काठमाडौं । न्यु स्टार पोल पाँचौं अर्किड कप अन्तरविद्यालय छात्र फुटबल प्रतियोगितामा आइतबार विजयी भएको छ ।
न्यु स्टार पोलले बेस्ट ग्रुप भिजनलाई ५–० गोलअन्तरले पराजित गर्यो । न्यु स्टारका मुस्कान तामाङले ह्याट्रिक गरे भने योगेश विष्ट र राजन आचार्यले १–१ गोल थपे ।
अर्किड स्कुलद्वारा आयोजित प्रतियोगितामा टाइमलाइन, प्रीतिमा, विनायक र गेट्वे एकेडेमीले पनि जित हात पारे ।
टाइमलाइनले एभरेष्टलाई २–० गोलले हरायो । टाइमलाइनका प्रतियूश विष्ट र रोहित लिम्बूले गोल गरे । प्रीतिमाले कौतिल्यलाई टाइब्रेकरमा ४–१ ले पाखा लगायो । निर्धारित समयको खेल गोलरहित बराबरीमा सकिएको थियो ।
विनायकले कौस्तुभ एकेडेमीमाथि २–० को जित दर्ता गर्यो । विनायकका रोशन बमजनले दुवै गोल गरे । ग्लोबल पब्लिक विरुद्धको खेलमा गेट्वे ३–२ ले विजयी भयो । गेट्वेका अमन महतले २ तथा समिर श्रेष्ठले १ गोल गरे । ग्लोबलका श्रृजल पोखरेल र आशिष नेपालले १–१ गोल गरे ।
