काठमाडौं । भक्तपुर जिल्ला फुटबल संघविरुद्व आठ क्लब आन्दोलित भएका छन् । अखिल नेपाल फुटबल संघ एन्फाले सञ्चालन गरेको जिल्ला लिगमा अनाधिकृत क्लबलाई सहभागी गराउँदै आफुहरुलाई पाखा लगाएको भन्दै ८ क्लब विरोधमा उत्रिएका हुन् ।
जिल्ला लिगमा दर्ता नभएका क्लबलाई सहभागी गराएको र प्रतियोगिता नियमावलीमा कृत्य गरि स्थानीय क्लबलाई निरुत्साहित बनाउने काम गरेको भन्दै स्थानीय क्लबले विरोध जनाएका हुन् ।
उनीहरुले जिल्ला संघले टिम दर्ता गर्न नमानेको, अनावश्यक रुपमा कारबाही गरेको र जिल्लाका सक्रिय क्लबलाई सहभागी हुन नदिने निहित उद्वेश्य राखेर अधिकतम दर्ता शुल्क राखेको आरोप लगाएका छन् ।
भक्तपुरमा रहेका भक्तपुर फुटबल क्लब, सत्यनारायण फुटबल क्लब, दिव्यश्वरी युवा समाज, ख्वप फुटबल क्लब, नेवालय फुटबल क्लब, थिमी युथ क्लब, ख्वप्रि फुटबल क्लब र द बेस्ट टिमले ए्रन्फाको बार्षिक कार्यक्रम अन्तर्गत सञ्चालन भएको जिल्ला लिगमा सहभागी गराउन माग गरेका छन् ।
भक्तपुर फुटबल क्लबका अध्यक्ष राम प्रजापतिले आधिकारिक निकायमा दर्ता नभएका क्लबलाई समावेश गर्दै संघले टाईसिट निकालेको भन्दै आफुहरुलाई समावेश गरेर निष्पक्ष, पारदर्शी र खुल्ला सहभागीता सहित प्रतियोगिता आयोजना गर्न माग गरे ।
उनले प्रतियोगिताका लागि सार्वजनीक गरिएको टाईसिटमा समावेश १० टिममा ६ वटा क्लब कुनै आाधिकारिक निकायमा दर्ता नभएको भन्दै आवश्यक कारबाहीका लागि एन्फा र सम्बन्धित निकायलाई आग्रह समेत गरेका छन् ।
देशभरका अधिकांश जिल्लामा जिल्ला लिग सम्पन्न भएपनि भक्तपुरमा भने असार २६ गते हुने भनिएको जिल्ला लिग फुटबल प्रतियोगिता सम्पन्न भएको छैन ।
के हो भक्तपुर जिल्ला फुटबल संघको राजनीति ?
संसदीय राजनीतिमा नेपाल मजदुर किसान पार्टी अस्तित्व बचाउन संघर्षरत छ । कुनै समय देशभर प्रभाव राख्ने पार्टी अहिले भक्तपुरमा सिमित बनेको छ । अझ संघीय संसदको पछिल्लो निर्वाचनमा नेपाल मजदुर किसान पार्टी मात्र एउटा निर्वाचन क्षेत्रमा विजयी बन्यो । तर नेवार समुदायको बाहुल्यता रहेको भक्तपुरमा नेपाल मजदुर किसान पार्टीको राज चल्छ । उसको आफ्नै सरकार छ, अनि आफ्नै सत्ता ।
त्यही सत्तामाथिको पडकको एउटा उदाहरण भक्तपुर जिल्ला फुटबल संघ हो । यसका अध्यक्ष गौतम सुजकु हुन् । उनी नेमकिपाका अध्यक्ष नारायणमान बिजुक्छे निकटका नेता हुन् ।
एन्फाको गत बर्ष भएको निर्वाचनमा मात्र तीन क्लबलाई समावेश गर्दै जिल्ला फुटबल संघले निर्वाचन सम्पन्न गरेको थियो । एन्फाको विधानमा जिल्ला संघ गठनका लागि १० क्लब अनिवार्य भनिएको छ ।
तर तीन क्लब भएको अवैधानिक चुनावलाई तत्कालिन एन्फा नेतृत्वले मान्यता दियो । सोही अनुसार उनीहरु एन्फा निर्वाचनको केन्द्रिय प्रतिनिधि समेत बनेका थिए । तर सो निर्वाचन अवैधानिक भएको भन्दै असन्तुष्ट पक्षले अदालतमा मुद्वा दायर गरेको थियो । पछि सो मुद्वा फिर्ता लिएर निर्वाचनको वातावरण बनेको थियो ।
अहिले भएको विवाद के हो ?
