बलियो भारतलाई न्युजिल्याण्डको चुनौती

एजेन्सी । इंग्ल्याण्डमा जारी आईसीसी एकदिवसीय विश्वकप क्रिकेटको पहिलो सेमिफाइनल खेल भोलि (मंगलबार) हुँदैछ ।

म्यानचेस्टरमा हुने पहिलो सेमिफाइनलमा भारत र न्युजिल्याण्ड प्रतिस्पर्धा गर्दैछन् । दुई टोलीबीचको खेल नेपाली समय अनुसार दिउँसो ३:१५ बजे सुरु हुनेछ ।

ओल्ड ट्राफोर्डमा मैदान उत्रदा दुवै टोलीको नजर फाइनल पुग्नु हुनेछ । दुवै टिमले सेमिफाइनलका लागि तयार भएको बताईसकेका छन् । यस खेलको विजेताले उपाधिका लागि अष्ट्रेलिया र इंग्ल्याण्डबीचको विजेतासँग खेल्नेछन् ।

दुई टोलीबीचको पछिल्लो पाँच खेलको नतिजा हेर्दा भारत बलियो देखिएको छ । पाँच भेटमा भारतले ३ खेल जितेको छ । न्युजिल्याण्डले १ खेल जितेको छ । एक खेल नतिजाविहीन बनेको थियो ।

विश्वकप इतिहाँसमा पहिलो पटक भारत र न्युजिल्याण्ड सेमिफाइनलमा खेल्न लागेका हुन् । यसै विश्वकपको लिग चरणको खेलमा पनि दुई टोलीबीच खेल भएको थिएन् । बर्षाले प्रभावित गर्दा दुई टोलीबीचको खेल रद्द भएको थियो ।

विश्वकपको सेमिफाइनलमा पहिलो पटक खेल्न लागेपनि दुई टोलीबीच यू-१९ विश्वकपको सेमिफाइनलमा भने प्रतिस्पर्धा गरेका थिए ।

सन् २००८ मा भएको उक्त यू-१९ विश्वकपको सेमिफाइनलमा भारतले बाजी मारेको थियो । र, फाइनलमा दक्षिण अफ्रिकालाई पराजित गर्दै भारतले उपाधि नै जितेको थियो ।

संयोग, उक्त यू-१९ विश्वकपको सेमिफाइनलमा रहेका दुवै देशका कप्तानहरु अहिले राष्ट्रिय टोलीको कप्तानी गरिरहेका छन् । न्युजिल्याण्ड केन विलियम्सनको नेतृत्वमा रहेको थियो भने भारत विराट कोहलीको कप्तानीमा रहेको थियो ।

सन् २००८ को सेमिफाइनलमा भारतले डिएल पद्दतिमा न्युजिल्याण्डलाई ३ विकेटले हराएको थियो ।

टस जितेर पहिले ब्याटिङ गरेको न्युजिल्याण्डले ५० ओभरमा ८ विकेट गुमाएर २०५ रन बनाएको थियो । खेलम कप्तान विलियम्सनले ३७ रनको योगदान गरेका थिए ।

डिएल पद्दतिको आधारमा भारतले ४३ ओभरमा १९१ रनको लक्ष्य पाएको थियो । र, भारतले ७ विकेटको क्षतिमा ९ बल बाँकी रहँदा खेल जितेको थियो । उक्त खेलमा कोहलीले ४३ रन जोडेका थिए ।

हेड टु हेडमा को बलियो ? 

हालसम्म एकदिवसीय क्रिकेटमा दुई राष्ट्रबीच १०५ पटक प्रतिस्पर्धा गरेका छन् । जसमा भारत हाबी रहेको देखिन्छ ।

भारतले ५५ खेलमा जित हात पारेको छ भने न्युजिल्याण्डले ४५ खेल जितेको छ । १ खेल बराबरी भएको छ भने १ खेल नितिजाविहीन भएको थियो ।

विश्वकपको हेड टु हेडमा भने भारत भन्दा न्युजिल्याण्ड अघि रहेको छ । हालसम्म ८ पटक विश्वकपमा आमने सामने भएका छन् । जसमा न्युजिल्याण्ड ४ पटक भारत माथि हाबी भएको छ । भारतले ३ खेल जित्दा १ खेल नतिजाविहीन भएको थियो ।

जारी विश्वकपमा भारतले ९ खेलमा ७ खेलमा जित हात पार्दै शीर्ष स्थानमा रहँदै सेमिफाइनल यात्रा गरेको थियो । समान खेल खेलेको न्युजिल्याण्डले ५ खेलमा जित हात पर्दा पाकिस्तानसँग नेट रन रेटको आधारमा सेमिफाइनल प्रवेश गरेको थियो ।

यस विश्वकपमा भारतका रोहित शर्मा उत्कृष्ट लयमा रहेका छन् । उनि विश्वकपमा सबै भन्दा धेरै रन बनाउने ब्याट्सम्यान रोहित हुन् । उनले ८ ईनिङ्समा ६ सय ४७ रन बनाएका छन् । जसमा उनले ५ शतक र १ अर्धशतक प्रहार गरेका छन् ।

सेमिफाइनलमा न्युजिल्याण्डलाई रोहितको डर हुनेछ । ओपनर रोहितलाई न्युजिल्याण्डका बलरले पहिलो पावर प्लेमा पेभिलियन पठाउन नसके न्युजिल्याण्डको फाइनल पुग्ने सपना रोहितले चक्नाचुर पार्न सक्ने छन् ।

यस्तै भारतलाई लोकी फिर्गुसनको डर रहेको छ । जारी विश्वकपको ७ खेलमा १७ विकेट हात पारेका उनी सर्वाधिक विकेट लिने खेलाडीको सूचीमा तेस्रो स्थानमा रहेका छन् ।