काठमाडौं । सन् १९९३ मा नेपाललाई दक्षिण एसियाली खेलकुद (साग) मा फुटबलतर्फ स्वर्ण पदक दिलाउने हर्ताकर्ता थिए, बाल गोपाल महर्जन ।
त्यसयता नेपालले एक पटक मात्रै सागमा स्वर्ण पदक जितेको छ ।
खेलाडीको रुपमा देशलाई स्वर्ण जिताएका उनै बाल गोपाल अब प्रशिक्षकको भूमिकामा देशलाई स्वर्ण दिलाउने संघारमा पुगेका छन् ।
तर, प्रशिक्षक महर्जनले खेलाडी र प्रशिक्षकको रुपमा स्वर्ण जितेमा त्यो संयोग मात्र हुने बताईसकेका छन् ।
नेपालले १३ औं सागको फाइनल खेलमा आज (मंगलबार) भुटानको सामना गर्दैछ ।
भुकम्पपछि बनेको दशरथ रंगशालामा नेपालले १३ औं सागको समापनमा फुटबलको फाईनल खेल खेलाउने तयारी गरेको हो ।
खेल दिउसो ३ बजे हुनेछ ।
पहिलो पटकको सागको इतिहासमा फाइनल पुगेको भुटान र पाचौं पटक फाइनल पुगेको नेपाल बीचको खेल प्रतिस्पर्धात्मक हुने अनुमान लगाउन सकिन्छ ।
भुटान पछिल्लो समय दक्षिण एसियाली फुटबलमा उदाउँदो शक्तिको रुपमा अगाडी बढेको छ । उसले घरेलु फुटबलमा ठुलो लगानी गरेको छ । ग्रासरुट फुटबलमा गरेको लगानीले अहिले सिनियर स्तरमा ठुलै प्रतिफल दिईरहेको छ ।
यसअघि समूह चरणबाट बाहिरिने भुटान यसपटक आयोजक नेपाल बाहेक सबै राष्ट्रलाई हराउँदै फाईनल पुग्ने पहिलो टोली बन्यो ।
पहिलो खेलमा भुटानलाई नेपालले ४–० गोल अन्तरले हराएको थियो ।
सागको फुटबललाई विश्व फुटबलको सर्वोच्च निकाय फिफाको बार्षिक क्यालेन्डरमा समावेश नगरेपछि भारतले पुरुष फुटबल खेलेन । नेपाल प्रतियोगितामा अपराजित छ ।
पहिलो खेलमा नेपालले भुटानलाई ४–० गोल अन्तरले हराएको थियो । दोस्रो खेलमा श्रीलंकासँग १–१ को बराबरी खेलेको नेपालले तेस्रो खेलमा माल्दिभ्सलाई २–१ गोल अन्तरले हराएको थियो । अन्तिम खेलमा नेपालले बंगलादेशलाई १–० ले हराएको थियो ।
बगलादेशलाई हराउँदै नेपाल लगातार दोस्रो पटक सागको पुरुष फुटबलमा फाईनल प्रवेश गर्यो ।
सन् २०१६ मा भारतको गुहावटीमा भएको फाइनलमा नेपालले घरेलु टोलीलाई हराउँदै उपाधि उचालेको थियो ।
भुटान फुटबलको इतिहासमै पहिलो पटक सागको फाइनल पुगेको हो ।
भुटानले उद्घाटन खेलमा बंगलादेशविरुद्ध १–० को अप्रत्यासित जित निकालेको थियो ।
दोस्रोमा नेपालसँग पराजित भएपनि तेस्रोमा माल्दिभ्सलाई २–१ गोल अन्तर र अन्तिममा श्रीलंकालाई ३–१ गोल अन्तरले हराएको थियो ।
सागको पुरुष फुटबलको उपाधि पाकिस्तानले ४ पटक तथा नेपाल र भारतले समान ३ पटक जितेका छन् । यस्तै बंगलादशेले २ पटक उपाधि हात पार्दा भुटान, बंगलादेश र माल्दिभ्स उपाधि विहिन छन् ।
पहिलो पटक फाईनल प्रवेश गरेको भुटान उपाधि भिडन्तमा नतिजा नेपाललाई सुम्पिन चाहदैन । भुटानविरुद्ध सिनियर स्तरका प्रतियोगितामा नेपालनै हाबी हुदै आएको छ ।
तर, पछिल्लो समय अन्डरडगको परिचय बनाएको भुटानले उमेर समूहमा निकै राम्रो नतिजा निकाल्दै आएको छ ।
उसले यू–१६ र यु-१९ नेपाली टिमलाई पराजित गरिसकेको छ । दक्षिण एसियाली फुटबलमा राम्रो प्रभाव जमाईरहेको भुटानलाई कम आँक्नु नेपालको ठुलो भुल हुन सक्छ ।
