बाढीपीडितलाई सहयोग गर्न सगरमाथाले राख्यो प्रधानमन्त्री कोषको क्युआर

काठमाडौं। नेपाल भलिबल लिग (एनभीएल)को फ्रेन्चाइजी सगरमाथा स्म्यासर्सको जर्सीमा एक कुरा नोटिस गर्नुभएको छ।

टोलीको जर्सीको अगाडि भागमा मुख्य प्रायोजक हुनुपर्ने हो। तर, उक्त भागमा कुनै व्यावसायिक संस्था नराखी एक ठूलो ‘क्युआर’ राख राखिएको छ। धेरैलाई खुलदुली होला उक्त ‘क्युआर’ के को होला ?

त्यो ‘क्युआर’ अरु केहीको नभई प्रधानमन्त्री दैवी प्रकोप उद्धार कोषको हो। गत १० भदौमा रसुवाको भोटेकोशी नदीमा आएको विनाशकारी बाढीले ठूलो जनधनको क्षति गरेको थियो।

खेलकुद क्षेत्रका थुप्रै संघसंस्थाले आ–आफ्नो ठाउँबाट सहयोग गरिरहेका छन्। तर, सगरमाथाले भने केही फरक देखाउँदै बाढीपीडितको उद्धार तथा राहतमा ऐक्यबद्धता जनाउन क्युआर राखेको टिमका प्रमोटर शनिराज भण्डारीले जानकारी दिए ।

‘यस्तो विपद्मा सबैले आ–आफ्नो ठाउँबाट गरेको सानो प्रयासले पनि सरकार र सम्बन्धित निकायलाई ठूलो बल पुग्छ भन्ने लागेर क्युआर राखेका हौं,’ उनी भन्छन्।

यसअघि आयोजकले सगरमाथा र मधेस वारियर्सबीच भएको एनभीएल उद्घाटन खेलको टिकट बिक्रीबाट प्राप्त हुने सम्पूर्ण रकम प्रधानमन्त्री दैवी प्रकोप उद्धार कोषमा जम्मा गर्ने जानकारी दिइसकेको छ ।

त्रिपुरेश्वरस्थित राष्ट्रिय खेलकुद परिषद्को कभर्ड हलमा भएको उक्त खेलमा सगरमाथाले मधेस वारियर्सलाई ३–१ को सेटमा हराएको थियो। खप्तड फाल्कन्सलाई ३–० को सोझो सेटमा पराजित गरेको थियो।