काठमाडौं । टेनिस पश्चिमी देशको चर्चित खेल हो । तर, पूर्वी राष्ट्रमा यसलाई रुचाउने समर्थक पाउन मुश्किल पर्छ ।
दक्षिण एसियाली खेलकुदमा टेनिस ढिलै समावेश भयो । साग सुरुवात भएको चौथो संस्करणपछि मात्र यसलाई समावेश गरियो । विद्यालय स्तरमा निकै खेलिएपनि यसले व्यवासीयक रुप धारण गर्न सकेन ।
घरेलु खेलकुदमा ‘एलिट’ वर्गको खेलको परिचय टेनिसले मेट्न सकेको छैन । यस्तै सागको ईतिहासमा टेनिस सहभागितामै मात्र सिमित छ ।
दक्षिण एसियामा भारत र श्रीलंकाको दबदबा टेनिसले तोड्न सकेको छैन । सोही कारण टेनिस सधै पछाडी पर्दै आएको छ । साग ईतिहासमा पदक विहिन छ ।
ईतिहास –
सन् १९९१ म श्रीलंकाको कोलम्बोमा भएको सागबाट मात्र टेनिसले औपचारिक प्रवेश पाएको हो । पहिलो संस्करणमै नेपाले सहभागीता जनायो ।
सुरुवाती तीन संस्करण टेनिस लगातार आयोजना भयो । त्यसपछि पुन यसमा ब्रेक लाग्यो ।
सन् २००४, २००६ र २०१० मा टेनिसले सागमा स्थान पाउनै सकेन । गत संस्करणको सागमा यसलाई पुन समावेश गरियो । नेपालमा आयोजना हुन लागेको १३ औं सागमा टेनिसका महिला र पुरुष स्पर्धामा समावेश छन् ।
सन् १९९१, १९९३, १९९५ र २०१६ मा आयोजित सागमा सहभागीता जनाएपनि नेपालले खासै उपाधि हात पार्न सकेको छैन ।
तयारी र पदक –
सागमा पदक विहिन टेनिले यसपटक नतिजा निकाल्ने लक्ष्य लिएको छ । अर्थात टेनिस यसपटक पदक जित्ने लक्ष्य राखेको छ । घरेलु मैदानमा हुने प्रतियोगितामा पदक जित्न टेनिसका खेलाडीलाई नेपाली तथा श्रीलंकन खेलाडीले प्रशिक्षण गराईरहेका छन् । खेलाडीहरु दिनको कम्तिमा ६ घण्टा कोर्टमा बिताउने गर्छन् ।
करिब ५ महिनादेखि तीन चरणमा प्रशिक्षणमा व्यस्त रहेका खेलाडीले घरेलु समर्थकलाई निराश नपार्ने विश्वास लिएको नेपाल टेनिस संघकी अध्यक्ष ज्योती राणाले बताउँछिन् ।
’भारत र श्रीलंका निकै बलियो टिम हो । त्यसैले स्वर्ण नभएपनि कम्तिमा कास्य दिलाउने विश्वास लिएका छौ,’ राणाले भनिन्, ’टेनिसमा तेस्रो र चौथोलाई तेस्रोको पदक दिने गरिन्छ । यस पटक टेनिसमा पदक आउने आश छ ।’
नेपालको मुख्य लक्ष्य रजत पदक रहेको छ । टेनिसतर्फ दक्षिण एसियाका सबै राष्ट्रले सहभागिता जनाउने छन् । नेपालको मुख्य चुनौती भारत र श्रीलंका हो । टिम इभेण्ट्समा नेपालको पदक जित्ने बलियो सम्भावना रहेको राणाले जानकारी गराइन् ।
साग खेल्ने टेनिस खेलाडी :
महिलातर्फ : प्रेरणा कोइराला, सलोनी तामाङ, अभिलाषा विष्ट, आइरा यम राउत, राएना शाह र प्रकृति श्रेष्ठ
पुरुषतर्फ : समरक्षक भूषण बज्राचार्य, प्रणव खनाल, प्रदीप खड्का, सन्तोष खत्री, सम्यक भूषण बज्रचार्य र नविन मगर
