काठमाडौं । साविक विजेता तथा विभागीय टोली नेपाल एपीएफ क्लबले राजधानीमा जारी १५ औं संस्करणको ढोरपाटन डबल लिग महिला भलिबल प्रतियोगितामा अपराजित यात्रा कायम राखेको छ ।
नयाँ बसपार्कस्थित ढोरपाटन स्पोर्ट्स क्लबको खेल मैदानमा सोमबार न्यु डाईमण्ड स्पोर्ट्स क्लबलाई ३-१ को सेटमा पराजित गर्दै एपीएफले अपराजित यात्रा कायम राखेको हो ।
मुख्य स्पाइकर प्रतिभा माली बिना कोर्ट उत्रिएको न्यु डाईमण्डविरुद्ध एपीएफले सुरुवाती सेट गुमाएपनि पुनरागमन जित निकालेको हो । घुँडाको चोटको कारण टिम बाहिर रहेका प्रतिभा बिना न्यु डाईमण्डले पहिलो सेट २५-२१ ले जितेको थियो । तर, त्यसपछिको सेट २५-८, २५-१४ र २५-१६ ले जित्दै खेल एपीएफले आफ्नो बनायो ।
न्यु डाईमण्डमाथिको जितसँगै शीर्ष स्थानको एपीएफले १२ खेलबाट ३५ अंक जोडेको छ । न्यु डाईमण्ड १३ खेलमा २२ अंक जोडेर चौंथो स्थानमा रहेको छ ।
सोमबार भएको पहिलो खेलमा न्यु डाईमण्डले बुलबुले रारा क्लबलाई २५-२२, २५-१२, १८-२५ र २५-१६ को सेटमा हराएको थियो । बुलबुले १३ खेलमा १४ अंकसहित लिगको छैटौं स्थानमा रहेको छ ।
यस्तै पुलिसले चितवन टाइग्रेसलाई ३–१ को सेटमा पराजित गरेको छ । पुलिसले चितवनमाथि २५-२३, २५-२१,१७-२७ र २५-२० को सेटमा पराजित गर्यो ।
जितसँगै पुलिसले १२ खेलमा ३४ अंक जोडेको छ । र, पुलिस दोस्रो स्थानमा रहेको छ । पुलिस एपीएफ भन्दा एक अंकले मात्र पछि रहेको छ ।
चितवन भने पाँचौं हुँदै प्रतियोगिताबाट बाहिरिएको छ । चितवनले १४ खेलमा १८ अंक जोड्यो । पाँचौं भएको चितवनले ५५ हजार प्राप्त गर्यो ।
यस्तै लिगमा आर्मी क्लब ११ खेलमा २४ अंक जोडेर तेस्रो स्थानमा रहेको छ ।
प्रतियोगिताको विजेताले ४ लाख ५ हजार रुपैयाँ पुरस्कार पाउनेछन् । त्यस्तै उपविजेतालाई २ लाख ५ हजार र तेस्रो हुनेले १ लाख ५ हजार पाउनेछन् । यस्तै चौथौ हुनेलाई ७५ हजार पाउने आयोजकले जनाएको छ ।
प्रतियोगितामा चार विधामा उत्कुष्ट हुने खेलाडीले यु एम स्कुटर पाउनेछन् । उत्कृष्ट खेलाडी ,उदयमान, बर्ष खेलाडी र प्लेयर अफ द सिरिज बन्ने खेलाडीले स्कुटर पाउनेछन् । त्यस्तै भाग्यशाली एक दर्शक र ग्रेट एचिभमेन्ट अवार्ड विजेतालाई एक एक थान मोटरसाइकल प्रदान गरिनेछ ।
विधागततर्फ उत्कृष्ट हुनेले जनही ७/७ हजार पाउने छन् ।
