न्यु डायमण्डलाई प्रतिभाको अभाव !

काठमाडौं । महिला भलिबलमा स्टार खेलाडी जन्माउने कारखानाको रुपमा न्यु डाईमण्ड स्पाेर्ट्स क्लबलाई लिने गरिन्छ ।

न्यु डाईमण्डले उत्पादन गरेका खेलाडीले घरेलु भलिबलमा बेग्लै सम्मान र नाम कमाएका छन् ।

न्यु डाईमण्डबाट उत्पादन भएका रमिला तन्डुकार, प्रतिभा माली, रेश्मा भण्डारी, कृपा अधिकारी, सलिना श्रेष्ठ, मनिषा तामाङ लगायतका अनुहार घरेलु भलिबलमा चर्चित छन् ।

न्यु डायमण्ड विद्यालय स्तरीय टिम हो । तर घरेलु महिला भलिबलमा न्यु डायमण्डले आफुलाई एक ‘पावरहाउस’को रुपमा स्थापित गरेको छ । अधिकांश महिला भलिबल प्रतियोगितामा न्यु डायमण्डले फाईनल यात्रा तय गर्ने गरेको छ ।

विद्यालयस्तरीय टिमले विभागीय टोली एपीएफलाई बारम्बार टक्कर दिने गर्छ । अधिकांश घरेलु प्रतियोगिताको फाईनलमा एपीएफ र न्यु डायमण्ड भिड्ने गर्छन् ।

तर पछिल्लो खेलमा न्यु डायमण्डको गति केही सुस्ताएको देखिएको छ । प्रर्दशन र नतिजा केही खस्किएको जस्तो देखिन्छ । काठमाडौंमा भर्खरै सकिएको ढोरपाटन महिला डबल लिगमा न्यु डायमण्डको प्रर्दशन र नतिजा खासै गतिलो रहन सकेन । ढोरपाटनमा निरन्तर दोस्रो हुँदै आएको न्यु डायमण्ड पछिल्लो संस्करणमा चौथो बन्न पुग्यो ।

त्यसको मुख्य कारण प्रतिभाको अनुपस्थितीलाई मानिएको छ ।

प्रतिभाले अहिले चोट बोकेकी छिन् । उनी आराममा छिन् । उनको खुट्टाको शल्यक्रिया गरिएको छ । करिब बर्ष दिन उनी मैदानमा देखिने छैनन् । उनै प्रतिभा नहुँदा घरेलु भलिबलमा न्यु डायमण्डको नतिजा निराशाजनक छ ।

माघको पहिलो साता आरबीबी क्लब च्याम्पियनसिप खेल्ने क्रममा प्रतिभाले चोट बोकिन् । तत्काल उनलाई अस्पतालमा भर्ना गरियो । केही दिन निगरानीमा राखेर उनको शल्यक्रिया गर्ने निर्णय गरियो । प्रतिभाले अब तीन महिना पुरै बेड रेस्ट गर्नेछिन् । बिस्तारै थेरापीमार्फत खुट्टा चलाउन सुरु गर्नेछिन् । मैदान फर्कन उनलाई करिब एक बर्ष लाग्न सक्ने उपचारमा संलग्न चिकित्सक बताउँछन् ।

टिमकी मुख्य स्पाईकर तथा अलराउण्डर प्रतिभा नहुँदा न्यु डायमण्डले ढोरपाटन महिला डबल लिगमा समेत राम्रो प्रर्दशन गर्न सकेन । प्रतिभा नहुँदा सजिलै जित्ने टिमसंग समेत न्यु डायमण्डले हार ब्यहोर्यो ।

सहजै जित्दै आएका त्रिभुवन आर्मी, नेपाल पुलिस सहितका क्लबसंग समेत सोझो सेटमा पराजित बन्यो ।

न्यु डाईमण्डका मुख्य प्रशिक्षक कुमार राईले प्रतिभा टिममा नहुँदा ठूलो नोक्सान भएको बताउँछन् ।

