काठमाडौं । हङकङमा भएको तेस्रो संस्करणको युथ एसियन च्याम्पियनसिपमा स्वर्ण विजेता एथ्लेटिक्सका युवा स्टार अजित यादव पुरस्कृत भएका छन् ।
नेपाल एथ्लेटिक्स संघले शुक्रबार स्वर्ण विजेता अजितलाई टिभीएसको १ सय २५ सीसीको मोटरसाइकलसहित पुरस्कृत गरेको हो । यस्तै प्रशिक्षक धनीराम चौधरीलाई १ लाख नगदले पुरस्कृत गरेको छ ।
संघले अजितलाई पुरस्कृत गर्ने घोषणा गरेको करिब चार महिनापछि मोटरसाइकल प्रदान गरेको हो । संघले गत चैत १२ गते एक मोटरसाईकल र पाँचवटा कर्पोरेट हाउसबाट १२ हजारका दरले मासिक ६० हजार उपलब्ध गराउने घोषणा गरेको थियो ।
अजितले च्याम्पियनसिपमा ३ हजार मिटरको दुरी ८ मिनेट ३० दशमलव ३२ सेकेन्डमा पुरा गर्दै स्वर्ण जितेका थिए । उनले आफ्नो स्पर्धामा भारत र यमनका खेलाडीलाई पछाडी पार्दै एथ्लेटिक्सको ईतिहासमा कीर्तिमान रचेका थिए ।
यसअघि सन् १९७३ मा फिलिपिन्समा भएको एसियन च्याम्पियनसिपमा नेपालका जितबहादुर केसीले काँस्य जितेका थिए ।
अजित र धनीरामलाई युवा तथा खेलकुदमन्त्री जगत बहादुर विश्वकर्मा, राष्ट्रिय खेलकुद परिषदका सदस्यसचिव रमेश कुमार सिलवाल, संघका अध्यक्ष राजिब बिक्रम शाह र राखेपका उपाध्यक्ष पिताम्बर तिम्सिना लगायतले सम्मान गरेका थिए ।
