्कृष्टले जनही ५/५ हजार रुपैयाँ प्राप्त गरे ।

नगर खेलकुद विकास समिति माडीले आयोजना गरेको प्रतियोगितामा ६ टोलीको सहभागिता रहेको थियो ।