अन्तराष्ट्रिय भलिबलबाट कोपिलाको सन्यास

काठमाडौं । राष्ट्रिय भलिबल खेलाडी कोपिला उप्रेती अन्तराष्ट्रिय भलिबल करियरबाट सन्यास लिएकी छिन् ।

विभागीय टिम नेपाल पुलिस क्लबमा आबद्व कोपिलाले अन्तराष्ट्रिय करियरबाट सन्यासको घोषणा गरेकी हुन् ।

सुदुरपश्चिमबाट क्षेत्रबाट भलिबल करियर सुरु गरेकी कोपिलाले करिब डेढ दशक क्लब र राष्ट्रका लिग खेलिन् ।

२०६४ सालमा काठमाडौंमा आयोजित १३ औ राष्ट्रिय प्रतियोगितामा उनी सार्वजनीक संस्थानबाट सहभागी भएकी थिईन् । सो प्रतियोगिताबाट छनोट भएर उनले राष्ट्रिय टिममा स्थान बनाएकी थिईन् ।

उनले राष्ट्रिय टिमबाट पहिलो पटक सन् २००६ मा श्रीलंकाको कोलम्बोमा भएको १० औं दक्षिण एसियाली खेलकुद (साग)मा सहभागीता जनाएकी थिईन् ।

उनी २०६८ सालमा पुलिस क्लबमा आबद्व भएकी थिईन् । अन्तिम पटक उनी सन् २०१६ मा भारतमा भएको १२ औं सागमा नेपालको प्रतिनिधित्व गरेकी थिईन् ।

कोपिला सहभागी नेपाली महिला भलिबल टिमले थुप्रै अन्तराष्ट्रिय प्रतियोगितामा पदक हासिल गरेको छ ।

श्रीलंकामा भएको १० औं सागमा नेपाललाई कास्य पदक जिताउन महत्वपूर्ण भूमिका खेलेकी कोपिलाले १२ औं सागमा समेत कास्य पदक दिलाउन सफल भएकी थिईन् ।

सन् २०१४ मा भएको पहिलो साउथ एसियन महिला भलिबल च्याम्पियनसिपमा रजत पदक जितेकी उनले माल्दिभ्समा भएको एभीसी कन्टिनेन्टल कपमा स्वर्ण पदक जितेकी थिईन् ।

२०१८ मा फिबा महिला विश्व भलिबल च्याम्पियनसिपमा रजत जितेकी उनले माल्दिभ्समा भएको एसियन सेन्ट्रल जोनको छनोट प्रतियोगितामा समेत रजत पदक हात पारेकी थिईन् ।

उनले विभागीय टिम पुलिसबाट धेरै घरेलु प्रतियोगितामा उपाधि जित्नुका साथै व्यक्तिगततर्फ उत्कृष्ट खेलाडी घोषित भएकी छिन् ।

नेपाल भलिबल संघले शनिबार एक कार्यक्रमका बीच कोपिलालाई सम्मान गर्दै अन्तराष्ट्रिय करियरको सुखद बिदाई गरेको छ । कार्यक्रममा उनलाई नगद ५० हजार सहित सम्मान गरिएको थियो ।

उनले अब मोफसलमा रहेर महिला भलिबलमा काम गर्ने योजना रहेको बताएकी छिन् । क्लबबाट समेत धेरै समय खेल्दिन ।

‘अब ग्रामीण क्षेत्रमा अवसर नपाएका महिला खेलाडीलाई भलिबलसंग जोड्ने प्रयास गर्नेछु ।’ उनले खेलपाटीसंग भनेकी छिन् ।