काठमाडौं । साविक विजेता तथा विभागीय टोली नेपाल एपीएफ क्लबले १५ औं संस्करणको ढोरपाटन डबल लिग महिला भलिबल प्रतियोगितामा अपराजित यात्रा कायम राखेको छ ।
नयाँ बसपार्कस्थित ढोरपाटन स्पोर्ट्स क्लबको खेल मैदानमा आइतबार दोस्रो चरणको दोस्रो खेलमा बुलबुले रारा क्लबलाई ३-० को सेटमा पराजित गर्दै एपीएफले अपराजित यात्रा कायम राखेको हो ।
एपीएफले बुलबुलेमाथि २५-१५,२५-१२ र २५-१६ को सेटमा पराजित गर्यो । जितसँगै शीर्ष स्थानको एपीएफले ११ खेलबाट ३२ अंक जोडेको छ । बुलबुले १४ अंकसहित छैटौं स्थानमा रहेको छ ।
अर्को खेलमा विभागीय टिम नेपाल पुलिस क्लबले बुलबुले क्लबलाई नै हराएर एपीएफमाथि दबाब कायम राखेको छ । पुलिसले बुलबुलेमाथि २५-१५,२५-१६ र २५-१९ को सेटमा पराजित गर्यो ।
बुलबुलेलाई हराएसँगै पुलिसले ११ खेलमा ३१ अंक जोडेको छ । र, पुलिस दोस्रो स्थानमा रहेको छ । पुलिस एपीएफ भन्दा एक अंकले मात्र पछि रहेको छ ।
यस्तै त्रिभुवन आर्मी क्लबले चितवन टाइग्रेसलाई ३–१ को सेटमा पराजित गरेको छ । आर्मीले चितवनमाथि २५-२१,२७-२५,२५-२७ र २५-१६ को सेटमा पराजित गर्यो । जितसँगै आर्मी ११ खेलमा २४ अंक जोडेर तेस्रो स्थानमा छ ।
यस्तै चितवनले दोस्रो खेलमा न्यु डायमन्ड स्पोर्ट्स क्लबलाई ३-२ को सेटमा पराजित गरेको छ । चितवनले न्यु डायमन्डलाई २५-२७,२६-२४,२५-१४,१७-२५ र १५-७ को सेटमा पराजित गर्यो ।
जितसँगै चितवनले १३ खेलमा १८ अंक जोडेको छ । चितवन पाँचौं स्थानमा रहेको छ । न्यु डायमन्डको १९ अंक रहेको छ । न्यु डायमन्ड चौंथो स्थानमा रहेको छ ।