‘खेलमा प्रतिभाको अभाव ५० प्रतिशत नै खड्कियो । धेरै ठूलो नोक्सान भयो । प्रतिभा भएको भए उपाधि जित्ने रहेछौं । अरु खेलाडीको खेल वृद्धि भएको रहेछ । प्रतिभा नहुनु एकदम दुख लाग्दो कुरा भयो ।’ प्रशिक्षक राई भन्छन् ।

प्रतिभाबिनाको न्यु डायमण्डले ढोरपाटन महिला डबल लिगमा चौथो स्थान हासिल गर्यो । प्रशिक्षक कुमार नतिजा खासै नराम्रो नभएको बताउँछन् ।

‘चौंथो स्थानका लागि इरानी खेलाडी रहेको चितवन र भारतीय खेलाडी रहेको बुलबुलेसंग प्रतिस्पर्धा गर्नुप¥यो । एकदमै राम्रो खेलाडी नभएको अवस्थामा चौंथो स्थानमा रहनु नराम्रो हैन ।’ उनी भन्छन् ।

प्रतियोगितामा न्यु डाइमण्डले इरानी खेलाडी तथा भारतीय खेलाडी रहेको टिमलाई हराउँदै चौंथो भएको थियो ।

क्लबले न्यु डाईमण्ड कपबाट राष्ट्रिय टिमकी कप्तान अरुणा शाहीलाई टोलीमा राखेको छ । ढोरपाटन खेल्ने न्यु डायमण्डको टोलीमा अरुणा पनि थिईन् । तरपनि क्लबले राम्रो नतिजा ल्याउन सकेन ।

‘टिमको स्कोरिङ लाइनको सबै जिम्मा प्रतिभाले लिने हो । आफ्नो ठाउँबाट अरुणाले राम्रै गरेको हो । स्पाइकरमा आत्मविश्वास देखिएन ।’ राईले भने, ‘सेटरले त सेट गर्दिने हो, तर हान्नेले नहानेपछि काम नै लाग्दैन । अब दुई चारवटा खेल खेलेपछि आत्मविश्वास बढ्छ ।’

‘खेलाडी नआत्तिएर खेलेको खण्डमा न्यु डायमण्ड फाइनल पुग्न सक्ने टिम रहेको सन्देश ढोरपाटन प्रतियोगिताले सिकाएको छ ।’ कुमार थप्छन् ।

आरबीबी कपको फाइनलमा एपीएफविरुद्ध प्रतिस्पर्धात्मक तेस्रो सेटमा प्रतिभा घाईते भएकी थिईन् । दुई सेट जितेर खेलमा अगाडी देखिएको एपीएफलाई खेलमा रोक्न न्यु डायमण्डलाई तेस्रो सेट जित्नै पर्ने दबाब थियो ।

तेस्रो सेटको अन्तिममा प्रतिभाले स्पाईक गरेर ओर्लने क्रममा घुँडामा चोट बोकिन् । त्यसपछि उनलाई तत्काल अस्पताल लगियो । तेस्रो सेट त न्यु डायमण्डले जित्यो । तर टिमकी मुख्य खेलाडीलाई करिब एक बर्ष गुमाउन पुग्यो ।

प्रतिभा उत्कृष्ट स्पाइकर मात्र हैनन्, उनी डिफेन्स पनि राम्रो खेल्छिन् । न्यु डायमण्डकी त उनी अलराउण्डर नै हुन् । उनकै उच्च प्रर्दशनमा न्यु डाइमण्डले घरेलु भलिबलमा दबदबा कायम गर्दै आएको छ । प्रतिभा लामो समय मैदान बाहिर रहने पक्का छ । अब न्यु डायमण्डका नयाँ अनुहारले प्रतिभाको अभाव पूर्ती गर्नुपर्ने समय आएको छ ।