अनिषले जिते लिगलिगे दाैड

काठमाडौं । यस वर्षको लिगलिगे दौडको उपाधि पर्वतका अनिष थापाले जितेका छन् ।

दशैको अवसरमा गोरखामा प्रत्येक वर्ष आयोजना हुने दौडमा पहिलो हुदै अनिषले चौथो पटक उपाधि जित्न सफल भएका हुन् । पहिलो भएका उनले श्रीपेच समेत पहिरिने मौका पाए ।

उनले निर्धारित दुरी १३ दशमलव ८ किलोमिटर ५७ मिनेट ५५ सेकेन्डमा पुरा गरे । श्रीपेच सहित उनले ६० हजार रुपैयाँ प्राप्त गरे ।

आर्मीका खगेन्द्रबहादुर भाट दोस्रो भए । उनले निर्धारित दुरी १ घण्टा १ मिनेट ८ सेकेन्डमा पुरा गरे । आर्मीकै राम्जी बस्नेत १ घण्टा १ मिनेट २४ सेकेन्डमा दौड पुरा गर्दै तेस्रो भए ।

दोस्रो भएका खगेन्द्रले ३५ हजार र तेस्रो भएका राम्जीले २५ हजार रुपैयाँ प्राप्त गरे ।

मर्स्याङ्दी नदीको दोभानबाट सुरु भएको दौड, ढिकीडाँडा, काँटीपोखरी, पानी ट्याकी, दर्बेपानी, बिजुलीडाँडा हुदै लिगलिगकोट गढीमा पुगेर सकिएको थियो ।

नेपाल एकीकरण अघि बाईसे चौबीसे राज्यमध्य लिगलिगकोटमा दौडेर पहिलो हुने ब्यक्ति राजा हुने परम्परा थियो ।

सोही परम्परालाई निरन्तरता दिदै आन्तरिक र बाह्य पर्यटन आकर्षित गर्ने उद्वेश्यले गोरखामा प्रत्येक वर्ष प्रतियोगिता आयोजना हुदै आएको छ ।