एन्फाले बार्षिक कार्यक्रम अन्तर्गत सबै सदस्य जिल्लामा जिल्ला लिग सञ्चालन गरेको छ । जिल्लामा रहेका क्लबलाई सक्रिय बनाउन र जिल्लाका क्लबको वर्गिकरण गर्ने उद्वेश्यले प्रतियोगिता आयोजना गरिएको थियो ।
त्यसका लागि जिल्ला फुटबल संघले सार्वजनीक विज्ञापन गर्नुपर्ने थियो । सोही अनुसार भक्तपुर जिल्लामा रहेका क्लबहरु दर्ताका लागि सम्पर्कमा पुगे । तर जिल्ला संघले क्लबहरुलाई दर्तानै गर्न मानेन ।
उल्टै अनुसासनको कारबाही गरेर सक्रिय क्लबलाई कारबाहीको घोषणा गर्यो । अनि जिल्लामा सक्रिय क्लबले प्रतियोगिता खेल्न माग गर्दै एन्फामा निवेदन दिए । एन्फाले जिल्ला संघलाई बोलाएर क्लबहरुलाई सहभागी गराएर जिल्ला लिग गर्न निर्देशन दिएको थियो । तर जिल्ला संघले केन्द्रको निर्देशन टेरेन ।
प्रतियोगिता सञ्चालन गर्न एन्फाले मुख्य दुई शर्त राखेको थियो । पहिलो अनिवार्य रुपमा १० टिम सहभागी गराउनुपर्ने र दोस्रो जिल्ला प्रशासन कार्यालय र जिल्ला खेलकुद विकास समितिमा दर्ता भएर प्यान नम्बर लिएको टिम हुनपर्ने थियो । तर जिल्ला संघले जिल्लामा सक्रिय क्लबलाई पाखा गराउदै १० टिम दर्ता गरेर टाइसिट सार्वजनीक ग¥यो । टाइसिटमा समावेश १० मध्य ६ टिम जिल्ला प्रशासनमै दर्ता नभएका क्लब परे ।
जसमा सिद्वि गणेश, स्विट सर्कल, भक्तपुर नगरपालिका क्लब, ख्वप युनाईटेड, भक्तपुर युवा टिम र भक्तपुर युथ एफसी थिए । जिल्लाका अन्य क्लबलाई सहभागी हुन नदिने उद्वेश्यले फुटबल संघले क्लबको दर्ता शुल्कनै २५ हजार रुपैयाँसम्म राखेको थियो । आफुहरुलाई बाईपास गर्दै अनाधिकृत क्लबलाई प्रतियोगितमा सहभागी गराएको भन्दै असन्तुष्ट क्लब अदालत जाने तयारी गरेका छन् ।
के हो मसला ?
एन्फाका अधिकाश सदस्य जिल्लाले नाम मात्रको जिल्ला प्रतियोगिता सञ्चालन गर्दै केन्द्रबाट पठाएको रकम पचाउदै आएका थिए । आफु निकट अझ भनौ कागजमा मात्र क्लब गठन गर्ने र त्यही बलमा जिल्ला निर्वाचन जितेर केन्द्रमा स्वार्थ लिन पल्केका नेताहरु फुटबलमा धेरै छन् ।
एन्फाले यसपटक जिल्ला लिगमार्फत जिल्लामा समेत शीर्ष डिभिजनको क्लब छनोटको ब्यवस्था गरेको छ । जिल्लाका शीर्ष डिभिजनका क्लबले एन्फाको जिल्ला निर्वाचनमा मतदानको अधिकार पाउने नयाँ व्यवस्था छ ।
जिल्ला लिगमार्फत छनोट हुने क्लबले एन्फाको जिल्ला निर्वाचन प्रभावित पार्ने भएकाले भक्तपुरको फुटबल राजनीति पेचिलो बनेको हो ।
