ईटहरी । स्थानीय बासिन्दाको लामो प्रयासले इटहरी रंगशालाले नयाँ स्वरुप पाउने भएको छ । आगामी फागुनको अन्तिमसम्म रंगशालालाई नयाँ स्वरुपमा तयार गर्न रंगशाला पुर्ननिर्माणको काम भईरहेको छ ।
रंगशालाले नयाँ स्वरुप पाएसंगै ईटहरी रंगशालालाई प्रदेशकै मुख्य रंगशालाको रुपमा चिनाउने स्थानीयको सपनाले मुर्तरुप लिनेछ ।
प्रदेश नम्बर एकको स्पोर्टस् सिटीको रुपमा चिनिएको ईटहरीमा रहेको क्षेत्रीय रंगशालाई संरक्षण र व्यवस्थित बनाउन नसक्दा रंगशालाको अवस्था जिर्ण बनेको थियो ।
रंगशाला बिस्तारको काम सूस्त गतिमा अघि बढ्ने र निर्माणका लागि थोरै रकम किस्ता अनुसार आउँदा योजना अनुसार काम अघि बढ्न सकेको थिएन ।
तर,अहिले फागुनको अन्तिम सातासम्म रंगशालालाई नयाँ स्वरुप दिने उदेश्यले धमाधम काम भईरहेको छ ।
राष्ट्रिय खेलकुद परिषद (राखेप)ले रंगशाला निर्माणका लागि १८ करोड रुपैयाँ बजेट बिनियोजन गरेपछि निर्माणको कामले तिब्रता पाएको हो ।
चैतमा हुने ईटहरी गोल्डकप अघिनै मैदान निर्माणको काम सक्ने तयारी छ ।
‘चैत्रमा हुने गोल्डकप अघिनै मैदानले नयाँ स्वरुप पाउनेछ’ सुनसरी जिल्ला फुटबल संघका अध्यक्ष केशव कार्कीले खेलपाटीसँग भने ।
जिल्ला खेलकुद संघ र जिल्ला फुटबल संघको समन्वयमा ईटहरीस्थित क्षेत्रीय रंशालाको विस्तारको काम अघि बढेको छ ।
रंगशालालाई विस्तार गरेर मोफसलकै आकर्षक रंगशाला बनाउने योजना रहेको कार्कीले बताए ।
रंगशालामा आधुनिक प्यारापिट, भिआईपी प्यारापिट, चेन्जिङ रुम र शौचालय निर्माण हुने क्रममा छ । निर्माणको काम चैत्रको पहिलो साता सुरु हुने इटहरी गोल्डकप अगाडीनै सम्पन्न गर्ने कार्यतालिका छ ।
नेपालगञ्ज र पोखरा रंगशालामा जडान गरिएको प्यारापिट जस्तै रेडिमेट प्यारापिट ईटहरी रंगशालामा जडान गर्ने तयारी गरिएकाे छ ।
आधुनिक किसिमको रंगशाला पहिलो पटक प्रदेश नम्बर एकमा निर्माण हुन लागेको अध्यक्ष कार्की बताउँछन् ।
कार्कीका अनुसार रंगशालालाई आकर्षक बनाउने उदेश्यले सुरुवातमा जग बसाउने र विस्तारै निर्माणको थालनी गरिएको हो ।
रंगशाला निर्माणका लागि अवश्यक सामाग्री भारतको कलकत्ताबाट आयात गरिएको छ ।
निर्माणधिन रंगशालामा अहिले फलाम हाल्ने काम अन्तिम चरणमा पुगेको छ । लगत्तै शौचालय र चेन्जिङ रुपमा आधार निर्माण गरि प्यारापिट जडानको काम सुरु हुनेछ ।
नयाँ प्यारापिट निर्माणसंगै रंगशालाको दर्शक क्षमता ८ हजार बढीको रहनेछ । अहिले ५ हजार दर्शक क्षमताको रंगशालामा नयाँ प्यापिट जडानपछि ३५ सय देखि ४ हजार दर्शक क्षमता बढ्नेछ ।
