एजेन्सी । इंग्ल्याण्डमा जारी १२ औं संस्करणको आईसीसी एकदिवसीय विश्वकप क्रिकेटमा श्रीलंकाले दक्षिण अफ्रिकालाई २०४ रनको मध्यम लक्ष्य दिएको छ ।
इंग्ल्याण्डको चेस्टरमा टस हारेर पहिले ब्याटिङ गरेको श्रीलंकाले ४९ ओभर ३ बलमा अलआउट हुँदै २०३ रन बनायो ।
श्रीलंकाका लागि कुशल परेरा र अभिस्का फर्नान्डोले समान ३०/३० रन बनाए । यस्तै धनन्जय डी सिल्भाले २४, कुशल मेन्डिसले २३ तथा थिसरा परेराले २१ रन बनाए ।
दक्षिण अफ्रिकाका लागि क्रिस मोरिस र ड्वाने प्रिट्रोरिओसले ३/३ विकेट लिए । कागीसो राबडाको नाममा २ विकेट रह्यो ।
आज दुवै टोली जित निकाल्ने लक्ष्यसहित मैदान उत्रिएका छन् ।
दक्षिण अफ्रिकाविरुद्ध मैदान उत्रदा श्रीलंका जित निकाल्दै सेमिफाइनलको आशा जीवित राख्ने योजनामा हुनेछ । श्रीलंकाको सेमिफाइनलमा पुग्ने झिनो सम्भावना रहेको छ ।
श्रीलंकाले ६ खेलमा ६ अंक जोडेको छ । र, श्रीलंका तालिकाको सातौं स्थानमा छ । श्रीलंकालाई शीर्ष ४ मा स्थान रहदै सेमिफाइनल पुग्ने सम्भावना कायम राख्न यस खेल महत्वपूर्ण रहेको छ ।
विश्वकपको आशा कायम राख्न श्रीलंकालाई जित अत्यावश्यक रहेको छ । दक्षिण अफ्रिकासंग पराजित भए श्रीलंका विश्वकपबाट बाहिरिनेछ ।
दक्षिण अफ्रिका भने प्रतियोगिताबाट बाहिरिसकेको छ । श्रीलंकाविरुद्धको खेल दक्षिण अफ्रिकाका लागि प्रतिष्ठाको खेल मात्र हुनेछ ।
दक्षिण अफ्रिकाले ७ खेलबाट ३ अंक जोडेको छ । र, अंक तालिकाको नवौं स्थानमा छ ।
दुईबीचको पछिल्लो पाँच भेटमा भने दक्षिण अफ्रिका बलियो देखिएको छ । पछिल्लो पाँच भेटमा दक्षिण अफ्रिकाले पाँचै खेल जितेको छ ।
