काठमाडौं । अखिल नेपाल फुटबल संघ (एन्फा) ले महिला फुटबलको टेक्निकल डिरेक्टर (प्राविधिक निर्देशक) मा नोरीयो सुकितातेलाई नियुक्त गरेको छ ।
एन्फाले निकै अनुभवी जापानिज प्रशिक्षक नोरीयोलाई महिला फुटबलको प्राविधिक निर्देशक नियुक्त गरेको हो ।
जापान फुटबल एसोसियसन (जेएफए) को सहयोगमा एन्फाले नोरीयोलाई नियुक्त गरेको हो । नोरीयो केहि दिन अघि नै नेपाल आईसकेका छन् ।
एन्फाका अध्यक्ष कर्मा छिरिङ शेर्पाले जेएफएलाई महिलाको मुख्य प्रशिक्षकको माग गरेको तर कोटा खाली नहुँदा जेएफएले टेक्निकल डिरेक्टर नोरीयोलाई पठाएको जानकारी गराए ।
![](https://scontent.fktm7-1.fna.fbcdn.net/v/t1.15752-9/75220656_964420587257228_250021290524540928_n.jpg?_nc_cat=109&_nc_oc=AQl90Mfco5tFOEG2fJmeUXCxEkwTpcvnjQsc5wAAKoyONGiA9HONuxCGB9DsAyQzfjo&_nc_ht=scontent.fktm7-1.fna&oh=4336e5f1cd8375503532d22a59370fab&oe=5E52F746)
नोरीयोले सुरुवातमा तीन महिनाका लागि महिलाको टेक्निकल डिरेक्टर भएर काम गर्ने छन् । त्यसपछि उनको काम हेरेर एन्फाले नियुक्तिको बाँकि प्रक्रिया अघि बढाउने छन् ।
नेपाल रहदा नोरीयोको सम्पूर्ण खर्च जेएफएले व्यहोर्ने छ ।
अनुभवी प्रशिक्षक नोरीयोले टिमोर लिस्टे, भुटान,लाओस र गुवामको राष्ट्रिय पुरुष टिमको मुख्य प्रशिक्षक भएर काम गरिसकेका छन् । यस्तै उनले बंगलादेशको महिला टिमको मुख्य प्रशिक्षक भएर पनि काम गरिसकेका छन् ।
एन्फाले यस अघि पुरुष टिमको प्राविधिक निर्देशकमा ग्यारी फिलिप्सलाई नियुक्त गरीसकेको छ ।