'गोल मेसिन' को आगमन !
काठमाडौ । करिब ५ बर्षपछि दशरथ रंगशालामा सोमबार घरेलु लिग फुटबल फर्किएको थियो ।
भुकम्पले रंगशाला क्षतिग्रस्त बन्दा लामो समय हुन नसकेको लिगको खेल सोमबारबाट सुचारु बन्यो ।
नयाँ सिजनको लिगको उद्घाटन खेल दशरग रंगशालामा गर्ने भनिएपनि बर्षाले मैदान हिलाम्य बन्दा पहिलो खेल कम्प्लेक्समा गरिएको थियो ।
तर लिगको तेस्रो खेल रंगशालामा हुन पुग्यो । मैदानमा च्यासल र संकटा युथ क्लब थिए ।
खेलअघि सबैको ध्यान साहुखल परिवारमा थियो । राष्ट्रिय फुटबल टिमका पुर्व फरवार्ड सन्तोष साहुखल लिग खेल्न स्वदेश फर्किएका थिए । उनले लिग खेल्न च्यासललाई रोजेका थिए । सन्तोषका दाजु बालगोपाल साहुखल पहिलो पटक प्रशिक्षकको रुपमा ए डिभिजन क्लबको नेतृत्व गर्दै थिए ।
सोमबारको दिन दुवैका लागि विशेष रह्यो । च्यासलले खेल २–० ले जित्यो । दुवै गोल सन्तोषले गरे । अनि सन्तोषकै गोलमा बालगोपालले लिगको डेब्यु खेलमा सुखद सुरुवात गरे ।
सन्तोषले रंगशालमा युवा अवस्थाको जस्तै लय देखाएका थिए । खेल अवधिभर संकटाका डिफेन्डरलाई सन्तोषले दबाबमा राखे ।
लामो समय भयो, सन्तोष घरेलु फुटबलबाट हराएको । गत सिजन केही खेल खेल्न मात्र उनी नेपाल आएका थिए ।
तर सोमबारकाे खेलमा उनको प्रभाव उस्तै देखिन्थ्याे ।
यसै हप्ता नेपाल फर्किएका सन्तोषले पहिलो र दोस्रो हाफमा एक–एक गोल गरे । पहिलो गोल खेलको ४१ औं मिनेटमा गरे । हेमन्त थापा मगरले मिलाएको सहज पासमा उनको फिनिसिङ उत्कृष्ट थियो । दोस्रो गोल खेल सक्किन ६ मिनेट अघि गरे । यसपटक अमिर श्रेष्ठले पास मिलाएका थिए ।
सुरुवाती खेलमै दुई गोल गर्दा सन्तोष खुसी देखिन्थे ।
'पहिलो खेलमै गोल गरे खुसी छु ।' सन्तोषले भने ।
गत बर्ष घरेलु फुटबलमा फर्किएका सन्तोष केही खेल लगत्तै जापान फर्किएका थिए ।
यसपटक पुरै लिग सकेर उनी जापान जाने योजनामा छन् ।
दोस्रो पटक घरेलु लिग खेल्न जापानबाट नेपाल आएका उनले नेपाली फुटबलको स्तरको चर्चा गरे । उनले घरेलु फुटबलको स्तर खासै नबढेको प्रतिक्रिया दिए ।
'नेपाली फुटबलको स्तर बढेको छैन । पहिलेको भन्दा पनि खस्केको जस्तो लाग्छ ।' उनले भने ।
आखिर किन त ?
समयमै लिग नहुनु र खेलाडी स्वयमले आफ्नो स्तरलाई ध्यान नदिएको उनको कथन छ ।
'लिग राम्रो छैन । खेलाडी स्वयम फिटनेशमा ध्यान दिदैनन् ।' उनले भने ।
राष्ट्रिय टिमबाट बाहिर रहेका सन्तोषले सन्यास लिएका छैनन् ।
उनकै ब्याजका अनिल गुरुङ्ले सन्यास लगिसकेका छन् ।
सन्तोष र जुमानु राई भने सन्यासको पर्खाईमा छन् ।
अनिल हाल ब्रिगेड ब्वाईजबाट खेल्दैछन् । जुमानु नेपाल पुलिसबाट लिग खेल्दैछन् ।
सन्तोष आफु स्वयम नेपालमा रहँदा फिटनेस र खानामा ध्यान नदिने गरेको बताउँछन् ।
'नेपाल हुँदा म पनि त्यस्तै थिए । तर जापानमा ख्याल गरे । जसको प्रभाब अहिले देखिन्छ ।' उनले भने ।
गतबर्ष च्यासलबाट खेलका सन्तोषले ३ गोल गरेका थिए ।
संकटाविरुद्ध एक गोल गरेका उनले एनआरटी र हिमालयन शेर्पाविरुद्व समेत एक–एक गोल गरेका थिए ।
घरेलु लिग फुटबलका सर्वाधिक गोलकर्ता सन्तोष सय गोलको नजिक छन् । अब उनी दुई गोलले मात्र पछाडी देखिन्छन् ।
लिगमा अझै १२ खेल बाँकी छ । दुई गोल पुरा गरेमा उनले घरेलु फुटबलमा सर्वाधिक सय गोलको नयाँ कीर्तिमान बनाउनेछन् ।
