डर्टमन्डको रोमाञ्चक पुनरागमन

काठमाडौं। बोरुसिया डर्टमन्डले शनिबार बुन्डेसलिगामा होफेनहाइममाथि ३–२ को रोमाञ्चक जित निकालेको छ। डर्टमन्डको यो सिजनको यो लगातार दोस्रो जित हो।

घरेलु टोली होफेनहाइमले दोस्रो हाफ सुरु भएको १० मिनेटमै टिम लेम्पर्ले र लियोन अव्दुल्लाहुको गोलमा २–० को अग्रता बनाएको थियो। तर‚ डर्टमन्डले शानदार पुनरागमन गर्दै खेल आफ्नो पक्षमा पार्‍यो।

सेर्हु गुइरासीले डर्टमन्डका लागि एक गोल फर्काए। ६६औं मिनेटमा फाबियो सिल्भाले गोल गर्दै खेल २–२ को बराबरीमा ल्याए। खेल सकिन चार मिनेट बाँकी रहँदा होफेनहाइमका अल्बियन हाजदारीले पेनाल्टी क्षेत्रभित्र आएको बल क्लिअर गर्ने क्रममा आफ्नै पोस्टमा गोल गरेपछि डर्टमन्डले ३–२ को अग्रता लियो।

त्यसपछि उसले अग्रता जोगाउँदै तीन अंक हात पार्‍यो।