३८ वर्षको उमेरमा जोकोभिचको नयाँ कीर्तिमान 

काठमाडौं। नोभाक जोकोभिचले ३८ वर्षको उमेरमा नयाँ कीर्तिमान रचेका छन्।

आइतबार उनले यूएस ओपनको अन्तिम १६ मा जर्मनीका ३५ वर्षीय यान–लेनार्ड स्ट्रफलाई ६–३, ६–३, ६–२ ले पराजित गर्दै एकै सिजनमा सबै चार ग्रान्डस्लामको क्वार्टरफाइनल पुग्ने सबैभन्दा पाको पुरुष खेलाडी बने।

यस जितसँगै जोकोभिचले आफ्नो करिअरको ६४औं ग्रान्डस्लाम क्वार्टरफाइनलमा प्रवेश गर्दै आफ्नै सर्वकालीन रेकर्डलाई अझ विस्तार गरेका छन्। साथै, उनले कीर्तिमानी २५औं ग्रान्डस्लाम उपाधि जित्ने लक्ष्य पनि जीवित राखेका छन्।

अर्थर एस स्टेडियममा भएको १०९ मिनेट लामो खेलमा जोकोभिचले स्ट्रफको सर्भलाई ६ पटक ब्रेक गर्दै सुरुदेखि नै दबदबा जमाए। ‘कति अवसर अझ बाँकी हुन्छ, थाहा छैन। त्यसैले प्रत्येक क्षण निकै विशेष लाग्छ। यहाँ उपस्थित सबैलाई धन्यवाद भन्न चाहन्छु,’ जितपछि जोकोभिचले प्रतिक्रिया दिए।

विश्व नम्बर १४४ मा रहेका स्ट्रफ यसअघि दुई जना वरीयता प्राप्त खेलाडीलाई हराउँदै पहिलोपटक यूएस ओपनको चौथो चरण पुगेका थिए। तर, सातौं वरीयता प्राप्त जोकोभिचविरुद्ध उनले खासै दबाब दिन सकेनन्।

स्ट्रफले प्रतियोगितामा ६६ ‘एस’ प्रहार गर्दै पुरुष वर्गमा दोस्रो उच्च ‘एस’ संख्याका साथ प्रतियोगिता छाडे। तर, जोकोभिचविरुद्ध उनले पहिलो सर्भ आधाभन्दा कम मात्रै सफल गराए, जसकारण आफ्नो मुख्य हतियार कमजोर हुँदै गयो र जोकोभिचलाई फाइदा पुग्यो।

चार पटकका यूएस ओपन च्याम्पियन जोकोभिच लगभग अपराजेय देखिए। उनले खेलमा १२ ‘एस’ प्रहार गरे र पहिलो सर्भबाट ७९ प्रतिशत अंक जिते।

‘सर्भ राम्रो हुँदा निश्चित रूपमा खेल सजिलो हुन्छ। अघिल्लो चरणमा पनि मैले उत्कृष्ट सर्भिङ गरेको थिएँ, आज पनि त्यस्तै भयो,’ उनले भने।

उनले थपे,‘मैले एक तथ्यांक हेरें यस पटक प्रतियोगितामा सबैभन्दा बढी एस प्रहार गर्ने खेलाडीमध्ये एकलाई मैले सर्भमा नै हराएँ। त्यो विशेष कुरा हो र यसले कोर्टमा मलाई सजिलो बनाउँछ।’

खेलका क्रममा जोकोभिचले दायाँ काँध र हातमा फिजियोबाट उपचार पनि लिएका थिए। अब  क्वार्टरफाइनलमा अमेरिकन खेलाडी टेलर फ्रिट्जसँग भिड्नेछन्।