सावित्रा र युकेश सर्वोकृष्ट, रेश्मा लोकप्रिय

काठमाडौं । प्याराग्लाईडिङका युकेश गुरुङ र फुटबलकी सावित्रा भण्डारी एनएसजेएफ बजार पल्सर स्पोर्ट्स अवार्ड २०७५ इन एसोसियसन विथ एक्सन स्पोर्ट्स एण्ड पावड बाई गोल्डस्टारको बर्ष खेलाडी घोषित भएका छन् ।

नेपाल खेलकुद पत्रकार मञ्चले काठमाडौंमा मंगलबार आयोजना गरेको कार्यक्रममा पुरुष स्पर्धामा युकेश र महिला स्पर्धामा सावित्रालाई बर्ष खेलाडी घोषित भएका हुन् ।

पुरुषतर्फका विजेता युकेशले क्रिकेटका पारस खड्का र सोमपाल कामी तथा गल्फका शुक्रराज राई र जुडोका ईन्द्रबहादुर श्रेष्ठलाई पछाडी पार्दै अवार्ड जितेका हुन् । नेपाललाई १८ औ एसियाली खेलकुदमा प्याराग्लाईडिङ क्रसकन्ट्रीको पुरुष टिम ईभन्टमा रजत जिताउन सर्वाधिक स्कोर गरेका युकेशले स्याङ्जामा भएको पाराग्लाईडिङ एक्युरिसी वल्र्ड कपमा काँस्य पदक जितेका थिए ।

बर्ष महिला खेलाडी घाषित सावित्राले भलिबलकी सरस्वती चौधरी, क्रिकेटकी सीता रानामगर, जुडोकी मनिता श्रेष्ठ प्रधान र तेक्वान्दोकी निमा गुरुङलाई पछाडी पारिन् । नेपाललाई साफ च्याम्पियनसिपको उपविजेता बनाउन महत्वपुर्ण योगदान गरेकी सवित्राकै प्रभावशाली प्रर्दशनमा नेपालले भारतमा भएको हिरो गोल्डकपमा उपविजेता बनेको थियो ।

पिपल्स च्वाइस अवार्ड भने भलिबलकी विभागीय टिम एपीएफकी रेश्मा भण्डारीले चुनिईन् । उनले क्रिकेटका सन्दीप लामिछाने, ब्याटमिन्टनका प्रिन्स दाहाल, फुटबलकी सावित्रा भण्डारी र शारिरिक सुगठनका महेश्वर महर्जनलाई पछाडी पार्दै रेश्माले लोकप्रिय अवार्ड जित्न सफल भईन् ।

बर्ष उत्कृष्ट प्रशिक्षक भने प्याराग्लाईडिङका योगश भट्टराई घोषित भए । एसियन गेम्समा नेपाललाई ऐतिहासिक रजत जिताएका उनी बर्षका उत्कृष्ट प्रशिक्षकको हकदार बने । उनले फुटबलका हरि खड्का, एथलेटिक्सका धनीराज चौधरी, क्रिकेटका जगत टमाटा र भलिबलका ज्ञानेन्द्र विष्टलाई पछाडी पारे ।

एथ्लेटिक्सका अजितकुमार यादव युवा बर्ष खेलाडी घोषित भए । तेस्रो एसियन युथ च्याम्पियनसिपको ३ हजार मिटर दौडमा कीर्तिमानी स्वर्ण जितेका उनलाई युवा बर्ष खेलाडी घोषित गरिएको हो । उनले ब्याटमिन्टनका प्रिन्स दाहाल, क्रिकेटका ललितनारायण राजवंशी, फुटबलकी मन्जली कुमारी योञ्जन र कराँतेका विजय श्रेष्ठलाई पछाडी पारे ।

अन्तराष्ट्रिय रुपमा ब्यवसायीक फुटबल करियर अघि बढाईरहेका रोहित चन्दलाई स्पेशल अवार्डबाट सम्मानित गरियो । उनी अहिले ईन्डोनेशियाको शीर्ष डिभिजनको लिग खेलिरहेका छन् । उनकै उच्च प्रर्दशनमा पर्सिजा जाकार्ताले गत बर्षको लिग उपाधि उचालेको थियो । उनी बर्षको मोस्ट भ्यालुएबल खेलाडी घोषित भएका थिए ।

एसियन खेलकुदमा ऐतिहासिक रजत पदक जितेको प्याराग्लाईडिङ टिम अफ दी इयरबाट पुरस्कृत भयो ।

पारा बर्ष खेलाडी भने क्रिकेटकी मनकेसी चौधरीले हात पारन् । गत बर्ष पाकिस्तानविरुद्वको ४ म्याचको सिरिजमा उत्कृष्ट प्रर्दशन गरेकी उनीलाई पारा बर्ष खेलाडीबाट सम्मानित गरिएको हो ।

अन्तराष्ट्रिय एसियन खेल पत्रकार अवार्डबाट एआईपीएसका महासचिव तथा पाकिस्तान खेलकुद राईटर्स एसोसियसनका अध्यक्ष अम्जद अजिज मल्लिक सम्मानित भए ।

लाईफटाईम एचिभमेन्ट अवार्ड भने एथलेटिक्सका हरिबहादुर रोकायाले प्राप्त गरे ।

वर्ष पुरुष खेलाडी, वर्ष महिला खेलाडी, वर्ष प्रशिक्षक र पिपल्स च्वाइस अवार्डको विजेताले बजाजको पल्सर मोटरसाइकल प्राप्त गरेका छन् । यस्तै वर्ष महिला र पुरुष खेलाडीले टर्किस एयर्लाइन्सको हवाई टिकट प्राप्त गरे ।

साथै वर्ष पुरुष खेलाडी, वर्ष महिला खेलाडी, वर्ष प्रशिक्षक र पिपल्स च्वाइस अवार्ड विजेताले केल्मी, गोल्डस्टार, ताइक्मेस, डीस मिडिया नेटवर्क, न्यु होराइजन कार्पेटबाट गिफ्ट ह्याम्पर प्राप्त गरे ।

अन्य विधाका विजेताले जनही ५० हजार रुपैयाँसहित केल्मी, गोल्डस्टार, ताइक्मेस, डीस मिडिया नेटवर्क, न्यु होराइजन कार्पेटबाट गिफ्ट ह्याम्पर प्राप्त गरेका छन् । मनोनयनमा परेकाले पनि केल्मी, गोल्डस्टार, ताइक्मेस, डीस मिडिया नेटवर्कबाट गिफ्ट ह्याम्पर प्राप्त गरे ।

२०७५ सालभर नेपाली खेलकुद क्षेत्रको माध्यमबाट राष्ट्रिय र अन्तराष्ट्रिय रुपमा योगदान पुर्याउने खेलाडी तथा खेलसम्बद्व ब्यक्तिलाई अवार्ड कार्यक्रमबाट पुरस्कृत गरिएको हो ।