कार्यदलले भन्यो – साग गर्न ५ अर्व २५ करोड आवश्यक

काठमाडौं । आसन्न १३ औ दक्षिण एसियाली खेलकुद प्रतियोगिता आयोजना गर्न करिब ५ अर्व २६ करोड रुपैयाँ अनुमानित बजेट प्रस्ताव गरिएको छ ।

खेलकुद मन्त्री जगत विश्वकर्मा संयोजकत्वको प्रतियोगिता तयारी तथा व्यवस्थापन समितिले गठन गरेको बजेट निर्माण कार्यदलले बिज्ञसंग छलफल गर्दै झण्डै साढे ५ अर्वको अनुमानित बजेट पेश गरेको हो ।

कार्यदल संयोजक तथा राखेप उपाध्यक्ष पिताम्बर तिम्सिनाले अनुमानित बजेटको प्रतिवेदन आज (आईतबार) मन्त्री विश्कर्मालाई हस्तान्तरण गरेका छन् ।

यसअघि बसेको प्रतियोगिताको तयारी तथा व्यवस्थापन समितिको बैठकमा राखेप सदस्य सचिव केशवकुमार विष्टले करिव साढे ३ अर्वमा साग आयोजना गर्न सकिने बताएका थिए । तर कार्यदलले झण्डै दोब्बर बजेट अनुमान गर्दै प्रतिवेदन पेश गरेको छ ।

कार्यदल संयोजक तिम्सिनाले विभिन्न व्यक्ति र परिषदका कर्मचारीसंग छलफल गरेर बजेट पेश गरिएको जानकारी दिए ।

उनले बजेट केही महत्वकाक्षी देखिएपनि समारोह, खेलाडीको अभ्यास र आईटीलाई समेत महत्व दिएका कारण बजेटको आकार बढ्न गएको उल्लेख गरे ।

कार्यदलले विभिन्न १७ समितिको शीर्षक राखेर अनुमानित बजेट निर्धारण गरेको छ । कार्यदलका अनुसार राष्ट्रिय टिम तयारीमा ८८ करोड १२ लाख रुपैयाँ आवश्यक पर्ने अनुमान गरिएको छ ।

यस्तै, खेलस्थल व्यवस्थापनमा ३ करोड ११ लाख, प्राविधिक कामका लागि ३० करोड ४० लाख, स्रोत साधन परिचालनमा २० लाख, सुरक्षामा ५० करोड २६ लाख, आवासमा ४५ करोड ५२ लाख, यातायातमा १५ करोड ७१ लाख, स्वास्थ्य समितिमा ३ करोड ४३ लाख, प्रचार प्रसारमा ८ करोड ९५ लाख रुपैयाँ लाग्ने अनुमान गरिएको छ ।

यस्तै, समारोहमा ७१ करोड ४६ लाख, स्वयंसेवक परिचालनमा २ करोड, अतिथि सत्कारमा १ करोड २९ लाख, खेल सामाग्रीमा १ अर्व २९ करोड, एन्टि डोपिङ्गमा ३ करोड ५४ लाख, आयोजक समितिमा २७ करोड, आईटी व्यवस्थापनमा १९ करोड र विविधमा २५ करोड बजेट अनुमान गरिएको छ ।

बैशाख २६ गते बसेको सागको तयारी समितिको बैठकले बजेट निर्धारणका लागि राखेप उपाध्यक्षको संयोजकत्वमा कार्यदल गठन गर्दै ७ दिनको समय दिएको थियो ।

तर कार्यदलले झण्डै एक महिना पछि अनुमानित बजेट मन्त्रालयमा पेश गरेको हो । कार्यदलले विज्ञ र कर्मचारीको सहयोगमा बजेट निर्धारत गरेपनि प्रतियोगिताका लागि गठन गरिएको समितिसंग कुनै छलफल नै गरेन ।

खेलकुद मन्त्री विश्वकर्माले प्रतियोगिता सम्बन्धि कार्यविधि पारित नभएको अवस्थामा कार्यदलले पुर्णता पाउन नसकेको बताउँदै सोही कारण समितिलाई बजेट निर्माणमा जोड्न नसकिएको बताए ।

'कार्यविधि पारित भएको छैन । सोही कारण समितिले पुर्णता पाएका छैनन । समिति नै पुरा नभएको अवस्थामा काम गर्ने अवस्था छैन ।' उनले पत्रकार सम्मेलनमा भने ।

कार्यदलले बुझाएको प्रस्तावित बजेटमा खेलकुद मन्त्रालयले आवश्यक छलफल गरेर अर्थ मन्त्रालयमा पठाउने छ । अर्थ मन्त्रालयबाट स्वीकृत भएपछि मात्र सागका लागि सरकारले दिने बजेटको अन्तिम टुङ्गो लाग्नेछ ।