काठमाडौं । ए डिभिजन लिगमा आईतबार मछिन्द्र र जावलाखेल भिडे । जावलाखेलको अपराजित यात्रा टुङ्गाउँदै मछिन्द्रले १–० को जित दर्ता गयो ।
विशाल राईले निर्णायक गोल गरे । मछिन्द्र शीर्ष स्थानमा उक्लियो ।
दिनको दोस्रो खेलमा मनाङ मस्र्याङ्दी क्लब हिमालयन शेर्पासंग बराबरीमा रोकिएसंगै मछिन्द्र कम्तिमा दुई दिनका लागि लिग तालिकाको लिडर बन्यो ।
मछिन्द्र यस पटक लिग जित्ने अभियानमा छ । उसले मनाङ र थ्री स्टारका अधिकांश स्टार खेलाडी क्लबमा लिएको छ । राष्ट्रिय टिमका अधिकांश अनुहार प्लेईङ सेटमा देखिएपनि मछिन्द्रलाई बेन्च खेलाडीको समस्या देखिएको छ ।
गत मंगलबार पुर्व लिग विजेता मनाङ र मछिन्द्रले २–२ खेलको बराबरी खेले । खेल लगत्तै केही खेलाडी हातपातमा समेत उत्रिए । एन्फाले दुवै क्लबका समान ३ खेलाडीलाई लिग खेलमा प्रतिबन्ध गर्यो ।
मछिन्द्रका विजय धिमाल, देबेन्द्र तामाङ र दिपक राईले दुई खेलको प्रतिबन्ध ब्यहोरे ।
एन्फाको कारबाहीपछि लिग खेलमा मैदान उत्रिएको मछिन्द्रको प्लेयर बक्स आईतबार खाली देखिन्थ्यो ।
जावलाखेलविरुद्ध उसले बेन्चमा ४ जना मात्रै खेलाडी जम्मा पार्न सक्यो ।
लिग फुटबल भनेकै लामो समय खेल्ने प्रतियोगिता हो । जसमा खेलाडीले चोट बोक्ने, खेल्न नसक्ने धरै सम्भावना रहन्छ । लिग उपाधि जित्न बेन्च समेत बलियो हुनुपर्ने अन्तराष्ट्रिय मान्यता छ ।
तर मछिन्द्रले प्लेईङ सेटमा ठुलो रकम खर्च गरेपनि बेन्च खेलाडीमा खासै वास्ता गरेको देखिएन ।
लिग जित्न ठुला क्लबबाट स्टार खेलाडी किनेर मछिन्द्रले सुरुवातमा १८ खेलाडी सार्वजनिक गरेको थियो । एक प्रकारले मछिन्द्रले बेन्चमा धेरै खर्च गर्न चाहेको देखिएन ।
जसको मार मछिन्द्रले जावलाखेलविरुद्धको खेलमा ब्यहोर्याे ।
तीन खेलाडी कारबाहीमा परेपछि उसलाई १–० को अग्रता जोगाउन हम्मे हम्मे परेको थियो ।
सुरुवातमा प्रशिक्षक कटुवालले देबेन्द्रको अभावमा टिमलाई ३–५–२ ढाँचामा टिम उतारेका थिए ।
दोस्रो हाफमा जावलाखेलले निरन्तर दबाब बढाएपछि मिडफिल्डर विशाल राईलाई बाहिर निकाल्दै पहिलो पटक लिग खेल्दै गरेका डिफेन्डर बिमल राईलाई मैदान छिराएका थिए । त्यसपछि मछिन्द्रले ४–३–३ को फर्मेसनमा बाँकी खेल खेल्यो ।
खेलपछि मछिन्द्रका प्रशिक्षक प्रवेश कटुवालले एन्फाको कारबाहिले टिमलाई ठुलै घाटा लागेको बताए । उनले बेन्चमा खेलाडी नहुँदा समस्या परेको बताए ।
‘कारबाहीको कारण समस्या भयो । बैकल्पिक खेलाडी नहुँदा झनै गाह्रो भयो । विजय र देबन्द्रनै नहुँदा जुनियर खेलाडी मैदान छिराए ।’ उनले भने ।
उनले आफ्ना खेलाडीमाथि गरिएको कारबाहीमा एन्फासंग असन्तुष्टि जनाए । आफ्ना खेलाडीले कुनै गल्ती नगरेको उनको जिकिर थियो ।
एन्फाले लिगमा एक टिमले ४५ खेलाडीसम्म दर्ता गर्न पाउने नियम बनाएको छ ।
लिगको छैठौ चरणको खेल सकिँदासम्म पनि खेलाडी दर्ता गर्ने समय सकिएको छैन । स्टार खेलाडीलाई ठुलो रकम खर्चेको मछिन्द्रले लिगमा आवश्यक पर्ने बेन्चमा खासै लगानी गरेको देखिएन ।
जावलाखेलविरुद्ध मछिन्द्रले प्लेयर लिष्टमा ७ खेलाडीनै लेखाएको थियो । तर प्लेयर बक्समा भने जम्मा ४ खेलाडीमात्र थिए ।
एन्फाको प्लेयर बक्समा टिमका ९ खेलाडी र ७ अफिसियललाई फिल्डमा रहन दिन्छ । अन्य दर्ता भएका खेलाडी भने दर्शकदिर्घामा बस्नुपर्ने हुन्छ ।
अन्य क्लबले ९ जनासम्म खेलाडी बेन्चमा राख्दा मछिन्द्रले ७ खेलाडीमात्रै राख्दै आएको छ ।
अझ आईतबार भने ४ खेलाडीमात्रै देखिए ।
प्रशिक्षक कटुवालले स्थानीय खेलाडी खेल्न नआउँदा ४ खेलाडीमात्रै रहेको बताए ।
‘बेच्चमा ७ खेलाडी त हो । तर स्थानीय खेलाडी नआउँदा बेच्नमा ४ खेलाडीमात्रै भए ।’ उनले थपे ।
दुई खेलाडीमात्रै परिवर्तन गर्न पाएका कटुवालले बताए ।
मछिन्द्रको बेन्चमा बुद्ध राज लिम्बु, सुर्य अधिकारी, बिमल प्रसाद राई र सुमन महर्जन रहेका थिए ।
कट्वालले स्थानीय भनेर बताएका मनिल रत्न शाहि, प्रदिप कार्की र राज श्रेष्ठ भने बेन्चमै थिएनन् ।
लिगमा पहिलो हार ब्यहोरेका जावलाखेलका प्रशिक्षक नरेश थापाले मछिन्द्रको बैकल्पिक खेलाडी नहुँदाको फाईदा आफ्नो टिमले उठाउन नसकेको प्रतिक्रिया दिएका थिए ।
