एपीएफ अपराजित रहदै दोस्रो चरणमा

काठमाडौं । साविक विजेता एपीएफ क्लब अपराजित रहदै १५ औं संस्करणको ढोरपाटन महिला डबल लिग भलिबल प्रतियोगिताको दोस्रो चरणमा प्रवेश गरेका छन् ।

नयाँ बसपार्कस्थित ढोरपाटन क्लबको मैदानमा शुक्रबार पहिलो चरणको अन्तिम खेलमा न्यु डाइमण्ड स्पोर्ट्स क्लबलाई ३–० को सोझो सेटमा पराजित गर्दै एपीएफ अपराजित रहदै दोस्रो चरणमा पुगेको हो ।

अपराजित रहने क्रममा एपीएफले न्यु डाइमण्डलाई २५–१७, २५–१९ र २५–१६ को सोझो सेटमा हरायो । जितसँगै एपीएफले ८ खेलमा २६ अंक जोड्यो । र, एपीएफ लिगको शीर्ष स्थानमा रहदै दोस्रो चरणमा पुग्न सफल भयो ।

एपीएफसँग पराजित न्यु डाइमण्ड ८ खेलमा १५ अंक जोड्दै लिगको चौंथो स्थानमा रहेर दोस्रो चरणमा पुगेको छ ।

यस्तै, पुलिसले तीन भारतीय खेलाडी रहेको टिम बुलबुले रारा क्लबलाई ३–० को सोझो सेटमा पराजित गर्यो । बुलबुलेलाई पुलिसले २५–१०, २५–१४ र २५–१९ को सेटमा हरायो ।

जितसँगै पुलिस ८ खेलबाट २५ अंक जोडेर लिगको दोस्रो स्थानमा रहेर दोस्रो चरणमा पुगेको छ । बुलबुले १४ अंकसहित पाँचौं स्थानमा रहदै दोस्रो चरणमा पुग्यो ।

शुक्रबार नै भएको खेलमा चितवन टाईग्रेसले आयोजक ढोरपाटनलाई ३–० को सोझो सेटमा हरायो । चितवनले ढोरपाटनमाथि २५–४, २५–१५ र २५–१२ को सेटमा जित निकाल्यो ।

यस्तै त्रिभुवन आर्मी क्लबले चितवन टाईग्रेस ३–० को सोझो सेटमा हराएको छ । आर्मीले चितवनमाथि २५–२०, २५–१६ र २५–२१ को सेटमा जित निकाल्यो । जितसँगै आर्मी ८ खेलबाट २१ अंक जोडेर तेस्रो स्थानमा रहदै दोस्रो चरणमा पुग्यो । चितवन १३ अंक जोडेर लिगको छैंठौं स्थानमा रहेर दोस्रो चरणमा पुगेको छ ।

लिगको दोस्रो चरणको खेल शनिबारबाट सुरु हुनेछ । दोस्रो चरणको पहिलो खेलमा न्यु डाइमण्ड र बुलबुले राराबीच प्रतिस्पर्धा हुनेछ ।

दोस्रो चरणको लिगपछि शीर्ष टोलीले उपाधि जित्नेछ । प्रतियोगिताको विजेताले ४ लाख ५ हजार रुपैयाँ पुरस्कार पाउनेछन् । त्यस्तै उपविजेतालाई २ लाख ५ हजार र तेस्रो हुनेले १ लाख ५ हजार पाउनेछन् । यस्तै चौथौ हुनेलाई ७५ हजार, पाचौँ हुनेलाई ५५ हजार,छैठौं हुनेलाई ४५ हजार र सातौं हुने टिमलाई ३५ हजार नगद पुरस्कार राखिएको आयोजकले जनाएको छ ।

प्रतियोगितामा चार विधामा उत्कुष्ट हुने खेलाडीले यु एम स्कुटर पाउनेछन् । उत्कृष्ट खेलाडी ,उदयमान, बर्ष खेलाडी र प्लेयर अफ द सिरिज बन्ने खेलाडीले स्कुटर पाउनेछन् । त्यस्तै भाग्यशाली एक दर्शक र ग्रेट एचिभमेन्ट अवार्ड विजेतालाई एक एक थान मोटरसाइकल प्रदान गरिनेछ ।

विधागततर्फ उत्कृष्ट हुनेले जनही ७–७ हजार पाउने छन् ।