काठमाडौं । नयाँ नेतृत्व चयनका लागि नेपाल क्रिकेट संघ (क्यान) को विशेष साधारण सभा सुरु भएको छ ।
राजधानीको मेरियट्स होटलमा क्यानको साधारण सभा सुरु भएको हो । साधारण सभाको उद्घाटन युवा तथा खेलकुद मन्त्रि जगत बहादुर विश्वकर्माले गरे ।
साधारण सभाको बन्द शत्र अपरान्ह ४ बजे सुरु हुनेछ । नेतृत्व चयनका लागि निर्वाचन भने शनिबार हुनेछ ।
नयाँ नेतृत्वका लागि पूर्व अध्यक्ष विनयराज पाण्डे र निलम्बित क्यानका अध्यक्ष चतुरबहादुर चन्दबीच प्रतिस्पर्धा हुनेछ । क्यानको निर्वाचित कमिटि १७ सदस्यीय बन्नेछ ।
कार्यक्रममा बोल्दै मन्त्रि विश्वकर्माले सर्वसम्मतले नेतृत्व चयन गर्न आग्रह गरे । यस्तै सदस्य सचिव रमेश सिलवालले पनि नतृत्व सर्वसम्मतले चयन गर्न आग्रह गरे ।
अन्तराष्ट्रिय क्रिकेट परिषद (आईसीसी)ले क्यान निलम्बन गरेको झण्डै साढे ३ बर्षपछि क्यानको नयाँ नेतृत्वका लागि निर्वाचन हुन लागेको हो ।
सरकारी हस्तक्षप र अवैधानिक चुनावको कारण देखाउँदै आईसीसीले नेपाल क्रिकेट संघलाई निलम्बन गरेको थियो ।
नेपाली क्रिकेट विवाद समाधानका लागि आईसीसीले बनाएको सल्लाहाकार समितिले क्यानको विधान तयार गरेको थियो । सोही विधानमा टेकेर आईसीसीको स्वतन्त्र कमिटिले क्यानको नयाँ नेतृत्वका लागि निर्वाचन गराउन लागेको हो ।
साधारण सभाबाट नयाँ नेतृत्व चयन भएसगै क्यान निलम्बनको ढोका खुल्ने सबै पक्षको बुझाई छ ।
साधारण सभामा क्यानको जिल्ला र प्रदेशबाट ५९ सदस्य प्रतिनिधि काठमाडौं आएका छन् । सदस्य संख्याको बहुमतले क्यानको नयाँ नेतृत्व चयन गर्नेछ ।
-1732413260.jpg)
