काठमाडौं । साबिकको विजेता एपीएफले १५ औं संस्करणको ढोरपाटन महिला डबल लिग भलिबल च्याम्पियनसिपमा अपराजित यात्रा कायम राखेको छ ।
नयाँ बसपार्कस्थित ढोरपाटन भलिबल क्लबको मैदानमा बुधबार चितवन टाइग्रेसलाई ३-० को सेटमा पराजित गर्दै एपीएफले जितको यात्रा कायम राखेको हो ।
चितवनमाथि एपीएफले २५-१०, २५-१८ र २५-१० को सेटमा जित निकाल्यो । जितसँगै शीर्ष स्थानको एपीएफले ८ खेलमा २३ अंक जोडेको छ ।
बुधबार त्रिभुवन आर्मी क्लबले दोहोरो जित निकालेको छ । आर्मीले पहिलो खेलमा ढोरपाटन क्लबमाथि २५-९, २५-९ र २५-११ को सेटमा पराजित गर्यो ।
यस्तै दोस्रो खेलमा आर्मीले पारामाउन्ट स्कुललाई २५-१०, २५-२० र २५-९ को सेटमा हरायो । दोहोरो जितसँगै आर्मीले ७ खेलमा १५ अंक जोडेको छ ।
यस्तै न्यु डाईमण्ड स्पोर्ट्सलाई नेपाल पुलिस क्लबले ३-१ को सेटमा पराजित गरेको छ । मुख्य स्पाइकर प्रतिभा माली बिनाको न्यु डाईमण्डलाई पुलिसले १४-२५, २५-१९, २७-२५ र २५-१७ को सेटमा पराजित गर्यो ।
जितसँगै पुलिसले ७ खेलमा १९ अंक जोडेको छ । न्यु डाईमण्डको १२ अंक रहेको छ ।
यस्तै बुलबुले रारा क्लबले चितवन टाइग्रेसलाई २५-१९, २३-२५, २६-२४,२२-१५ र १६-१४ को सेटमा हराएको छ ।
ढोरपाटन स्पोर्ट्स क्लबको आयोजनामा जारी प्रतियोगितामा १० टिमले प्रतिस्पर्धा गरिरहेका छन् । प्रतियोगिताको पहिलो चरणको लिगपछि शीर्ष ७ टिम दोस्रो चरणमा पुग्नेछ । दोस्रो चरणको लिगपछि शीर्ष टिमले उपाधि जित्नेछ ।
प्रतियोगिताको विजेताले ४ लाख ५ हजार रुपैयाँ पुरस्कार पाउनेछन् । त्यस्तै उपविजेतालाई २ लाख ५ हजार र तेस्रो हुनेले १ लाख ५ हजार पाउनेछन् । यस्तै चौथौ हुनेलाई ७५ हजार, पाचौँ हुनेलाई ५५ हजार,छैठौं हुनेलाई ४५ हजार र सातौं हुने टिमलाई ३५ हजार नगद पुरस्कार राखिएको आयोजकले जनाएको छ ।
प्रतियोगितामा चार विधामा उत्कुष्ट हुने खेलाडीले यु एम स्कुटर पाउनेछन् । उत्कृष्ट खेलाडी ,उदयमान, बर्ष खेलाडी र प्लेयर अफ द सिरिज बन्ने खेलाडीले स्कुटर पाउनेछन् । त्यस्तै भाग्यशाली एक दर्शक र ग्रेट एचिभमेन्ट अवार्ड विजेतालाई एक एक थान मोटरसाइकल प्रदान गरिनेछ ।
विधागततर्फ उत्कृष्ट हुनेले जनही ७/७ हजार पाउने छन् ।