फागुन सम्ममा रंगशाला बिस्तारको काम सकिए चैतको पहिलो साता सुरु हुने इटहरी गोल्डकपलाई भव्य बनाउने जिल्ला फुटबल संघ सुनसरीको योजना छ ।
रंगशालामा अत्याधुनिक प्यापिट निर्माणको काम सकिएपछि घाँसे मैदानलाई पनि आकर्षक बनाउने योजना रहेको कार्कीले जानकारी दिए ।
‘घाँसे मैदानलाई पनि अघिल्लो बर्ष भन्दा धेरै फरक बनाउने योजनामा छौँ ।’ कार्कीले भने ।
उनका अनुसार झण्डै १ करोड बजेटमा मैदानलाई संरक्षण गर्न तार, जाली तथा पर्खाल लगाउने काम पनि तत्कालै अघि बढ्नेछ ।
ईटहरीलाई प्रदेशको खेलुकदको हबको रुपमा विकास गर्ने योजना सहित अघि बढेपनि फुटबल गोल्डकप जस्ता ठुला प्रतियोगितामा दर्शकलाई ब्यवस्थापन गर्न आयोजकलाई कठिन हुदै आएको छ । तर रंगशालाले नयाँ स्वरुपसंगै सबै समस्या समाधान हुने स्थानीय बताउँछन् ।
सुनसरीको इटहरीमा हुने फुटबल गोल्डकपमा दर्शकको चाप अत्याधिक हुने गरेको छ । यसअघि मदनभण्डारी गोल्डकप र इटहरी गोल्डकप गरि दुई छुट्टा–छुट्टै फुटबल प्रतियोगिता सञ्चालन हुने गरेको थियो । प्रतियोगिताका सबै खेल प्राय जनता मैदानमा हुँदै आएको थियो ।
तर, अघिल्लो वर्ष दुई गोल्डकप मर्ज भएर मदन भण्डारी (इटहरी) गोल्डकपको रुपमा सञ्चालन भईरहेको छ ।
दर्शकको चाप समेत अत्याधिक भएपछि आयोजकलाई रंगशालाको क्षमता विस्तार गर्नुपर्ने चुनौती थपिएको स्थानीय बताउँछन् ।
‘रंगशालामा केही हजार दर्शकमै सिट भरिने अबस्था छ । सोही कारण भिआईपी लगायतको आधुनिक प्यारापिटको विकल्प सोचिएको हो ।’ कार्कीले बताए ।
सर्वाधिक पुरस्कार राशीको ईटहरी गोल्डकपलाई पुरस्कार राशीसंगै स्तरीय मैदानको रुपमा चिनाउने लक्ष्य जिल्ला फुटबल संघले राखेको छ ।
इटहरी र मदन भण्डारी स्मृतिमा हुँदै आएको गोल्डकपलाई राष्ट्रिय खेलकुद परिषद् (राखेप)का तत्कालिन सदस्य सचिव केशवकुमार विष्टले मर्ज गरेर मदन भण्डारी इटहरी गोल्डकपको रुपमा सञ्चालन गर्न सहयोग गरेका थिए ।
७४ सालमा मर्ज भएको प्रतियोगिताको पहिलो उपाधि थ्रीस्टार क्लबले जितेको थियो । चिरप्रतिद्वन्दी मनाङलाई १–० गोल अन्तरले पराजित गर्दै पहिलो संस्करणको उपाधि थ्री स्टारले हात पारेको थियो ।
७५ सालमा भएको दोस्रो संस्करणको उपाधि त्रिभुवन आर्मी क्लबले जितेको थियो । फाइनलमा मनाङलाई २–० गोल अन्तरले पराजित गर्दै विभागीय टिम आर्मीले उपाधि जितेको थियो ।
