अन्तर्राष्ट्रिय सेल्फ डिफेन्स सम्मेलन सम्पन्न

काठमाडौं । नेपाल सेल्फ डिफेन्स संघद्धारा आयोजित दोस्रो अन्तर्राष्ट्रिय सेल्फ डिफेन्स प्रशिक्षण सम्मेलन राजधानीमा सम्पन्न भएको छ ।

त्रिपुरेश्वरस्थित राखेपको कर्भडहलमा माघ ८ देखि १२ गतेसम्म आयोजना भएको सेल्फ डिफेन्स प्रशिक्षण सम्मेलन सोमबार सम्पन्न भएको हो ।

सम्मेलनमा पोल्याण्डका अन्तर्राष्ट्रिय सेल्फ डिफेन्स एसोसिएसनका ग्रान्ड मास्टर स्टानिस्टो माचेरजाकले सहभागीलाई प्रशिक्षण दिएका थिए । सम्मेलनमा विभिन्न जिल्लाका ६० जना प्रशिक्षक तथा ७०० जना प्रशिक्षार्थीले प्रशिक्षण लिएका थिए ।

कार्यक्रममा नेपालका अध्यक्ष डिबि रानापाललाई मानार्थ सेल्फ डिफेन्स तेश्रो डान, शाखा प्रमुख एवं संघका उपाध्यक्ष सञ्जु महर्जनलाई सेल्फ डिफेन्स पाँचौ डानका साथमा आधा दर्जन बढी पदकद्धारा सम्मान गरिएको थियो ।

त्यस्तै संघका सहायक प्रशिक्षक राधिका ऐर हमाललाई सेल्फ डिफेन्स चौथो डान तथा अन्य पदकद्धारा सम्मान गरिएको थियो।

समापन कार्यक्रममा बोल्दै राखेप सदस्य सचिव रमेश सिलवालले यस्तो सम्मेलन विद्यालयमा सञ्चालन भए अझ राम्रो हुने बताए ।

‘सेल्फ डिफेन्सको सम्मेलन हुनु निकै राम्रो कुरा हो । यसको आवश्यकता महिलालाई मात्र नभई पुरुषहरुलाई पनि पर्छ । त्यसैले अझ यस्तो कार्यक्रम विद्यालयमा भए झनै राम्रो हुन्थ्यो,’ सिलवालले भने ।

यस्तै, संघका उपाध्यक्ष सञ्जु महर्जनले महिला आफैले आत्मसुरक्षा गर्न र आत्मविश्वास जगाउने काम यस संथाले गर्ने बताईन ।

‘विशेषगरी महिलालाई सेल्फ डिफेन्सको धेरै आवश्यकता हुन्छ । धेरै घटना भएको पनि सुनिरहेका छौं,' उनले भनिन्, 'सेल्फ डिफेन्सले महिलामा आत्मविश्वास जगाउनुको साथै आफ्नो सुरक्षा आफैले गर्नसक्ने हुन्छ ।’

यसैगरी उनले विभिन्न गाउँ तथा विद्यालयमा गएर सेल्फ डिफेन्स गर्न सिकाउने योजना रहेको समेत बताईन् ।

‘यहाँबाट सिकेर गएका प्रशिक्षकहरुले गाउँका विद्यालय तथा महिला, पुरुषलाई सेल्फ डिफेन्स गर्न सिकाउने योजना रहेको छ,’ उनले थपिन् ।

सम्मेलन अन्तर्गत काठमाडौंसहित पोखरा, र जनकपुरमा प्रशिक्षण कार्यक्रम आयोजना भएको थियो ।