बोल्टको ह्याट्रिकमा अष्ट्रेलियाको मध्यम लक्ष्य

एजेन्सी । इंग्ल्याण्डमा जारी १२ औं संस्करणको आईसीसी एकदिवसीय विश्वकप क्रिकेटमा अष्ट्रेलियाले न्युजिल्याण्डलाई जितका लागि २४४ रनको मध्यम लक्ष्य प्रस्तुत गरेको छ ।

इंग्ल्याण्डको लर्ड्समा टस जितेर पहिले ब्याटिङ गरेको अष्ट्रेलियाले ५० ओभरमा ९  विकेट गुमाएर २४३ रन बनायो ।

अष्ट्रेलियाका लागि उस्मान ख्वाजा र एलेक्स केरीले अर्धशतकीय इनिङ्स खेले । ख्वाजाले ८८ रनको योगदान दिए । केरीले ७१ रन बनाए ।

यस्तै पाट कुमिन्सले अविजित २३, मार्कूस स्टोनिसले २१ तथा डेभिड वार्नरले १६ रन बनाए ।

न्युजिल्याण्डका ट्रेन्ड बोल्टले ह्याट्रिक विकेटसहित ४ विकेट लिए । बोल्टले अन्तिम ओभरको तेस्रो बलमा ख्वाजा, चौंथोमा मिचेल स्टार्क र पाँचौं बलमा जासन पाउललाई आउट गर्दै ह्याट्रिक पुरा गरे । उनको यो विश्वकपमा पहिलो ह्याट्रिक हो ।  बोल्ट विश्वकपमा ह्याट्रिक लिने न्युजिल्याण्डको पहिलो खेलाडी समेत बने ।

यस्तै लक्की फर्गुसन र जेम्स निशमले २/२ विकेट लिए ।

लर्ड्स क्रिकेट मैदानमा दुवै टोली जित निकाल्ने लक्ष्यसहित मैदान उत्रिएका छन् । अष्ट्रेलिया जारी विश्वकपको सेमिफाइनलमा यसअघि नै पुगिसकेको छ । अष्ट्रेलिया तालिकाको शीर्ष स्थानमा रहेको छ । त्यसैले अष्ट्रेलिया दबाबरहित खेल्नेछ ।

अष्ट्रेलियाले ७ खेलबाट १२ अंक जोडेको छ । तर, अष्ट्रेलिया न्युजिल्याण्डलाई पराजित गर्दै शीर्ष स्थान कायम राख्न चाहन्छ । 

यता, न्युजिल्याण्डको नजर भने सेमिफाइनल पुग्नु रहेको छ । न्युजिल्याण्ड अष्ट्रेलियालाई हराएर सेमिफाइनलमा स्थान पक्का गर्न चाहन्छ ।

न्युजिल्याण्ड ७ खेलबाट ११ अंक जोडेर तेस्रो स्थानमा रहेको । अष्ट्रेलियालाई हराए न्युजिल्याण्ड सेमिफाइनल पुग्नेछ ।  तर, बलियो अष्ट्रेलियाविरुद्ध न्युजिल्याण्डलाई जित निकाल्न निकै कठिन भने हुनेछ ।